វ៉ាស៊ីនតោន៖ អង្គការយោធា ណាតូ បានបែរខ្នងដាក់ អាមេរិក នៅរយៈពេល ៦ សប្តាហ៍ចុងក្រោយ កន្លងមកនេះ។ លោកស្រី Karoline Leavitt លេខាធិការសារព័ត៌មាន ប្រចាំសេតវិមាន បានបញ្ជាក់ដូច្នេះ កាលពីថ្ងៃពុធ។

ការប្រកាសនេះ ធ្វើឡើង នៅ២ថ្ងៃ បន្ទាប់ពីប្រធានាធិបតីសហរដ្ឋអាមេរិក លោក Donald Trump បានទម្លាយអាថ៌កំបាំង ដ៏មិននឹកស្មានដល់មួយ ទាក់ទិនទៅនឹងគោលបំណងចង់ដកខ្លួនសហរដ្ឋអាមេរិកចេញ ពីអង្គការណាតូ ។ លោក ត្រាំ រិះគន់អង្គការណាតូ យ៉ាងចាស់ដៃ ថា ជា«អង្គការកំសាក» ក្រោយពេលដែលសម្ព័ន្ធយោធាមួយនេះ មិនចង់ជួយសហរដ្ឋអាមេរិក បើកច្រកសមុទ្រ Hormuz ឡើងវិញ។

លោកស្រី Karoline Leavitt លេខាធិការសារព័ត៌មាន ប្រចាំសេតវិមាន បានប្រាប់អ្នកសារព័ត៌មាន កាលពីថ្ងៃទី៨ ខែមេសា ថា «វាពិតជាគួរឱ្យសោកស្តាយណាស់ ដែល NATO បែរខ្នងដាក់ប្រជាជនអាមេរិក ក្នុងរយៈពេលប្រាំមួយសប្តាហ៍ ចុងក្រោយនេះ បើទោះបីជា ដឹងថា ប្រជាជនអាមេរិក បានផ្តល់មូលនិធិ ដល់ការការពារពួកគេ ក៏ដោយ»។

លោកស្រី Karoline Leavitt ប្រាប់ដែរថា អគ្គលេខាធិការសម្ព័ន្ធណាតូ លោក Mark Rutte គ្រោងនឹងជួប ជាមួយលោក Donald Trump នៅថ្ងៃព្រហស្បតិ៍នេះ។ បើតាម លោកស្រី Leavitt, ប្រធានាធិបតីអាមេរិកនឹងពិភាក្សា អំពីលទ្ធភាព នៃការចាកចេញពីសម្ព័ន្ធភាពមួយនេះ ផងដែរ។

យ៉ាងណា លោក Trump ធ្លាប់និយាយថា ហេតុផលចម្បង ដែលអាមេរិក លែងចង់ក្លាយជាសមាជិកអង្គការណាតូ គឺ ដោយសារតែសម្ព័ន្ធភាពយោធាមួយនេះ បានបដិសេធមិនប្រគល់កោះ Greenland មកឲ្យសហរដ្ឋអាមេរិកគ្រប់គ្រង តាមការចង់បានរបស់ខ្លួន ៕

ប្រភពពី AFP ប្រែសម្រួល ៖ សារ៉ាត