ពោធិ៍សាត់៖ មន្ទីរព័ត៌មានខេត្តពោធិ៍សាត់និងរដ្ឋបាលខេត្ត បានរៀបចំពិធីផ្សព្វផ្សាយយុទ្ធនាការ «និយាយថាទេ ចំពោះព័ត៌មានក្លែងក្លាយ» ជំហានទី២ ដល់សិស្សានុសិស្សានៃអនុវិទ្យាល័យ និងវិទ្យាល័យព្រះម្លូរ ស្ថិតនៅស្រុកបាកាន ជិត ១,០០០នាក់កាលពីព្រឹកថ្ងៃទី១៧ ខែកក្កដា ឆ្នាំ២០២៦។យុទ្ធនាការនេះធ្វើឡើងក្នុងគោលបំណងពង្រឹងសមត្ថភាពយល់ដឹង និងកសាងភាពស៊ាំដល់យុវជនចំពោះការវាយលុកនៃព័ត៌មានមិនពិតក្នុងយុគសម័យឌីជីថល។

ពិធីនេះប្រារព្ធឡើងក្រោមអធិបតីភាព ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន តំណាងឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាននិង លោក ញឹក បានខេង អភិបាលរងខេត្តពោធិ៍សាត់ ឯកឧត្តម ខូយ រីដា អភិបាលខេត្ត។

ក្នុងឱកាសនោះ ឯកឧត្តម ទេព អស្នារិទ្ធ បានគូសរំលេចថា ព័ត៌មានក្លែងក្លាយជាហានិភ័យធ្ងន់ធ្ងរដែលបំភាន់ការយល់ឃើញរបស់យុវជន និងប៉ះពាល់ដល់សន្តិសុខជាតិ។ ឯកឧត្តមបានណែនាំឱ្យសិស្សានុសិស្សចេះរក្សាភាពវៃឆ្លាត និងសួរសំណួរ ៣ គន្លឹះចំពោះខ្លួនឯងមុននឹងសម្រេចចិត្ត «ចែករំលែក (Share)» ព័ត៌មានណាមួយដូចជា ១. តើព័ត៌មាននេះមកពីណា?
២. តើមានប្រភពផ្លូវការច្បាស់លាស់ដែរឬទេ?
៣. តើវាផ្តល់ផលប្រយោជន៍ ឬបង្កផលប៉ះពាល់អ្វីខ្លះដល់សង្គម?
ឯកឧត្តមសង្ឃឹមយ៉ាងមុតមាំថា សិស្សានុសិស្សនឹងក្លាយជា «ទូតសុឆន្ទៈ» ក្នុងការនាំយកព័ត៌មានពិតទៅកាន់ក្រុមគ្រួសារ និងសហគមន៍ ដើម្បីរួមគ្នាកសាងសង្គមឌីជីថលដែលមានសុវត្ថិភាព។

លោក ញឹក បានខេង អភិបាលរងខេត្ត រួមជាមួយតំណាងមន្ទីរអប់រំ យុវជន និងកីឡាខេត្ត បានប្រកាសគាំទ្រយ៉ាងពេញទំហឹងចំពោះយុទ្ធនាការនេះ និងបានប្តេជ្ញាចិត្តចូលរួមផ្សព្វផ្សាយឱ្យកាន់តែទូលំទូលាយ ដើម្បីលើកកម្ពស់ការយល់ដឹងពីវិធីការពារខ្លួនពីការបំភាន់ និងរួមគ្នារក្សាសន្តិសុខ សណ្តាប់ធ្នាប់សាធារណៈ ដើម្បីការអភិវឌ្ឍខេត្តប្រកបដោយចីរភាព។
សូមជម្រាបថា យុទ្ធនាការ «និយាយថាទេ ចំពោះព័ត៌មានក្លែងក្លាយ» ជំហានទី២ក្រោមប្រធានបទ៖ «ពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយដើម្បីសុវត្ថិភាពព័ត៌មាន»។យុទ្ធនាការបានដាក់ឱ្យដំណើរការផ្លូវការកាលពីថ្ងៃទី១៨ ខែឧសភា ឆ្នាំ២០២៦ នៅវិទ្យាល័យសម្តេចហ៊ុនសែន ប៊ុន រ៉ានី វត្តភ្នំ រាជធានីភ្នំពេញ។បច្ចុប្បន្នកំពុងអនុវត្តនៅតាមគ្រឹះស្ថានសិក្សាក្នុងរាជធានី-ខេត្តចំនួន ១២ រួមមាន៖ ភ្នំពេញ, ព្រះវិហារ, តាកែវ, កំពង់ស្ពឺ, សៀមរាប, កំពង់ចាម, កំពង់ធំ, ពោធិ៍សាត់, កំពត, កែប, កោះកុង និងបាត់ដំបង និងមានផែនការបន្តពង្រីកទៅគ្រប់ខេត្តទាំងអស់ទូទាំងប្រទេសក្នុងឆ្នាំ២០២៦ នេះ៕
ដោយ៖ង៉ាន ទិត្យ