​ភ្នំពេញ​​​៖ ទីភ្នាក់ងារសហប្រតិបត្តិការអន្តរជាតិកូរ៉េ (KOICA) បានបើកវគ្គបណ្តុះបណ្តាលកម្រិតខ្ពស់រយៈពេល ១៤ ថ្ងៃ នៅសាធារណរដ្ឋកូរ៉េ ជូនដល់មន្ត្រីរាជការស៊ីវិលជាន់ខ្ពស់កម្ពុជាចំនួន ១៥ រូប មកពីក្រសួងមុខងារសាធារណៈ និងសាលាភូមិន្ទរដ្ឋបាល (RSA) រួមទាំងសមាជិកនៃអង្គភាពអនុវត្តគម្រោង (PIU) ផងដែរ។ គណៈប្រតិភូបណ្តុះបណ្តាលនេះ ដឹកនាំដោយ ឯកឧត្តម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ និងជានាយកសាលាភូមិន្ទរដ្ឋបាល។ កម្មវិធីនេះត្រូវបានប្រព្រឹត្តទៅចាប់ពីថ្ងៃទី០៧ ដល់ថ្ងៃទី២០ ខែមិថុនា ឆ្នាំ២០២៦ ដែលជាផ្នែកមួយនៃកិច្ចខិតខំប្រឹងប្រែងបន្តបន្ទាប់របស់ KOICA ក្នុងការបណ្តុះបណ្តាលពង្រឹងសមត្ថភាពស្ថាប័ន និងជំរុញការកែទម្រង់រដ្ឋបាលសាធារណៈនៅកម្ពុជា។

វគ្គបណ្តុះបណ្តាលនេះ ត្រូវបានអនុវត្តឡើងក្រោមគំនិតផ្តួចផ្តើមអភិវឌ្ឍន៍រយៈពេល ៥ ឆ្នាំ (២០២៥ ដល់ ២០២៩) របស់ KOICA ក្រោមចំណងជើងថា ការពង្រឹងសមត្ថភាពសាលាភូមិន្ទរដ្ឋបាល សម្រាប់ការកែទម្រង់អភិបាលកិច្ច និងការវឌ្ឍនភាពនៃប្រទេសកម្ពុជា ជាមួយនឹងកញ្ចប់ថវិកាសរុបចំនួន ១១,៧ លានដុល្លារអាមេរិក។ គម្រោងនេះត្រូវបានរៀបចំឡើងដើម្បីគាំទ្រដល់ការធ្វើទំនើបកម្មប្រព័ន្ធមុខងារសាធារណៈរបស់កម្ពុជា ដោយលើកកម្ពស់ការគ្រប់គ្រងធនធានមនុស្ស (HRM) និងក្របខ័ណ្ឌអភិវឌ្ឍន៍ធនធានមនុស្ស (HRD) ការកែលម្អការអនុវត្តស្ថាប័ន និងការលើកកម្ពស់ការអនុវត្តអភិបាលកិច្ចប្រកបដោយតម្លាភាព ផ្អែកលើគុណវុឌ្ឍិ និងប្រសិទ្ធភាព។

កម្មវិធីនេះត្រូវបានប្រារព្ធឡើងនៅសាកលវិទ្យាល័យកូរ៉េ (Korea University Sejong Campus) ដោយផ្តល់ជូនអ្នកចូលរួមនូវការបណ្តុះបណ្តាលកម្រិតខ្ពស់លើសមាសធាតុសំខាន់ៗនៃប្រព័ន្ធធនធានមនុស្សទំនើប រួមមានក្របខ័ណ្ឌធនធានមនុស្សផ្អែកលើសមត្ថភាព យន្តការជ្រើសរើសបុគ្គលិក និងការតែងតាំង ប្រព័ន្ធវាយតម្លៃការអនុវត្ត ការអភិវឌ្ឍការអប់រំ និងបណ្តុះបណ្តាល និងអភិបាលកិច្ចដែលជំរុញដោយទិន្នន័យ។ តាមរយៈការរួមបញ្ចូលគ្នានៃការបង្រៀន សិក្ខាសាលា និងវគ្គសន្ទនាគោលនយោបាយ ដែលដឹកនាំដោយអ្នកជំនាញរដ្ឋបាលសាធារណៈកូរ៉េ អ្នកចូលរួមត្រូវបានលាតត្រដាងអំពីគំរូជាក់ស្តែងនៃកំណែទម្រង់មុខងារសាធារណៈ និងនវានុវត្តន៍ស្ថាប័ន។

ចំណុចសំខាន់នៃកម្មវិធីនេះគឺការផ្លាស់ប្តូរបទពិសោធន៍របស់ប្រទេសកូរ៉េក្នុងការកសាងប្រព័ន្ធរដ្ឋបាលសាធារណៈដែលមានតម្លាភាព និងផ្អែកលើគុណសម្បត្តិ។ អ្នកចូលរួមនឹងសិក្សាពីឧត្តមានុវត្តន៍នៃភាពយុត្តិធម៌ក្នុងការជ្រើសរើសបុគ្គលិក ដំណើរការជ្រើសរើសដែលមានរចនាសម្ព័ន្ធ វិធីសាស្ត្រវាយតម្លៃស្តង់ដារ ការក្រិតតាមខ្នាតការសម្ភាសន៍ និងយន្តការសវនកម្មដែលធានានូវគណនេយ្យភាព និងសុចរិតភាពក្នុងការផ្តល់សេវាសាធារណៈ។

ជាផ្នែកមួយនៃវគ្គបណ្តុះបណ្តាល សិក្ខាកាមនឹងធ្វើទស្សនកិច្ចសិក្សាទៅកាន់ស្ថាប័នសំខាន់ៗរបស់កូរ៉េ រួមមាន ក្រសួងគ្រប់គ្រងបុគ្គលិក គណៈកម្មការប្រឆាំងអំពើពុករលួយ និងសិទ្ធិពលរដ្ឋ និងបណ្ណសារជាតិកូរ៉េ។ ទស្សនកិច្ចសិក្សាទាំងនេះត្រូវបានរៀបចំឡើងដើម្បីស្វែងយល់ដោយផ្ទាល់អំពីប្រព័ន្ធរដ្ឋបាលរបស់ប្រទេសកូរ៉េ កំណែទម្រង់អភិបាលកិច្ច និងការអនុវត្តតាមស្ថាប័នដែលគាំទ្រដល់ការគ្រប់គ្រងវិស័យសាធារណៈប្រកបដោយប្រសិទ្ធភាព។

តាមរយៈវគ្គបណ្តុះបណ្តាលនេះ KOICA បញ្ជាក់ជាថ្មីនូវការប្តេជ្ញាចិត្តរយៈពេលវែងរបស់ខ្លួនក្នុងការគាំទ្ររាជរដ្ឋាភិបាលកម្ពុជាក្នុងការពង្រឹងប្រព័ន្ធអភិបាលកិច្ច ការលើកកម្ពស់ប្រសិទ្ធភាពវិស័យសាធារណៈ និងការកសាងមន្ត្រីរាជការដែលមានជំនាញនិងសមត្ថភាព ស្របតាមអាទិភាពកំណែទម្រង់ជាតិ និងគោលដៅអភិវឌ្ឍន៍ប្រកបដោយចីរភាព៕

ដោយ៖ង៉ាន់ ទិត្យ