ភ្នំពេញ ៖ ក្រសួងមុខងារសាធារណៈ និង ក្រសួងយុត្តិធម៌ បានរៀបចំការ ប្រឡង ប្រជែង ជ្រើសរើស មន្ត្រីរាជការ ឱ្យចូលបម្រើ ការងារក្នុងក្របខ័ណ្ឌក្រសួងយុតិ្តធម៌។ ការប្រឡងនេះ មាន បេក្ខជន ចូលរួម ចំនួន ១១០៧នាក់ ខណៈ ការជ្រើសរើស ត្រឹម ៤៥កន្លែង.

ដំណើរប្រឡងបានប្រព្រឹត្តទៅនៅព្រឹកថ្ងៃសុក្រទី២៩ ខែឧសភា នេះមានវត្តមានចូលរួមផ្ទាល់ពីឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងឯកឧត្តម ជិន ម៉ាលីន រដ្ឋលេខាធិការក្រសួងយុត្តិធម៌ ក្នុងការកញ្ចប់វិញ្ញាសា ។​ការប្រឡងនេះក៏មានវត្តមាន អ្នកសង្កេតការណ៍ ពី អង្គភាព ប្រឆាំង អំពើ ពុករលួយ ផងដែរ។

ប្រាប់អ្នកសារព័តមាននៅក្រោយពេលកាត់វិញ្ញាសាប្រឡង ឯកឧត្តម ជិន ម៉ាលីន បានបញ្ជាក់ថា ការរៀបចំការប្រឡងជ្រើសរើស​មន្រ្តីរាជការសម្រាប់បម្រើក្នុងក្របខ័ណ្ឌក្រសួងយុត្តិធម៌ ដែលរៀបចំឡើងដោយក្រសួងមុខងារសារធារណៈ ឃើញថាធ្វើបានល្អ ប្រកបដោយសុក្រិត អាចជឿជាក់បាន។

សម្រាប់មន្រ្តីក្របខ័ណ្ឌដែលក្រសួងយុត្តិធម៌ ត្រូវជ្រើសរើសគឺ មន្រ្តីបច្ចេកទេសជំនាញខាងច្បាប់ ដោយផ្តោតលើ​ជំនាញបីមាន ទី១.ព្រហ្មទណ្ឌ ទី២.រដ្ឋប្បវេណី និងទី៣ .អន្តរជាតិ ។បើទោះបីជាបេក្ខជនជ្រើសរើសយកជំនាញណាមួយ​ក៏ដោយក៏បេក្ខជនត្រូវមានជំនាញបន្ទាប់បន្សំដែរ។

ដោយឡែកក្នុងឱកាសអញ្ជើញកាត់វិញ្ញាសាប្រឡង ឯកឧត្តមឧបនាយករដ្ឋមន្ត្រី ហ៊ុន ម៉ានី បានបញ្ជាក់ថា នៅក្នុងដៃរបស់​ឯកឧត្តម ជាវិញ្ញាសាដែលទើបតែជ្រើសរើសមុននេះបន្តិច និងបានរៀបចំក្តៅៗ។ ដំណើរការនេះ គឺដើម្បីធានាបាននូវការ​ប្រឡង​ប្រជែង ជាពិសេសការចេញវិញ្ញាសាមិនមាននណាម្នាក់ដឹងមុននោះទេ សូម្បីតែឯកឧត្តមខ្លួនឯង ដែលជាអ្នកជ្រើសរើស​ប្រធានវិញ្ញាសា​ក៏ដោយ។ ឯកឧត្តមបន្ថែមថា រាល់សន្លឹកកិច្ចការរបស់បេក្ខជន គឺមានហត្ថលេខារបស់លោកនៅគ្រប់សន្លឹកតែម្តង។

គួរជម្រាបថា ការប្រឡងជ្រើសរើសមន្ត្រីរាជការ ឱ្យចូលបម្រើការងារក្នុងក្របខ័ណ្ឌក្រសួងយុតិ្តធម៌ មានបេក្ខជនដាក់​ពាក្យចូលរួម​ក្នុងប្រពន្ធ័សរុបចំនួន ២,៥២០នាក់ ក្នុងនោះអ្នកមានសិទ្ធប្រឡង ១,១០៧នាក់ ។ការប្រកាស​លទ្ធផលនៃការប្រឡងគ្រោងនឹងធ្វើ​នៅថ្ងៃ​ទី៥ ខែមិថុនា។វិញ្ញាសាប្រឡងមានចំនួន៥៖ដូចជា ១.វិញ្ញាសាសរសេររដ្ឋប្បវេណី, ២.វិញ្ញាសាសរសេរព្រហ្មទណ្ឌ, ៣.វិញ្ញាសាសរសេរទំនាក់ទំនងអន្តរជាតិ, ៤.វិញ្ញាសាពហុចម្លើយភាសាអង់គ្លេស និង ៥.វិញ្ញាសាពហុចម្លើយចំណេះដឹងទូទៅ៕

ដោយ៖ង៉ាន់ ទិត្យ
រូបភាព៖រិន រចនា