ការចិញ្ចឹមមាន់ស្រែ ឬនិយាយសាមញ្ញការចិញ្ចឹមមាន់តាមផ្ទះ ជាលក្ខណៈគ្រួសារឬ ខ្នាតមធ្យម គឺជាប្រភពចំណូលដ៏សំខាន់​មួយប្រសិនជាការចិញ្ចឹមនោះអនុវត្តបានត្រឹមត្រូវតាមបច្ចេកទេស។លើសពីការធ្វើពាណិជ្ជកម្ម មុខរបរនេះក៏ជាការធានាស្បៀង​សម្រាប់ គ្រួសារ និងប្រជាពលរដ្ឋក្នុងមូលដ្នាន ពិសេសបង្កើត ការងារនៅ នឹងកន្លែងផងដែរ។

សម្រាប់កសិករដែលធ្វើស្រែចម្ការ ការចិញ្ចឹមមាន់ស្រែ ទោះជា ខ្នាតតូច ឬមធ្យមក្តី ក៏មុខរបរបន្ថែមរបស់កសិករ ។ប៉ុន្តែមុខរបរ នេះអាចរឹងមាំទៅបានអាស្រ័យត្រូវមានចំណេះជំនាញ ដែលអ្នកចិញ្ចឹម ចាំបាច់ត្រូវរៀនសូត្រពីអ្នកបច្ចេកទេស​ផង​ដែរ​ដើម្បីធានា​ថា ការចិញ្ចឹម ទទួលបានជោគជ័យ។

លោក សឹម សៅ កសិកររស់នៅភូមិត្រពាំងថ្លាន់ ឃុំឧត្តមសូរិយា ស្រុកត្រាំកក់ ខេត្តតាកែវ បានចិញ្ចឹមមាន់ស្រែមានរយៈពេល៦- ៧ឆ្នាំមកហើយ។លោកអាចរកចំណូលបានប្រមាណពី ៣០ ទៅជាង ៤០ម៉ឺនរៀលក្នុង១ខែ។

លោក សឹម សៅ និយាយថា មុខរបរនេះតូចតាចទេ ដែលមនុស្សភាគ ច្រើនមើលរំលង ពីព្រោះគិតថា ការចិញ្ចឹមសម្រាប់ធ្វើ​ពាណិជ្ជកម្ម លំបាក​ ពិសេសមាន់ប្រឈមនឹងជំងឺច្រើន។

ប៉ុន្តែសម្រាប់លោក សឹម សៅ បានចែករំលែកបទពិសោធន៍ថា បើយើងចេះបច្ចេកទេសក្នុងការចិញ្ចឹមគឺអាចចៀសផុតពីការបារម្ភ។ការចិញ្ចឹមត្រូវ​ចាក់វាក់សាំងការពារ ​,ចេះរបៀបចិញ្ចឹម ,ចេះរបៀប ព្យាបាលពេលវាឈឺ​។ពិសេសចេះផ្តល់ចំណីដែលចំណាយតិច​នោះ នឹង​ទទួលបានផលត្រឡប់​មកវិញច្រើន។លោកថា ចិញ្ចឹមមាន់ផង ដាំបន្លែ ផង បើបន្លែនៅសល់យកទៅ​ឱ្យមាន់ស៊ីក៏ជួយ​ក្នុងការកាត់បន្ថយ ថ្លៃដើម​ទិញចំណីដែរ។

បច្ចុប្បន្ន លោក ស៊ឹម សៅ ចិញ្ចឹមមាន់ជាង១០០ក្បាល​ និងដាំបន្លែ​បន្ថែម។គួបផ្សំការធ្វើស្រែ ទាំងនេះ ជាប្រភពចំណូលជាលុយកាក់ និងម្ហូបអាហារ។ចំណូលបាន​ជួយដល់ការចំណាយលើការសិក្សា​របស់កូនៗ។

