ភ្នំពេញ៖ប្រធានរដ្ឋសភានៃកម្ពុជា បានក្រើនរំលឹកដល់មន្ត្រីរាជការជាថ្នាក់ដឹកនាំ និងថ្នាក់គ្រប់គ្រង ត្រូវប្រកាន់ខ្ជាប់នូវ លក្ខណៈ សម្បត្តិជាមន្ត្រីល្អ តម្កល់ខ្លួនជាខ្ញុំបម្រើរាស្ត្រ និងលុបបំបាត់ «ជំងឺតួឯក» ដើម្បីអភិវឌ្ឍខ្លួនឱ្យក្លាយជាមន្ត្រីឆ្នើម។

កាលពីព្រឹកថ្ងៃទី១៦ ខែកក្កដា ឆ្នាំ២០២៦ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានទទួលជួប​សំណេះសំណាល និងផ្តល់អនុសាសន៍ជូនដល់សិក្ខាកាមនៃសាលាភូមិន្ទរដ្ឋបាល ក្នុងវគ្គបណ្តុះបណ្តាលជំនាន់ទី៨ ស្ដីអំពី «ភាពជា​អ្នកដឹកនាំ និងនវានុវត្តន៍» នៅវិមានរដ្ឋសភា។ វគ្គបណ្តុះបណ្តាលដែលមានរយៈពេល ៨សប្តាហ៍នេះ មានសិក្ខាកាមចូល​រួមចំនួន ១៧៩នាក់ ដែលជាថ្នាក់ដឹកនាំ និងថ្នាក់គ្រប់គ្រងនៅតាមក្រសួងស្ថាប័ន ទាំងថ្នាក់ជាតិ និងថ្នាក់ក្រោមជាតិ។

ក្នុងឱកាសនេះសម្តេចរដ្ឋសភាធិបតី ឃួន សុដារី បានផ្តល់អនុសាសន៍ឱ្យសិក្ខាកាមទាំងអស់យកទស្សនៈដឹកនាំរបស់ សម្តេច​តេជោ ហ៊ុន សែន មកអនុវត្ត ដោយត្រូវចងចាំថា «មន្ត្រីត្រូវបម្រើរាស្រ្ត មិនមែនជាចៅហ្វាយរបស់រាស្រ្តនោះឡើយ»។ មន្ត្រីល្អ ត្រូវតម្កល់ខ្លួនជាខ្ញុំបម្រើរាស្ត្រ មិនត្រូវធ្វើជាមន្ត្រីជើង ១០ ឡើយ ពោលគឺត្រូវធ្វើជាមន្ត្រីជើង ២ និងត្រូវលុបបំបាត់ «ជំងឺតួឯក» ចេញពីខ្លួន។

ទាក់ទិននឹងស្ថានភាពសេដ្ឋកិច្ចវិញ សម្តេចប្រធានរដ្ឋសភា បានលើកឡើងថា ទោះបីជាឆ្នាំ២០២៦ នេះ អត្រាកំណើនសេដ្ឋកិច្ច​កម្ពុជាស្ថិតក្នុងរង្វង់ ៤,២% ដោយសារឥទ្ធិពលសង្គ្រាមនៅមជ្ឈិមបូព៌ាធ្វើឱ្យប្រេងឡើងថ្លៃក្តី ប៉ុន្តែក្នុងរយៈពេលមធ្យមពី​ឆ្នាំ​២០២៧ ដល់ឆ្នាំ២០២៩ ខាងមុខ សេដ្ឋកិច្ចជាតិនឹងងើបឡើងវិញជាសន្សឹមៗ ក្នុងអត្រាចន្លោះពី ៥% ទៅ ៥,៥%។ ការងើប​ឡើងវិញនេះ គឺដោយសារកំណើនរឹងមាំនៃវិស័យឧស្សាហកម្ម កសិកម្ម និងការងើបឡើងនៃវិស័យទេសចរណ៍ ក្រោយពី​រាជរដ្ឋា​ភិបាលទទួលបានជោគជ័យ ក្នុងការបោសសម្អាតបទល្មើសឆបោកតាមប្រព័ន្ធបច្ចេកវិទ្យា ដែលបានជួយស្តារទំនុកចិត្ត​របស់ភ្ញៀវ​ទេសចរ និងវិនិយោគិនឡើងវិញ។

សម្តេចប្រធានរដ្ឋសភា ក៏បានសង្កត់ធ្ងន់ពីសារៈសំខាន់នៃការលើកកម្ពស់សមភាពយេនឌ័រ ដោយការបង្កើនតួនាទីដឹកនាំរបស់ស្ត្រី ព្រោះគំនិតចម្រុះរបស់ស្ត្រី អាចជួយឱ្យស្ថាប័នមើលឃើញពីចំណុចខ្វះខាតបានកាន់តែច្បាស់ ក្នុងការរៀបចំគោលនយោបាយ​ប្រកបដោយមនុស្សធម៌ និងមាននិរន្តរភាព ៕
ដោយ៖ស៊ូ វណ្ណលុក
រូបភាព៖ហេង សម្បត្តិ