ភ្នំពេញ៖ចៅក្រមស៊ើបសួរសាលាដំបូងរាជធានីភ្នំពេញបានសម្រេច​ចោទប្រកាន់ជនត្រូវចោទជាចំនួន២០នាក់ (ស្រី្ត០២នាក់) ពីបទឆបោក​មានស្ថានទម្ងន់ទោសជាក្រុមមានការចាត់តាំង ការឆបោកតាមប្រព័ន្ធ​បច្ចេកវិទ្យា ((គ.ប.ឆ.ប. ) Online Scam )ទៅឃុំខ្លួនបណ្តោះ​អាសន្ននៅ​​ពន្ធនាគាររាជធានីភ្នំពេញ ។

ប្រភពលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.)បានឱ្យដឹងថា​យោង​តាមដីការ​បង្គាប់ឱ្យឃុំខ្លួនចំនួន២០ផ្សេងគ្នា ចេញដោយលោកប៊ុន រតនៈ ចៅក្រម​ស៊ើបសួរ នៃសាលាដំបូងរាជធានី​ភ្នំពេញ​កាលពី​ថ្ងៃទី១៣ ខែមេសា ឆ្នាំ២០២៦បានឱ្យដឹងថា ជនត្រូវជោទទាំង២០នាក់នោះមាន​ជនជាតិចិន១៩នាក់ និងជនជាតិកៀហ្សី​ស៊ីស្ថាន​ចំនួន១នាក់។

ជនត្រូវចោទខាងលើនេះ ត្រូវបានដាក់ឱ្យស្ថិតក្រោមការពិនិត្យ​ពី​បទឆបោកមានស្ថានទម្ងន់ទោសជាក្រុមមានការចាត់តាំងក្នុង​ការប្រព្រឹត្ត Online Scam និងការឆ្លងដែនខុសច្បាប់។ ចំពោះទីតាំង​ប្រព្រឹត្តគឺនៅចំណុចដីឡូត៍គ្មានលេខ ភូមិស្លែងរលើង សង្កាត់អូរបែក​ក្អម ខណ្ឌសែនសុខ រាជធានីភ្នំពេញ ។ ជនពាក់ព័ន្ធទាំងនេះ ក៏នឹងត្រូវ​ផ្ដន្ទាទោសតាមបញ្ញត្តិមាត្រា៣៨០ ក្រមព្រហ្មទណ្ឌ នៃព្រះរាជាណា​ចក្រ​កម្ពុជា និងមាត្រា២៩ នៃច្បាប់ស្តីពីអន្តោប្រវេសន៍។

បើយោងតាមក្រមព្រហ្មទណ្ឌ ត្រង់មាត្រា ៣៨០ ចែងថាអំពើឆបោក​ត្រូវផ្ដន្ទាទោសដាក់ពន្ធនាគារពី ២ (ពីរ) ឆ្នាំ ទៅ ៥ (ប្រាំ) ឆ្នាំ កាលបើ​បទល្មើសនេះ បានប្រព្រឹត្តជាក្រុមមានការចាត់តាំង។

យោងតាមបញ្ញត្តិមាត្រា ២៩ នៃច្បាប់ស្តីពីអន្តោប្រវេសន៍ បានចែង​ថា«ជនបរទេសរូបណាដែលគ្មានការអនុញ្ញាត ហើយចូលមក​ព្រះរាជា​ណាចក្រកម្ពុជាដោយលបលាក់ បន្លំ ឫដោយល្បិចផ្សេងទៀតដែល​ផ្ទុយនឹងបញ្ញត្តិនៃច្បាប់នេះ ត្រូវផ្ដន្ទាទោសដាក់គុកពី បីខែដល់ ប្រាំមួយខែ មុននឹងត្រូវបណ្ដេញចេញ។

ប្រភពដដែលបញ្ជាក់ថា ចាប់ពីខែកក្កដា ឆ្នាំ២០២៥ ដល់ខែមីនា ឆ្នាំ២០២៦នេះ ពោលគឺក្នុងរយៈពេល៩ខែ ចុងក្រោយ សមត្ថកិច្ច​កម្ពុជាក្នុងរាជធានី-ខេត្តបង្ក្រាបអំពើឆបោកតាមប្រព័ន្ធបច្ចេកវិទ្យា បានចំនួនជាង២៥០ ករណី និងបានកសាង​សំណុំ​រឿង បញ្ចូនទៅ​តុលាការ​ចំនួន ៨០ករណី ពាក់ព័ន្ធជនសង្ស័យប្រមាណ៧៥០នាក់ មានជនជាតិចិន ថៃ វៀតណាម ជប៉ុន កូរ៉េខាងត្បូង សិង្ហបុរី និងខ្មែរដែរ៕
ដោយ៖ង៉ាន ទិត្យ