តូក្យូ ៖ ក្រុមហ៊ុនផលិតគ្រឿងបន្លាស់រថយន្តជប៉ុន ងាកទៅសម្លឹងមើល អាលុយមីញ៉ូម រុស្ស៊ី ចំពេលមានវិបត្តិផ្គត់ផ្គង់ ដោយសារសង្គ្រាម នៅមជ្ឈិមបូព៌ា នេះបើតាមសារព័ត៌មាន Bloomberg។

ទីភ្នាក់ងារព័ត៌មាន Bloomberg បានរាយការណ៍ ថ្មីៗនេះ ថា ក្រុមហ៊ុនផលិតគ្រឿងបន្លាស់រថយន្តជប៉ុន បានចូលពិភាក្សា ជាមួយក្រុមហ៊ុនអាលុយមីញ៉ូមយក្ស របស់រុស្ស៊ី Rusal ខណៈពេលដែលមានការរំខានពីជម្លោះ នៅមជ្ឈិមបូព៌ា ដែលកំពុងកើនឡើង ការផ្គត់ផ្គង់ផ្គត់ផ្គង់ នេះបើតាមការដកស្រង់ប្រភព ដែលដឹងអំពីបញ្ហានេះ។

ទោះបីជាអាលុយមីញ៉ូម របស់ក្រុមហ៊ុន Rusal មិនស្ថិតនៅក្រោមការដាក់ទណ្ឌកម្ម របស់បស្ចិមប្រទេសក៏ដោយ ក៏ក្រុមហ៊ុនជប៉ុន ស្ម័គ្រចិត្តបញ្ឈប់ការទិញ នៅឆ្នាំ២០២២ បន្ទាប់ពីការកើនឡើងនៃជម្លោះអ៊ុយក្រែន ដោយចុះកិច្ចសន្យា ជាមួយក្រុមហ៊ុនផលិតឈូងសមុទ្រជំនួសវិញ។

ក្រុមហ៊ុន រុស្ស៊ី Rusal បាននិយាយ ថ្មីៗនេះ ថា ការចរចាដើម្បីទិញ វត្ថុធាតុដើម ដែលប្រើក្នុងផ្នែករថយន្ត ដូចជា កង់, ប្លុកម៉ាស៊ីន និង ក្បាលស៊ីឡាំង បានដំណើរការប្រហែលមួយសប្តាហ៍ហើយ កត់សម្គាល់ថា កិច្ចព្រមព្រៀងមួយចំនួន អាចត្រូវបានបញ្ចប់ ក្នុងពេលឆាប់ៗនេះ។
អ្នកតំណាង Rusal បានប្រាប់ Forbes Russia ថា «យើងមិនអាចធ្វើអត្ថាធិប្បាយ ជាផ្លូវការ បានទេ»។

បើតាម RT, សង្រ្គាមដែលបានចាប់ផ្តើម ដោយការវាយប្រហារ របស់អាមេរិក និងអ៊ីស្រាអែល ទៅលើប្រទេសអ៊ីរ៉ង់ កាលពីចុងខែកុម្ភៈ បានរំខានដល់ការដឹកជញ្ជូនទំនិញ ឆ្លងកាត់ច្រកសមុទ្រ Hormuz ដែលប៉ះពាល់ដល់ថាមពល និង សម្ភារៈ ភាគច្រើន។ ក្រុមហ៊ុន Aluminium Bahrain បានប្រកាសអាសន្ន ខណៈ ក្រុមហ៊ុន Emirates Global Aluminum បានពន្យារពេលការដឹកជញ្ជូនមួយចំនួន។ ក្រុមហ៊ុនទាំងពីរ គឺជាក្រុមហ៊ុននាំចេញផលិតផលដ៏សំខាន់ទៅកាន់ប្រទេសជប៉ុន និងកូរ៉េខាងត្បូង។

តម្លៃអាលុយមីញ៉ូមបានឡើងដល់កម្រិតខ្ពស់បំផុត មិនធ្លាប់មាន ក្នុងរយៈពេលជិត ៤ ឆ្នាំ នៅក្នុងខែមីនា ដោយការជួញដូរ LME នាពេលអនាគត រយៈពេល ៣ ខែ អាចឡើងដល់ ៣,៤០០ដុល្លារ ក្នុងមួយតោន ចំពេលមានការព្រួយបារម្ភ អំពីការផ្គត់ផ្គង់ ដោយសារសង្គ្រាម មជ្ឈិមបូព៌ា៕

ប្រភពពី RT ប្រែសម្រួល ៖ សារ៉ាត