ភ្នំពេញ៖សកម្មភាពបានប្តូរទិស បន្ទាប់ពីបានបញ្ចប់បេសកកម្មជិះកង់ជុំវិញពិភពលោកដើម្បីមនុស្សធម៌ប្រកបដោយជោគជ័យ លោក ទីវ តារារិទ្ធ ទូតសុឆន្ទៈទេសចរណ៍កម្ពុជាបានប្រកាសពីគម្រោងថ្មីមួយទៀត គឺការធ្វើដំណើររយៈពេល ៦ខែ ជុំវិញប្រទេសកម្ពុជា ដើម្បីផ្សព្វផ្សាយពីតំបន់ទេសចរណ៍ធម្មជាតិដ៏ស្រស់ស្អាតរបស់ខ្មែរទៅកាន់ពិភពលោក។

ក្នុងសន្និសីទសារព័ត៌មានបិទបញ្ចប់បេសកកម្មជិះកង់ឆ្លងប្រទេស និងទ្វីបកាលពីរសៀលថ្ងៃទី២៧ ខែកក្កដា ឆ្នាំ២០២៦ ដោយមានវត្តមានឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ,តំណាងវិស័យឯកជន ព្រមទាំងតំណាងមូលនិធិគន្ធបុប្ផា និងតំណាងមន្ទីរពេទ្យកុមារអង្គរចូលរួមផងលោក ទីវ តារារិទ្ធ បានឱ្យដឹងថា លោកបានជួបពិភាក្សាជាមួយក្រសួងទេសចរណ៍ រួចរាល់ហើយលើគម្រោងថ្មីនេះ ដោយលោកនឹងចំណាយពេល ៦ខែ ធ្វើដំណើរសារជាថ្មី តាមរយៈការជិះកង់ និងជិះម៉ូតូ ដើម្បីផ្តិតយករូបភាព និងទេសភាពធម្ម​ជាតិដ៏អស្ចារ្យ មកបង្ហាញពិភពលោក។

ទន្ទឹមនឹងការប្រូម៉ូតតំបន់ទេសចរណ៍ លោកក៏នឹងចូលរួមផ្សព្វផ្សាយពីសារៈសំខាន់នៃការថែរក្សាបរិស្ថាន និងការអភិរក្សធនធាន​ធម្មជាតិ ដើម្បីធានានូវនិរន្តរភាពនៃវិស័យទេសចរណ៍សម្រាប់មនុស្សជំនាន់ក្រោយផងដែរ។

ក្នុងឱកាសនោះ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានកោតសរសើរលោក ទីវ តារារិទ្ធ ដែលបានប្រែក្លាយកង់មួយ​គ្រឿងទៅជាយាននៃក្តីសង្ឃឹម និងប្រែក្លាយឆន្ទៈបុគ្គលទៅជាមោទនភាពរបស់ប្រជាជាតិទាំងមូល។

ឯកឧត្តមរដ្ឋមន្ត្រី បានប្រាប់ទៅលោក ទីវ តារារិទ្ធ ថា ក្រសួងព័ត៌មាននឹងបន្តគាំទ្រ និងលើកទឹកចិត្តដល់គំនិតផ្តួចផ្តើម និង​បេសកកម្ម​មនុស្សធម៌នានា ដែលរួមចំណែកកសាងសង្គមកម្ពុជាឱ្យកាន់តែរឹងមាំប្រកបដោយមេត្តាធម៌ សាមគ្គីភាព និងការទទួលខុសត្រូវចំពោះគ្នាទៅវិញទៅមក ។

គួរបញ្ជាក់ថា លោក ទីវ តារារិទ្ធ ត្រូវបានក្រសួងទេសចរណ៍បានផ្តល់ជូនលោកជាទូតសុឆន្ទៈទេសចរណ៍កម្ពុជា ផងដែរ៕

អត្ថបទ៖ ង៉ាន់ ទិត្យ
រូបភាព៖ រិន រចនា