យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា ការនាំចូលទំនិញពីប្រទេសថៃមកកម្ពុជា ក្នុងរយៈពេល៥ខែដើមឆ្នាំនេះ មានតម្លៃសរុបជាង ៨៥៤លានដុល្លារអាមេរិក ថយចុះ ៤២,៤ភាគរយ បើធៀបនឹងរយៈពេលដូចគ្នាក្នុងឆ្នាំ២០២៥។ ការធ្លាក់ចុះនេះមានន័យថា ថៃបានបាត់បង់ចំណូលពីទីផ្សារកម្ពុជាប្រមាណ ៦២៩លានដុល្លារអាមេរិក។ ដោយឡែក ការនាំចេញពីកម្ពុជាទៅថៃវិញសម្រេចបាន ២៩៦លានដុល្លារ គឺថយចុះ២៥ភាគរយ។

របាយការណ៍ដដែលបង្ហាញថា ជារួម ទំហំពាណិជ្ជកម្មសរុបរវាងកម្ពុជា និងថៃ ក្នុងរយៈពេល ៥ខែដំបូងនៃឆ្នាំ២០២៦ សម្រេចបានជាង ១,១ពាន់លានដុល្លារ ថយចុះ ៣៨,៧ភាគរយ បើធៀបនឹងរយៈពេលដូចគ្នាក្នុងឆ្នាំ២០២៥។
​
ទោះបីយ៉ាងណា ប្រទេសថៃ គឺជាដៃគូពាណិជ្ជកម្មលំដាប់ទី៥របស់កម្ពុជា ខណៈប្រទេសចិននៅតែស្ថិតលំដាប់កំពូលដែលបាននាំចូលទំនិញមកកម្ពុជាច្រើនជាងគេ តាមពីក្រោយដោយអាមេរិក វៀតណាម និងជប៉ុន។

ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្មកម្ពុជា បានពន្យល់ថា និន្នាការនៃការធ្លាក់ចុះការនាំចូលទំនិញថៃនេះ បានកើតឡើងតាំងពីពេលមានជម្លោះព្រំដែន និងការឈ្លានពានផ្នែកយោធាពីសំណាក់ភាគីថៃមកម៉្លេះ។ ព្រឹត្តិការណ៍នាពេលនោះ បានជំរុញឱ្យប្រជាពលរដ្ឋខ្មែររួមគ្នាធ្វើពហិការផលិតផលថៃ ដែលជាឱកាសឱ្យអាជីវករ និងអ្នកផលិតក្នុងស្រុក បង្កើនសមត្ថភាពផលិតទំនិញ ដើម្បីបំពេញតម្រូវការទីផ្សារជំនួសវិញ។

យោងតាមអគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ក្រុមទំនិញដែលបន្តនាំចូលពីថៃ រួមមាន មធ្យោបាយផលិតកម្ម ដូចជាគ្រឿងចក្រ គ្រឿងយន្តកសិកម្ម ត្រាក់ទ័រ ម៉ាស៊ីនច្រូត និងធាតុចូលផលិតកម្មដែលជាតម្រូវការរបស់ក្រុមហ៊ុនវិនិយោគធំៗនៅកម្ពុជា។ ក្រៅពីនេះ មាននាំចូលគ្រឿងបង្គុំដែលបម្រើឱ្យការរក្សាខ្សែច្រវាក់ផលិតកម្មនៅក្នុងប្រទេសសម្រាប់ក្រុមហ៊ុនតំឡើងយានយន្ត៕ ​ទួន សុផល