ប៊ែរឡាំង ៖ រដ្ឋាភិបាលអាល្លឺម៉ង់ កាលពីថ្ងៃ ពុធ បានបដិសេធយ៉ាងដាច់អហង្ការចំពោះការចោទប្រកាន់របស់រុស្ស៊ីថា ប្រទេសខ្លួនកំពុងលួចលាក់ធ្វើការស្រាវជ្រាវ និងអភិវឌ្ឍអាវុធនុយក្លេអ៊ែរដោយសម្ងាត់ ។

ការបញ្ចេញប្រតិកម្មរបស់អាល្លឺម៉ង់ កើតឡើងបន្ទាប់ពីក្រុមចារកម្មរុស្ស៊ីបានផ្សព្វផ្សាយរបាយការណ៍តាមរយៈកម្មវិធីបណ្តាញសង្គម ដោយចោទប្រកាន់ចំៗថា ទីក្រុងប៊ែរឡាំងកំពុងលួចលាក់ធ្វើការស្រាវជ្រាវ និងអភិវឌ្ឍអាវុធនុយក្លេអ៊ែរ ។

ជាការឆ្លើយតប អ្នកនាំពាក្យរងរដ្ឋាភិបាលអាល្លឺម៉ង់ លោក Steffen Meyer បានថ្លែងអះអាងក្នុងសន្និសីទសារព័ត៌មានថា ការផ្សព្វផ្សាយព័ត៌មានមិនពិតនេះ ធ្វើឡើងក្នុងគោលបំណងធំៗចំនួន៣ ។

លោកថា ទីមួយ គឺព្យាយាមបង្កើតភាពច្របូកច្របល់រវាងអង្គការណាតូ និងសហភាពអឺរ៉ុប និងទីពីរ គឺព្យាយាមបង្ខូចកេរ្តិ៍ឈ្មោះអាល្លឺម៉ង់ ដែលជាអ្នកគាំទ្រខ្លាំងបំផុតរបស់អ៊ុយក្រែន ។

ហើយចុងក្រោយ គឺព្យាយាមបង្កើតការភ័យខ្លាចដល់ប្រជាជន អំពីការប្រកួតប្រជែងសព្វាវុធនុយក្លេអ៊ែរថ្មី និងដើម្បីទាញចំណេញផ្នែកនយោបាយ មុនការបោះឆ្នោតតំបន់នៅអាល្លឺម៉ង់មកដល់ ។

ជាមួយគ្នានេះ មន្ត្រីការពារជាតិប្រកាសអះអាងជាថ្មីថា អាល្លឺម៉ង់មិនមានបំណង ឬផែនការស្វែងរកការអភិវឌ្ឍអាវុធនុយក្លេអ៊ែរផ្ទាល់ឡើយ ។

គួរបញ្ជាក់ថា អាល្លឺម៉ង់មិនមានអាវុធនុយក្លេអ៊ែរផ្ទាល់ខ្លួនទេ ប៉ុន្តែប្រទេសអឺរ៉ុបនេះស្ថិតក្នុងកម្មវិធីរួមគ្នារបស់ណាតូ ដែលអនុញ្ញាតឱ្យរក្សាទុកគ្រាប់បែកនុយក្លេអ៊ែរយុទ្ធសាស្ត្ររបស់អាមេរិកនៅលើទឹកដីខ្លួន ប៉ុន្តែគ្រាប់បែកទាំងនោះស្ថិតក្រោមការគ្រប់គ្រងទាំងស្រុងរបស់សហរដ្ឋអាមេរិក ៕

ប្រភព ៖ Anadolu ប្រែសម្រួល ៖ ឈឹម ទីណា