បរទេស៖ រាជទាយាទប្រទេសអារ៉ាប៊ីសាអូឌីតព្រះអង្គម្ចាស់ Mohammed bin Salman បានព្រមានប្រធានាធិបតីអាមេរិក លោក Donald Trump កុំឱ្យចាប់ផ្តើមប្រតិបត្តិការយោធាទ្រង់ទ្រាយធំ ប្រឆាំងនឹងប្រទេសអ៊ីរ៉ង់ឡើងវិញ ។

ថ្លែងក្នុងកិច្ចសន្ទនាតាមទូរស័ព្ទជាមួយលោក Trump កាលពីថ្ងៃអាទិត្យ, ព្រះអង្គម្ចាស់ bin Salman មានព្រះរាជបន្ទូលថា ការវាយប្រហារលើអ៊ីរ៉ង់សាជាថ្មី នឹងបង្កផលប៉ះពាល់អវិជ្ជមាន ដល់សេដ្ឋកិច្ចពិភពលោក ។

ព្រះអង្គម្ចាស់មានព្រះរាជបន្ទូលថា ការកើនឡើងនៃភាពតានតឹងបន្ថែមទៀតអាចបង្កការខូចខាតយ៉ាងធ្ងន់ធ្ងរដល់សេដ្ឋកិច្ចពិភពលោក ហើយការវាយប្រហារឈុតធំទាំងនេះ មិនអាចសម្រេចបាននូវគោលដៅដែលបានគ្រោងទុកនោះឡើយ ។

បើតាមទីភ្នាក់ងារព័ត៌មាន AP, កិច្ចសន្ទនានោះគឺជាកត្តាមួយ ដែលនាំឱ្យលោក Trump សម្រេចចិត្តចាប់ផ្តើមការចរចាអំពីបទឈប់បាញ់ជាមួយអ៊ីរ៉ង់ឡើងវិញ។

ជាក់ស្ដែង លោក Trump បានលើកឡើងកាលពីថ្ងៃអាទិត្យថា សហរដ្ឋអាមេរិក និងអ៊ីរ៉ង់ បានបើកកិច្ចចរចាស្ដីពីកិច្ចព្រមព្រៀងសន្តិភាពឡើងវិញនៅថ្ងៃទី៣ ខែសីហានេះ បន្ទាប់ពីលោកបានយល់ព្រមលុបចោលការវាយប្រហារដ៏ខ្លាំងក្លាមួយ ទៅលើប្រទេសអ៊ីរ៉ង់ ដើម្បីឈានទៅរកកិច្ចព្រមព្រៀងបទឈប់បាញ់យូរអង្វែង ។

បើតាមលោក Trump, ប្រទេសអ៊ីរ៉ង់ និងប្រទេសដទៃទៀតនៅមជ្ឈិមបូព៌ា បានស្នើសុំឱ្យទីក្រុងវ៉ាស៊ីនតោនបញ្ចៀសការវាយប្រហារ ដោយសារតែលក្ខខណ្ឌនៃកិច្ចព្រមព្រៀងត្រូវបានឯកភាពគ្នាហើយ ។

លោក Trump បន្ថែមថា ការឯកភាពគ្នានេះនឹងរួមបញ្ចូលទាំងការបើកច្រកសមុទ្រ Hormuz ពេញលេញឡើងវិញ និងព្រមទាំង បញ្ចប់ការគំរាមកំហែងផ្នែកនុយក្លេអ៊ែរ របស់អ៊ីរ៉ង់ ផងដែរ ៕

ប្រភព ៖ Tass ប្រែសម្រួល ៖ សារ៉ាត