កម្ពុជាបានក្លាយជាសមាជិកស្ថាបនិកនៃអង្គការសហប្រតិបត្តិការបញ្ញាសិប្បនិម្មិតពិភពលោក ហៅកាត់ថា វ៉ៃកូ (WAICO) បន្ទាប់ពីឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានចុះហត្ថលេខាលើកិច្ចព្រមព្រៀងបង្កើតអង្គការនេះ។

ដោយមានការអនុញ្ញាតពីរាជរដ្ឋាភិបាល ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានអញ្ជើញតំណាងព្រះរាជាណាចក្រកម្ពុជា ក្នុងការចុះហត្ថលេខាលើកិច្ចព្រមព្រៀងស្តីពីការបង្កើត អង្គការសហប្រតិបត្តិការបញ្ញាសិប្បនិម្មិតពិភពលោក ឬ ហៅកាត់ថា វ៉ៃកូ (WAICO)

ពិធីចុះហត្ថលេខា បានប្រព្រឹត្តទៅកាលពីថ្ងៃទី១៦ ខែកក្កដា ឆ្នាំ២០២៦ នៅទីក្រុងសៀងហៃ ប្រទេសចិន ដោយមានប្រទេសចំនួន ២៩ ចូលរួមជាសមាជិកស្ថាបនិក ក្នុងនោះមានប្រទេសនៅអាស៊ីចំនួន១២ ប្រទេសនៅអាព្រិកចំនួន១០ និងប្រទេសផ្សេងៗទៀតដូចជា រុស្ស៊ី បេឡារុស ស៊ែប៊ី គុយបា ប្រេស៊ីល និងវ៉េណេស៊ុយអេឡា។ តំណាងអង្គការអន្តរជាតិជាច្រើន រួមទាំងអគ្គលេខាធិការអង្គការសហប្រជាជាតិ លោក Antonio Guterres ក៏មានវត្តមានក្នុងពិធីនោះផងដែរ។

យោងតាមសេចក្តីប្រកាសរបស់ក្រសួងប្រៃសណីយ៍ និងទូរគមនាគមន៍ អង្គការ WAICO ត្រូវបានបង្កើតឡើងក្នុងគោលបំណងជំរុញការសហប្រតិបត្តិការអន្តរជាតិលើវិស័យបញ្ញាសិប្បនិម្មិត (AI) ដោយផ្តោតលើការលើកកម្ពស់នវានុវត្តន៍ ការអភិវឌ្ឍ ការដាក់ឱ្យប្រើប្រាស់ និងការអនុវត្តបច្ចេកវិទ្យា AI សម្រាប់ការអភិវឌ្ឍប្រកបដោយចីរភាព និងផលប្រយោជន៍រួមរបស់មនុស្សជាតិ។ អង្គការនេះក៏មានគោលដៅកាត់បន្ថយគម្លាតបច្ចេកវិទ្យា AI រវាងប្រទេសនានា និងរួមគ្នាដោះស្រាយហានិភ័យ និងបញ្ហាប្រឈមដែលអាចកើតមានពីការអភិវឌ្ឍបញ្ញាសិប្បនិម្មិតផងដែរ។

ការបង្កើតអង្គការ វៃកូ គឺជាគំនិតផ្តួចផ្តើមស្នើឡើងដោយប្រទេសចិននៅឆ្នាំ២០២៥។ ទីស្នាក់ការកណ្តាលរបស់អង្គការនេះ មានទីតាំងនៅទីក្រុងសៀងហៃ ប្រទេសចិន។

ការចូលរួមរបស់កម្ពុជាក្នុងអង្គការថ្មីនេះ គឺជាជំហានសំខាន់មួយក្នុងការពង្រឹងកិច្ចសហប្រតិបត្តិការអន្តរជាតិលើវិស័យបញ្ញាសិប្បនិម្មិត ស្របពេលដែលរាជរដ្ឋាភិបាលកំពុងជំរុញការធ្វើបរិវត្តកម្មឌីជីថល និងការប្រើប្រាស់ AI ដើម្បីគាំទ្រការអភិវឌ្ឍសេដ្ឋកិច្ច សង្គម និងសេវាសាធារណៈរបស់ប្រទេសជាតិ៕

ដោយ៖ ង៉ាន់ ទិត្យ