អឺរ៉ុប ៖ ក្នុងរយៈពេលជាង១សប្តាហ៍, ប្រជាជនអឺរ៉ុប ចំនួនជាង ១,៣០០នាក់ បានស្លាប់ ព្រោះតែរលកកម្តៅ ដោយបានធ្វើការកត់ត្រា ពីអ្នកបាត់បង់ជីវិត ចាប់តាំងពីថ្ងៃទី២១ ខែមិថុនា។ នេះបើតាមការគូសបញ្ជាក់ របស់លោក Tedros Adhanom Ghebreyesus ប្រធានអង្គការសុខភាពពិភពលោក។

តាមរយៈបណ្តាញសង្គម X កាលពីថ្ងៃអាទិត្យ, លោក Tedros Adhanom Ghebreyesus អះអាងថា មូលហេតុ ដែលរលកកម្តៅខ្លាំង ក្លាយជាឃាតករស្ងៀមស្ងាត់ សម្លាប់ប្រជាជនអឺរ៉ុប ទាំងជាង ១,៣០០នាក់នេះ គឺ ដោយសារតែផ្ទះ, កន្លែងធ្វើការ ព្រមទាំង សាលារៀន នៅក្នុងទ្វីបទាំងមូល មិនត្រូវបានសាងសង់ឡើង ត្រៀមទប់ទល់នឹងសីតុណ្ហភាពទាំងនេះ គ្រប់គ្រាន់ នោះទេ។

លោកបញ្ជាក់ថា អឺរ៉ុប បានក្លាយជាទ្វីប ដែលមានការកើនឡើងកំដៅលឿនបំផុត នៅលើផែនដី នាពេលបច្ចុប្បន្ន។

ប្រធាន WHO រូបនេះ ព្រមានទៀតថា អាចនឹងមានមនុស្សស្លាប់ រាប់រយនាក់ បន្ថែមទៀតនៅអឺរ៉ុប ខណៈដែលប្រជាជន ១៥០លាននាក់ នៅទូទាំងទ្វីប នៅពេលនេះ កំពុងរស់ក្រោមកំដៅខ្លាំង។

បើតាម Yahoo, សីតុណ្ហភាពដែលឡើងកម្តៅខ្លាំង បានបំបែកកំណត់ត្រា នៅទូទាំងទ្វីបអឺរ៉ុប ពេញមួយសប្តាហ៍មុន ដោយកម្រិតបារតសីតុណ្ហភាព បានឡើងដល់ លើសពី ៤០ អង្សាសេ។

ជាមួយគ្នានេះ, លោក Tedros ប្រធានអង្គការសុខភាពពិភពលោក ធ្លាប់បានព្រមាន កាលពីដើមសប្តាហ៍មុនដែរថា មនុស្សប្រហែល ៥០ម៉ឺននាក់ បានស្លាប់ ជារៀងរាល់ឆ្នាំ នៅទូទាំងពិភពលោក ដោយ មូលហេតុ គឺ ទាក់ទងនឹងរលកកំដៅខ្លាំង៕

ប្រភព ៖ Yahoo ប្រែសម្រួល ៖ សារ៉ាត