អ៊ីស្លាម៉ាបាដ ៖ ប្រទេសប៉ាគីស្ថាននៅថ្ងៃពុធនេះបានស្នើសុំជំនួយហិរញ្ញវត្ថុចំនួន ១០ ពាន់លានដុល្លារពីសហរដ្ឋអាមេរិក ក្រោយពេលដែលទីក្រុងអ៊ីស្លាម៉ាបាដបានដើរតួនាទី ជួយសម្របសម្រួលបន្ធូរបន្ថយភាពតានតឹងជុំវិញជម្លោះរវាងទីក្រុងវ៉ាស៊ីនតោន និងអ៊ីរ៉ង់ ។

បើតាម First Post, ប៉ាគីស្ថានបានទាក់ទងទៅកាន់រដ្ឋមន្ត្រីហិរញ្ញវត្ថុអាមេរិក លោក Scott Bessent ដើម្បីស្នើសុំកញ្ចប់ជំនួយគាំទ្រស្ថិរភាពចំនួន ១០ ពាន់លានដុល្លារនេះកាលពីថ្ងៃអង្គារ ជាមួយនឹងរយៈពេលកំណត់រហូតដល់ ៥ ឆ្នាំ ។

ដំណឹងនៃការទារថ្លៃជួយសម្របសម្រួលនេះត្រូវបានលេចឮឡើង ក្រោយពេលដែលរដ្ឋមន្ត្រីហិរញ្ញវត្ថុប៉ាគីស្ថាន លោក Muhammad Aurangzeb ទើបបានជួបជាមួយលោក Scott Bessent នៅទីក្រុងវ៉ាស៊ីនតោន កាលពីថ្ងៃអង្គារ ។
 
ក្រោយជំនួបនេះ ក្រសួងហិរញ្ញវត្ថុប៉ាគីស្ថានបានឲ្យដឹងថា លោក Aurangzeb បានស្នើសុំកញ្ចប់ជំនួយចំនួន ១០ ពាន់លានដុល្លារ និងការគាំទ្របន្ថែមទៀតពីសហរដ្ឋអាមេរិក ដើម្បីឱ្យប៉ាគីស្ថានអាចចូលទៅកាន់ទីផ្សារមូលធនអន្តរជាតិ, បង្កើនទុនបម្រុងរូបិយប័ណ្ណបរទេស និងធ្វើឱ្យប្រសើរឡើងនូវចំណាត់ថ្នាក់ឥណទានជាតិរបស់ខ្លួន ។

ប្រទេសប៉ាគីស្ថានបានជួយសម្របសម្រួលឲ្យអាមេរិក និងអ៊ីរ៉ង់ បានចុះហត្ថលេខា លើអនុស្សរណៈនៃការយោគយល់គ្នា ឬ MoU បញ្ចប់សង្គ្រាមបណ្ដោះអាសន្នកាលពីខែមិថុនា ។

យ៉ាងណាមិញ បើទោះបីជាមាន MoU នេះក៏ដោយ ប៉ុន្តែគូជម្លោះទាំងពីរ បានចាប់ផ្តើមវាយប្រហារគ្នាទៅវិញទៅមកយ៉ាងខ្លាំងក្លាឡើងវិញ ជាពិសេសនៅរយៈពេលប៉ុន្មានថ្ងៃចុងក្រោយនេះ ៕

ប្រភព ៖ Reuters_firstpost , ប្រែសម្រួល ៖ សារ៉ាត