ភ្នំពេញ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា អមដំណើរដោយថ្នាក់ដឹកនាំ ភរិយាថ្នាក់​ដឹកនាំ និងសប្បុរសជនជាច្រើនរូប កាលពីថ្ងៃទី២១ ខែឧសភា ឆ្នាំ២០២៦បានអញ្ជើញជួបសួរសុខទុក្ខ និងផ្តល់អំណោយ​ជូនបងប្អូន​អតីតយុទ្ធជន និងនិវត្តជន ចំនួន ១.១៦៩គ្រួសារ រស់នៅភូមិប៊ុនរ៉ានីសែនជ័យដំណាក់ទ្រយឹង ស្ថិតក្នុងឃុំព្រងិល ស្រុកភ្នំក្រវាញ ខេត្តពោធិ៍សាត់។

​ នៅក្នុងឱកាសដ៏វិសេសវិសាលនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានពាំនាំនូវព្រះរាជបណ្តាំផ្ញើសួរសុខទុក្ខ​ពីសំណាក់ព្រះករុណា ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធាន​កិត្តិយសកាកបាទក្រហមកម្ពុជា ជូនចំពោះបងប្អូនអតីតយុទ្ធជន និងនិវត្តជនទាំងអស់ ប្រកបដោយមនោសញ្ចេតនានឹករលឹក និងអាណិតស្រឡាញ់យ៉ាងជ្រាលជ្រៅបំផុត។
​
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានសម្តែងនូវការដឹងគុណយ៉ាងធំធេងចំពោះវីរភាពដ៏អង់​អាចក្លាហាន​របស់បង​ប្អូនអតីតយុទ្ធជន ដែលបានបូជាសាច់ស្រស់ឈាមស្រស់ ដើម្បីបុព្វហេតុជាតិ មាតុភូមិ។ លើសពីនេះ សម្តេចកិត្តិព្រឹទ្ធបណ្ឌិត ក៏បានថ្លែងនូវការកោតសរសើរចំពោះទឹកចិត្តរបស់ភរិយា កូនចៅ និងក្រុមគ្រួសារ ដែលបានលះបង់នូវសេចក្តីសុខ និងសុភមង្គលផ្ទាល់ខ្លួន ដើម្បីអនុញ្ញាតឱ្យប្តីសី និងកូនៗជាទីស្រឡាញ់ ទៅចូលរួមការពារបូរណភាពទឹកដី។

លើសពីនេះសម្តេចកិត្តិព្រឹទ្ធបណ្ឌិតនៅបានថ្លែងនូវការកោតសរសើរដល់ក្រសួងស្ថាប័នពាក់ព័ន្ធ អាជ្ញាធរគ្រប់លំដាប់ថ្នាក់ សប្បុរសជនគ្រប់មជ្ឈដ្ឋាន ដែលបានចូលរួមកសាង និងអភិវឌ្ឍ ភូមិប៊ុនរ៉ានីសែនជ័យដំណាក់ទ្រយឹង ឱ្យមានហេដ្ឋា​រចនា​សម្ព័ន្ធគ្រប់បែបយ៉ាង។សម្តេចកិត្តិព្រឹទ្ធបណ្ឌិត ក៏បានអំពាវនាវដល់គ្រប់ភាគីពាក់ព័ន្ធ សូមបន្តចូលរួមដោះស្រាយបញ្ហា​ដែលនៅ​សេសសល់ ដូចជាកង្វះខាតទឹក-ភ្លើង និងទីផ្សារទិន្នផលជាដើម។

សម្តេចកិត្តិព្រឹទ្ធបណ្ឌិត នៅបានផ្ដាំផ្ញើ និងអំពាវនាវយ៉ាងទទូចដល់ក្រុមគ្រួសារអតីតយុទ្ធជន និងនិវត្តជនទាំងអស់ ឱ្យយក​ចិត្តទុកដាក់ថែរក្សាសុខភាពឱ្យបានល្អ និងជំរុញកូនចៅឱ្យខិតខំរៀនសូត្រ ជៀសឆ្ងាយពីគ្រឿងញៀន និងអបាយមុខផ្សេងៗ។ ចំពោះស្ត្រីមានផ្ទៃពោះ ត្រូវទៅពិនិត្យផ្ទៃពោះនៅមណ្ឌលសុខភាពឱ្យបានទៀងទាត់មុនសម្រាល ។ចំណែកឯលោកតាលោក​យាយចាស់ៗក៏ត្រូវអញ្ជើញទៅពិនិត្យសុខភាពឱ្យបានទៀងទាត់ ដើម្បីព្យាបាលជំងឺបានទាន់ពេលវេលាផងដែរ។ បន្តចូលរួម​បង្កបង្កើនផលលើដីធ្លីដែលមានស្រាប់ ឬចិញ្ចឹមសត្វ ដើម្បីលើកកម្ពស់សេដ្ឋកិច្ចគ្រួសារ។
​
បន្ទាប់ពីជួបសំណេះសំណាល និងចែកអំណោយខាងលើនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានអញ្ជើញកាត់ខ្សែបូ សម្ពោធប្រគល់ផ្ទះថ្មីចំនួន ១០០ខ្នង និងអណ្តូងចំនួន ១២៥អណ្តូង បន្ថែមទៀត ជូនបងប្អូនអតីតយុទ្ធជន​នៅភូមិប៊ុនរ៉ានី​សែនជ័យដំណាក់ទ្រយឹង ដែលសរុបផ្ទះនិងអណ្តូងជាអំណោយរបស់កាកបាទក្រហមកម្ពុជា មានផ្ទះចំនួន ៧២៨ខ្នង និងអណ្តូង​ចំនួន ៤១៥អណ្តូង។ បន្ទាប់មកសម្តេចកិត្តិព្រឹទ្ធបណ្ឌិត បានអញ្ជើញចុះសួរសុខទុក្ខដោយផ្ទាល់ខ្នងផ្ទះគំរូ ដើម្បីបានដឹងពីសុខទុក្ខ និងជីវភាពរស់នៅរបស់ក្រុមគ្រួសារអតីតយុទ្ធជន និងនិវត្តជន ។

សូមជម្រាបជូនថា អំណោយផ្តល់ជូនបងប្អូនអតីតយុទ្ធជន និងនិវត្តជនមាន អង្ករ , មី , ត្រីខ , ទឹកស៊ីអ៊ីវ, ទឹកត្រី , ប្រេងឆា, សាប៊ូកក់សក់, ភេសជ្ជៈ, ឃីត១កញ្ចប់ (សារុង ក្រមា មុង ភួយ) និងថវិកា ៥០.០០០រៀល។ ដោយឡែក សិស្សានុសិស្ស​នៃសាលាបឋមសិក្សា និងអនុវិទ្យាល័យ ប៊ុនរ៉ានីសែនជ័យដំណាក់ទ្រយឹង ចំនួន ៣១៧នាក់ ក្នុងម្នាក់ៗទទួលបាន សៀវភៅ, ប៊ិក និងថវិកាមួយចំនួនដែលជាអំណោយរបស់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន៕
ដោយ៖គ្រី សម្បត្តិ