ប្រទេសបារាំងចាត់ទុកកម្ពុជាមិនមែនត្រឹមតែជាទីផ្សារមួយទេ ប៉ុន្តែជាដៃគូរយៈពេលវែងដ៏គួរឱ្យទុកចិត្ត ហើយភាពជោគជ័យរបស់កម្ពុជា ក៏ជាផលប្រយោជន៍របស់បារាំងផងដែរ។ នេះជាការគូសបញ្ជាក់របស់ឯក​ឧត្តម នីកូឡា ហ្វ័ររីស្យេ ​(Nicolas Forissier) រដ្ឋមន្ត្រីប្រតិភូអមរដ្ឋមន្ត្រីក្រសួងអឺរ៉ុប និងការបរទេស​បារាំង ទទួលបន្ទុកពាណិជ្ជកម្មបរ​ទេស និងការទា​ក់​ទាញ​វិនិយោគ ក្នុងដំណើរទស្សនកិច្ចមកកម្ពុជា។
 
ក្នុងអត្ថបទចុះផ្សាយដោយសារព័ត៌មានក្នុងស្រុកមួយ និងផ្សព្វផ្សាយបន្តដោយស្ថានទូតបារាំងប្រ​ចាំកម្ពុជានៅថ្ងៃទី០៩ ខែកក្កដានេះ ឯក​ឧត្តម នីកូឡា ហ្វ័ររីស្យេ បានបញ្ជាក់ថា បារាំង និងកម្ពុជា កំពុងឈានចូលដំណាក់កាលថ្មីនៃកិច្ចសហប្រតិបត្តិការសេដ្ឋកិច្ច ដោយផ្អែកលើទំនុកចិត្ត និងការវិនិយោគរយៈពេលវែង ដើម្បីកសាងភាពជាដៃគូសម្រាប់ទសវត្សរ៍ខាងមុខ។ ឯកឧត្តមចង់ឲ្យប្រទេសទាំងពីររួមគ្នាកសាងទំនាក់ទំនងសេដ្ឋកិច្ចមួយ ដែលមានភាពច្នៃប្រឌិត និរន្តរភាព និងប្រកបដោយមហិច្ឆតាជាងមុន។
 
យោងតាមរដ្ឋមន្ត្រីប្រតិភូ​បារាំងរូបនេះ បច្ចុប្បន្ន វត្តមានសេដ្ឋកិច្ចរបស់បារាំងនៅកម្ពុជាមានលក្ខណៈរឹងមាំរួចហើយ តាមរយៈក្រុមហ៊ុន សហគ្រាសបារាំងយ៉ាងហោចណាស់ ២០០ ក្នុងនោះក៏មានអាជីវកម្ម ដែលបង្កើតឡើងដោយពលរដ្ឋបារាំងរស់នៅកម្ពុជាផងដែរ។
 
​ឯកឧត្តម Nicolas Forissier បានបញ្ជាក់ថា ពាណិជ្ជកម្មទ្វេភាគីរវាងប្រទេសទាំងពីរបានកើនឡើងដល់ ១ពាន់ ៧៥០លានអឺរ៉ូ ក្នុងឆ្នាំ២០២៥ គឺកើនឡើង ១៧,៥ភាគរយ បើធៀបនឹងឆ្នាំកន្លងទៅ។ ប៉ុន្តែការថយចុះនៃទំហំពាណិជ្ជកម្មនាពេលថ្មីៗនេះបង្ហាញថា ប្រទេសទាំងពីរត្រូវបន្តជំរុញកិច្ចសហប្រតិបត្តិការវិនិយោគ ជាពិសេសលើវិស័យហេដ្ឋារចនាសម្ព័ន្ធ។
 
ឯកឧត្តម នីកូឡា ហ្វ័ររីស្យេ (​Nicolas Forissier) រដ្ឋមន្ត្រីប្រតិភូអមរដ្ឋមន្ត្រីក្រសួងអឺរ៉ុប និងការបរទេស ទទួលបន្ទុកពាណិជ្ជកម្មបរទេស និងការទាក់ទាញវិនិយោគ មកបំពេញទស្សនកិច្ចនៅកម្ពុជា នៅថ្ងៃទី៩ និងទី១០ ខែកក្កដា ឆ្នាំ២០២៦ ក្នុងគោលបំណងពង្រឹងទំនាក់ទំនងសេដ្ឋកិច្ចរវាងបារាំង និងកម្ពុជា ព្រមទាំងបង្កើនការវិនិយោគរបស់បារាំងនៅកម្ពុជា។ ដំណើរទស្សនកិច្ចនេះក៏ជាផ្នែកមួយនៃការត្រៀមលក្ខណៈសម្រាប់ដំណើរទស្សនកិច្ចផ្លូវរដ្ឋរបស់លោកប្រធានាធិបតីបារាំង អេម៉ានុយអ៊ែល ម៉ាក្រុង នៅកម្ពុជា ក្នុងខែវិច្ឆិកាខាងមុខនេះផងដែរ៕

សេង បារាំង AMS