ភ្នំពេញ៖ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នាព្រឹក ថ្ងៃទី ៣០ ខែមេសា ឆ្នាំ ២០២៦, នៅទីស្តីការក្រសួង បានអនុញ្ញាតឱ្យ លោកជំទាវMIYAZAKI Katsura អនុប្រធានទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA Executive Senior Vice President) ជួបសម្តែងការគួរសម និងពិភាក្សាការងារក្នុងខណៈដែលលោកជំទាវ បានមកបំពេញទស្សនកិច្ចការងារនៅព្រះរាជាណាចក្រកម្ពុជា។
 
ឆ្លៀតក្នុងឱកាសនេះ បន្ទាប់ពីជំនួបសម្តែងការគួរសម ដោយទទួលបានបុព្វសិទ្ធិដ៏ខ្ពង់ខ្ពស់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្នឧបនាយករដ្ឋមន្រ្តី តំណាងរាជរដ្ឋាភិបាលកម្ពុជា បានចុះហត្ថលេខាជាមួយ លោកជំទាវ MIYAZAKI Katsura អនុប្រធានទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA Executive Senior Vice President)លើកិច្ចព្រមព្រៀងឥណទានសម្បទានសម្រាប់គម្រោងការពារទឹកជំនន់ និងអភិវឌ្ឍន៍បណ្តាញបង្ហូរទឹកកខ្វក់ នៅរាជធានីភ្នំពេញ (កញ្ចប់ឥណទានទី១)[Flood Protection and Drainage Improvement Project in Phnom Penh Capital City (I)] ដែលមានទំហំឥណទាន ចំនួន ៦ ៩០៨ លានយ៉េនជប៉ុន ត្រូវជា ប្រមាណ ៤៧ លានដុល្លារអាម៉េរិក ។
 
គម្រោងនេះ មានគោលបំណងបញ្ចៀសការលិចលង់ដោយសារជំនន់ទឹកភ្លៀង និងការស្តារប្រព័ន្ធទឹកកខ្វក់ ដើម្បីចូលរួមចំណែកធ្វើឱ្យប្រសើរឡើងនូវបរិយាកាសរស់នៅរបស់ប្រជាជននៅក្នុងខណ្ឌដង្កោ និងខណ្ឌពោធិ៍សែនជ័យ រាជធានីភ្នំពេញ តាមរយៈការសាងសង់ប្រព័ន្ធលូសរុបប្រវែង៩,៣២ គ.ម, ការសាងសង់អាងស្តុកទឹក (Regulation Pond) ទំហំ ១៨ ហិកតា ចំនួន ១ កន្លែង, ការសាងសង់ស្ថានីយបូមទឹក (Pumping Station) ដែលមានសមត្ថភាពប្រមាណ ២០ម៣/វិនាទី ចំនួន ១ កន្លែង, ការសាងសង់ទ្វារទឹកជំនន់ (Floodgate) ចំនួន ២ កន្លែង, ការសាងសង់ស្ពានឆ្លង ចំនួន ១ កន្លែង និងការងារផ្គត់ផ្គង់ម៉ាស៊ីនបូមទឹកកខ្វក់ និងសម្ភារៈមួយចំនួនទៀត។
 
ពិធីចុះហត្ថលេខាលើកិច្ចព្រមព្រៀងឥណទានសម្បទានថ្ងៃនេះ បានឆ្លុះបញ្ចាំងពីការរីកចម្រើន និងការពង្រឹងកិច្ចសហប្រតិបត្តិការរវាងប្រទេសកម្ពុជា-ជប៉ុន ព្រមទាំងការប្តេជ្ញាយ៉ាងមុតមាំក្នុងការធ្វើការជាមួយគ្នាឲ្យកាន់តែជិតស្និទ្ធ ដើម្បីពិនិត្យលទ្ធភាពក្នុងបង្កើនទំហំឥណទានសម្រាប់គាំទ្រលើបេក្ខភាពគម្រោងថ្មីៗ (New Projects) ទៀត ។
 
ក្នុងនាមជាដៃគូអភិវឌ្ឍន៍ដ៏សំខាន់នៅព្រះរាជាណាចក្រកម្ពុជា រដ្ឋាភិបាលជប៉ុនតាមរយៈ JICA ប្តេជ្ញាធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជា តាមរយៈការពង្រឹងភាពជាដៃគូយុទ្ធសាស្រ្តរយៈពេលយូរ និងមានលក្ខណៈគ្រប់ជ្រុងជ្រោយ៕

ដោយ៖ង៉ាន់ ទិត្យ