ភ្នំពេញ៖ ដើម្បីថែរក្សាស្នាដៃដូនតា អាជ្ញាធរជាតិអប្សរា និងក្រសួងវប្បធម៌ និងវិចិត្រសិល្បៈ បានជួយជ្រោមជ្រែងដល់អ្នកជំនាញ ផ្នែកសិល្បៈខ្មុក ម្រ័ក្សណ៍ ឱ្យទៅបង្រៀនជំនាញនេះដល់ពលរដ្ឋ និងយុវជនខ្មែរជាច្រើន នាក់ នៅក្នុងភូមិធម្មជាតិរុនតាឯក ក្រុងរុនតាឯកតេជោសែន ស្រុកបន្ទាយស្រី ខេត្តសៀមរាប តាមរយៈគម្រោងបណ្តុះបណ្តាល វិជា្ជជីវៈកេរដំណែលដូនតា ដល់​អ្នកមានចិត្តស្រឡាញ់វិស័យនេះ បាន រៀនសូត្រ និងទទួលយកចំណេះជំនាញដូនតាបន្តវេនទៅថ្ងៃអនាគត។

អាន៖លោក យុន តារារ័ត្ន អាយុ៥២ឆ្នាំ ជំនាញសិល្បៈសូនរូប និងជាគ្រូ បង្គោលក្នុងគម្រោងបណ្តុះបណ្តាលវិជ្ជាជីវៈ​កេរដំណែល​ដូនតាអស់រយៈ ពេល១១ខែមកហើយ។ គ្រូបង្គោលរូបនេះបានឱ្យដឹងថា ខ្មុកម្រ័ក្សណ៍ គឺជាខ្មុកធ្វើពីស្មាច់ ឬក្រដាស និងម្រ័ក្សណ៍​ជាដើម។ ចំណេះដឹងធ្វើខ្មុក ម្រ័ក្សណ៍នេះ មានរាប់រយឆ្នាំមកហើយនៅក្នុងសង្គមខ្មែរ។ ការណ៍នេះ គេត្រូវតែបណ្តុះបណ្តាល​បន្ត​ដើម្បីឱ្យចំណេះដឹងនេះមានភាព ទូលំ ទូលាយ និងកុំឱ្យបាត់បង់។ ចំពោះមុខខ្មុក ចាស់បុរាណធ្វើឡើង សម្រាប់ពាក់សម្តែង​ល្ខោន​ខោល មានតួអង្គផ្សេងៗនៅក្នុងរឿងរាមកេរ្តិ៍។

ដោយឡែកក្នុងការបង្រៀននេះ លោក តារារ័ត្ន បញ្ជាក់ថា គឺរៀន ផលិតខ្នាតតូច មានតួអង្គយក្ស ស្វា និងច្នៃជាវត្ថុអនុស្សាវរីយ៍​ជាច្រើន ប្រភេទទៀត ដើម្បីឱ្យសិស្សអាចមានលទ្ធភាពបង្កើតអាជីវកម្ម ពេលរៀន ចប់។

លោក យុន តារារ័ត្ន បានចំណាយពេល២ថ្ងៃរៀងរាល់ចុងសប្ដាហ៍ ធ្វើដំណើរចេញពីក្រុងសៀមរាបឆ្ពោះទៅក្រុងរុនតាឯកតេ​ជោសែន ដែលមានចម្ងាយជាង៣០គីឡូម៉ែត្រ ដើម្បីបង្រៀនយុវជន និងពលរដ្ឋ នៅទីនោះ។ បើទោះបីជាពេលវេលាខ្លី តែលោក បានព្យាយាមបង្ហាត់ បង្រៀនទាំងទ្រឹស្តី និងការអនុវត្តជាក់ស្តែង ដោយធ្វើឡើងក្នុងទម្រង់ ក្បួនខ្នាតនៃសិល្បៈខ្មែរ ហើយឃើញថា​ការខិតខំរបស់សិស្សងាយចាប់ បាន និងអាចធ្វើបានតាមអ្វីដែលគ្រូបានដាក់ឱ្យធ្វើ។

វគ្គបណ្តុះបណ្តាលនេះមានពលរដ្ឋ និងយុវជនចំនួន១៥នាក់ ដែលសុទ្ធ សឹងជាអ្នកស្រឡាញ់ និងជ្រើសរើស រៀនជំនាញ​ខ្មុកម្រ័ក្សណ៍។ អ្នកស្រី ប៊ុន ចាន់ធី អាយុ៤៥ឆ្នាំ ជាសិស្សម្នាក់ ក្នុងចំណោមសិស្សជាច្រើនទៀត ដែលមាននិស្ស័យនឹងសិល្បៈ​ខ្មុកម្រ័ក្សណ៍ ដែលធ្វើឱ្យការរៀន ឆាប់យល់ និងចេះចាំនូវក្បួនធ្វើតាមដំណាក់កាលនីមួយៗ។

អ្នកស្រី ប្រាប់ថា ជំនាញធ្វើខ្មុកម្រ័ក្សណ៍នេះមានការលំបាក ដោយ ត្រូវការភាពអត់ធ្មត់ជាច្រើន។ សព្វថ្ងៃ អ្នកស្រីអាចចេះផលិ​តខ្មុករូបសត្វ ដន្លាប់ និងវត្ថុអនុស្សាវរីយ៍ជាច្រើនប្រភេទទៀត។ អ្នកស្រី សង្ឃឹមថា ក្រៅពីជួយអ្នកស្រីឱ្យយកទៅធ្វើជាមុខរបរ​រកកម្រៃ​ជួយដល់ជីវភាព គ្រួសារប្រចាំថ្ងៃទៅថ្ងៃអនាគត គឺជាការផ្តល់ឱកាសឱ្យអ្នកភូមិធម្មជាតិរុន តាឯកបានចូលរួមថែរក្សា​មរតកវប្បធម៌ដូនតាខ្មែរ។

ចំណែកកញ្ញា សិទ្ធ សុណាន់ ដែលជានិស្សិតរៀននៅសកលវិទ្យាល័យផង បានឆ្លៀតពេលទំនេរចុងសប្ដាហ៍មករៀនសិល្បៈធ្វើ​ខ្មុកផង។ កញ្ញាប្រាប់ ថា ជំនាញនេះពិតជាមានសារសំខាន់ក្នុងការជួយថែរក្សាមរតក វប្បធម៌ របស់ដូនតាខ្មែរ។ នាងនិយាយថា កាលពីមុននាងមិនដែលស្គាល់អ្វីទៅជា សិល្បៈខ្មុកម្រ័ក្សណ៍ និងជាក្បាច់រចនារបស់ខ្មែរទេ។ ប៉ុន្តែបន្ទាប់ពីចូល រៀនជំនាញនេះ មិនត្រឹមតែធ្វើឱ្យនាងស្គាល់មរតកវប្បធម៌ដ៏មាន តម្លៃ របស់ដូនតាខ្មែរប៉ុណ្ណោះទេ គឺថែមទាំងចេះធ្វើវាទៀត និងមានមោទនភាព យ៉ាងខ្លាំងចំពោះចំណេះជំនាញនេះផងដែរ៕
ដោយ៖ម៉ា ដេប៉ូ