វ៉ាស៊ីនតោន ៖ លោក Donald Trump ប្រធានាធិបតីអាមេរិក អះអាងថា អ៊ីរ៉ង់ព្រមព្រៀងមិនផលិតអាវុធនុយក្លេអ៊ែរ ហើយលើកឡើងទៀតថា លោកអាចនឹងជួបតទល់ជាមួយមេដឹកនាំថ្មី គឺ លោក Mojtaba Khamenei។

លោក Trump បានប្រាប់ Pod Force One នៅក្នុងបទសម្ភាសន៍មួយ កាលពីថ្ងៃពុធថា «ពួកគេបានយល់ព្រមរួចហើយថា ពួកគេនឹងមិនមានអាវុធនុយក្លេអ៊ែរទេ»។

នៅពេលសួរអំពី ការចូលរួម របស់លោក Mojtaba Khamenei ក្នុងកិច្ចពិភាក្សា ជាមួយសហរដ្ឋអាមេរិកស្តីពីការបញ្ចប់អរិភាព, លោក Trump បាននិយាយថា «គាត់មានការពាក់ព័ន្ធជាដាច់ខាត… ខ្ញុំគិតថា ពួកគេមានការគោរពច្រើនចំពោះគាត់»។

លោក Trump បាននិយាយទៀតថា «ខ្ញុំចង់ជួបគាត់…យើងប្រហែលជានឹងជួបគ្នា នៅពេលណាមួយ អាស្រ័យលើរបៀបដែលវាដំណើរការទាំងអស់» ។

ប្រធានាធិបតីសហរដ្ឋអាមេរិករូបនេះ បាននិយាយថា លោកបានចាត់ទុកសង្រ្គាមអ៊ីរ៉ង់ថា ជាជោគជ័យ ព្រោះយោធារបស់ប្រទេសអ៊ីរ៉ង់ ត្រូវបានបំផ្លាញ។

ជម្លោះដែលបានចាប់ផ្តើមជាមួយនឹងការវាយប្រហារ រវាងសហរដ្ឋអាមេរិក និងអ៊ីស្រាអែល កាលពីថ្ងៃទី២៨ ខែកុម្ភៈ បានធ្វើឱ្យតម្លៃរថាមពលសកលកើនឡើងខ្លាំង ហើយបានបង្ហាញពីភាពមិនពេញនិយម ជាមួយប្រជាជនអាមេរិក ជាច្រើនខែ មុនការបោះឆ្នោតសភា នាខែវិច្ឆិកា៕

ប្រភព ៖ CNA ប្រែសម្រួល ៖ សារ៉ាត