ហ៊្សេរុយសាឡឹម ៖ ប្រទេសអ៊ីស្រាអែលមានផែនការផលិតយន្តហោះចម្បាំងគ្មានមនុស្សបើកផ្ទាល់ខ្លួន ដែលមានសមត្ថភាពខ្លាំង និងបំពាក់បច្ចេកវិទ្យាទំនើបបំផុត មិនចាញ់យន្តហោះចម្បាំងបំបាំងកាយ F-35 របស់សហរដ្ឋអាមេរិកនោះទេ ។

បើតាម Straits Times, គំនិតផ្តួចផ្តើមនេះកើតឡើង បន្ទាប់ពីអាមេរិកកំពុងកើនឡើងសម្ពាធនយោបាយផ្ទៃក្នុង ដែលធ្វើឱ្យការលក់អាវុធដល់អ៊ីស្រាអែលមានការថយចុះ ជាពិសេសនៅក្រោយកើតមានសង្គ្រាមនៅតំបន់ហ្គាហ្សា និងអ៊ីរ៉ង់ ។

លោក David Rodman អ្នកជំនាញមកពីមជ្ឈមណ្ឌលសិក្សាយុទ្ធសាស្ត្រ Begin-Sadat របស់អ៊ីស្រាអែល និយាយថា ប្រសិនបើនិន្នាការនយោបាយរបស់រដ្ឋាភិបាលទីក្រុងវ៉ាស៊ីនតោន នៅតែបន្តតាមគន្លងបច្ចុប្បន្ន នោះអ៊ីស្រាអែលប្រហែលជាត្រូវបានរារាំង ឬមិនអាចសូម្បីតែទិញយន្តហោះទម្លាក់គ្រាប់បែក ដូចជា F-35 នេះជាដើម ។
 
F-35 គឺជាយន្តហោះចម្បាំងបំបាំងកាយជំនាន់ទី ៥ ដ៏ទំនើបបំផុតរបស់អាមេរិក និងមានតម្លៃជាង ៨០ លានដុល្លារក្នុងមួយគ្រឿង ។

វាអាចហោះហើរក្នុងល្បឿនដល់ទៅជិត ២ ពាន់គីឡូម៉ែត្រក្នុងមួយម៉ោង ជាមួយនឹងចម្ងាយប្រតិបត្តិការបានជាង ២ ពាន់ ២០០ គីឡូម៉ែត្រ ។

យន្តហោះចម្បាំង F-35 អាចពាំគ្រាប់មីស៊ីលបានទាំងក្នុងតួយន្តហោះ និងនៅក្រៅតួយន្តហោះ ជាមួយនឹងការស្រោបដោយបច្ចេកវិទ្យាអាចបង្វែររលកចាប់សញ្ញារ៉ាដារបស់សត្រូវ ឲ្យពិបាកក្នុងការរកឃើញ និងបាញ់ទម្លាក់ ។
 
មន្រ្តីជាន់ខ្ពស់អ៊ីស្រាអែលនិយាយថា ការចង់ផលិតយន្តហោះចម្បាំងគ្មានមនុស្សបើក ដើម្បីមកជំនួសយន្តហោះ F-35 ក៏ដោយសារតែអ៊ីស្រាអែលរៀបចំផែនការកាត់បន្ថយការពឹងផ្អែកលើជំនួយការពារជាតិពីសហរដ្ឋអាមេរិក ក្នុងរយៈពេល ១០ឆ្នាំខាងមុខ ៕

ប្រភព ៖ The Straits Times ប្រែសម្រួល ៖ ឈឹម ទីណា