ប៉េកាំង ៖ នាវាចម្បាំងរុស្ស៊ី ត្រូវបានបញ្ជូនមកដល់ប្រទេសចិន កាលពីថ្ងៃអាទិត្យ ដើម្បីចូលរួមធ្វើសមយុទ្ធកងទ័ពជើងទឹកជាមួយគ្នា ចាប់ពីថ្ងៃចន្ទនេះ ដល់ថ្ងៃទី១៣ ខែកក្កដា។

រូបភាពដែលចេញផ្សាយដោយក្រសួងការពារជាតិរុស្ស៊ី បង្ហាញពីនាវាចម្បាំង Varyag បានមកដល់ និងចូលចត នៅទីក្រុងកំពង់ផែ Qingdao របស់ប្រទេសចិន មុនពេលធ្វើសមយុទ្ធយោធា Joint Sea-2026 រួមគ្នា។

សេចក្តីថ្លែងការណ៍ ដែលចុះផ្សាយដោយទីភ្នាក់ងារសារព័ត៌មានរុស្ស៊ី បានរៀបរាប់ថា សមយុទ្ធនេះ នឹងរួមបញ្ចូលប្រតិបត្តិការជួយសង្គ្រោះរួមគ្នា, បេសកកម្មសង្គ្រាម ប្រឆាំងនាវាមុជទឹក និងការពារដែនអាកាស ក៏ដូចជា សមយុទ្ធកាំភ្លើងធំផងដែរ។

ថ្លែងអំឡុងពិធីមួយ នៅក្នុងទីក្រុង Qingdao, ឧត្តមនាវីឯក រុស្ស៊ី លោក Sergei Sinko បានមានប្រសាសន៍ថា សមយុទ្ធ Joint Sea-2026 មានគោលបំណងពង្រឹងភាពជាដៃគូយុទ្ធសាស្ត្រ រវាងប្រទេសទាំងពីរ ព្រមទាំង ធានាសន្តិភាព និងស្ថិរភាព នៅក្នុងតំបន់ នេះបើយោងតាមទីភ្នាក់ងារសារព័ត៌មាន TASS៕

ប្រភព ៖ AFP ប្រែសម្រួល ៖ សារ៉ាត