វ៉ាស៊ីនតោន ៖ កងទ័ពជើងទឹកអាមេរិក បានចុះកិច្ចសន្យាតម្លៃ ១០៧,២ លានដុល្លារ ជាមួយក្រុមហ៊ុន Sikorsky Aircraft Corp ដែលជាបុត្រសម្ព័ន្ធរបស់ក្រុមហ៊ុន Lockheed Martin ដើម្បីរចនា និងផលិតស្លាបចក្រមេថ្មី សម្រាប់ឧទ្ធម្ភាគចក្រដឹកប្រធានាធិបតីប្រភេទ VH-92A ដែលស្គាល់ជាទូទៅថា “Marine One” ។
 
កិច្ចសន្យានេះ មានគោលបំណងរចនា ផលិត និងសាកល្បងស្លាបចក្រវិលមេជំនាន់ថ្មី ឬ Rotor Blades ស្ថិតក្រោមគម្រោងបង្កើនថាមពលហោះហើរ និងពង្រីកសមត្ថភាពបំពេញការងាររបស់ឧទ្ធម្ភាគចក្រ Marine One នៅគ្រប់លក្ខខណ្ឌអាកាសធាតុ ។
 
បើតាម Navy mil, ឧទ្ធម្ភាគចក្រ VH-92A មានសមត្ថភាពហោះហើរក្នុងចម្ងាយចន្លោះពី ៩០០ ទៅ ១,០០០ គីឡូម៉ែត្រ ជាមួយនឹងកម្លាំងល្បឿនលឿនបំផុតប្រហែល ៣០៦ គីឡូម៉ែត្រក្នុងមួយម៉ោង ។
 
ឧទ្ធម្ភាគចក្រ VH-92A មានដងខ្លួនប្រវែង ២១ ម៉ែត្រ កម្ពស់ ៥.៥ ម៉ែត្រ និងទម្ងន់ប្រហែល ១២,០០០ គីឡូក្រាម ។ វាត្រូវបានរចនាឡើងបំពាក់ដោយបច្ចេកវិទ្យាទំនើបៗ រួមមានប្រព័ន្ធការពារប្រឆាំងគ្រាប់មីស៊ីល បច្ចេកវិទ្យារំខានប្រព័ន្ធរ៉ាដា និងស្រោបពាសដែកការពារគ្រឿងផ្ទុះ ។
 
អ្វីដែលសំខាន់នោះ វាមានបំពាក់ដោយប្រព័ន្ធទាក់ទងបេសកកម្មដ៏ទំនើប ដែលអនុញ្ញាតឱ្យប្រធានាធិបតីអាចបញ្ជាការងារជាតិ និងទាក់ទងខ្សែបណ្តាញសម្ងាត់បានភ្លាមៗ​ទាំងជិត និងឆ្ងាយទូទាំងពិភពលោក ។
 
យោងតាម defence-blog, នៅក្រោមកិច្ចព្រមព្រៀងតម្លៃ ១០៧,២ លានដុល្លារ ក្រុមហ៊ុន Sikorsky មានរយៈពេល ៥ឆ្នាំ ពោលគឺនៅឆ្នាំ ២០៣១ ដើម្បីបញ្ចប់គម្រោងធ្វើទំនើបកម្មស្លាបចក្រមេជំនាន់ថ្មីរបស់ឧទ្ធម្ភាគចក្រដឹកប្រធានាធិបតី Marine One ៕

 
ប្រភព ៖ defence-blog និង Navy mil ប្រែសម្រួល ៖ ឈឹម ទីណា