រស់នៅភូមិជាភូមិឃុំជាមួយគ្នា អ្នកស្រី សូត្រ ផល បានចាប់​របរបន្ថែមដូចលោក សឹម សៅ ដែរ។អ្នកស្រី​ចិញ្ចឹមមាន់​ស្រែចំនួន​ជិត៣០០ក្បាលនៅក្រោយផ្ទះ។មាន់ទាំងអស់នេះបានផ្តល់នូវ​ប្រាក់ចំណូលក្នុងមួយខែប្រមាណ ៤០ទៅ៥០ម៉ឺនរៀល​តាមរយៈការ​មកទិញផ្ទាល់ពីឈ្មួញកណ្ដាលនិងអ្នកភូមិក្បែរៗនោះ។

ក្នុងវ័យជាង៦០ឆ្នាំអ្នកស្រី សូត្រ ផល បានរំលឹកពីអតីតកាលថា ដំបូងឡើយអ្នកស្រី មិនហ៊ានចិញ្ចឹមច្រើនដើម្បីលក់ដូរទេព្រោះ​ខ្លាចវាឈឺងាប់​នាំឱ្យខាតបង់លុយកាក់។ ប៉ុន្តែដោយសារមាន​មន្រ្តីជំនាញរបស់អង្គការ និងសហគមន៍ជួយបង្រៀនរបៀបចិញ្ចឹម ពិសេសរបៀបចាក់វាក់សាំងការពារ អ្នកស្រីក៏ចាប់ផ្តើមចិញ្ចឹម​។ ការចិញ្ចឹមតាមលក្ខណៈបច្ចេកទេសត្រឹមត្រូវ បានហុចផលជាទី
គាប់ចិត្ត ។

បន្ថែមក្នុងមុខរបរនេះលោក គង់ មឿន ប្រធានសហគមន៍កសិកម្ម​ឧត្តមសូរិយានៃឃុំឧត្តមសូរិយា បានឱ្យដឹងថា បច្ចុប្បន្ន សហគមន៍មាន​សមាជិកចំនួន ២១៦ គ្រួសារ ក្នុងនេះមានសមាជិកប្រមាណ៥៥គ្រួសារ បានអនុវត្តវិធីចិញ្ចឹមមាន់លក់។កសិករ​ទាំងនេះខ្លះ ចិញ្ចឹមមាន់​យកសាច់ និងខ្លះទៀតយកពងមាន់លក់។លោកបានលើកទឹក​ចិត្តដល់អ្នកពុំទាន់ចិញ្ចឹមថា មាន់ងាយស្រួល ផ្តល់ប្រាក់​ចំណូល។អ្នកពុំធ្លាប់​ចិញ្ចឹម​អាចសាកល្បងបានពីព្រោះ​វាមិនទាមទារការ​ចំណាយច្រើនដូច​ការចិញ្ចឹមសត្វដទៃ​ឡើយ។

ដោយឡែក ប្រធានសមាគមអ្នកចិញ្ចឹមសត្វកម្ពុជា លោក ស្រ៊ុន ពៅ បានប្រាប់ថា ការចិញ្ចឹមមាន់តាមផ្ទះជាខ្នាតតូច និង មធ្យម​អាច​រកចំណូលសម្រាប់ផ្គត់ផ្គង់គ្រួសារ បើទោះបីពេលនេះទីផ្សារ​មាន​ស្រែធ្លាក់ចុះមកត្រឹម១៥.០០០​ក្នុងមួយគីឡូ​ក្រាមឬ​តំបន់​ខ្លះលើស​ពីនេះក្តី។
លោកប្រធានសមាគមជំរុញដល់កសិករគួរបង្កើនការរកប្រាក់ចំណូលរបស់ខ្លួន តាមរយៈការចិញ្ចឹមសត្វ ក្នុងនោះមាន ទាំង មាន់ ទា ជ្រូក គោ ក្របី ជាដើម៕

ដោយ៖ម៉ាដេប៉ូ,រូបភាព៖លោក សោមវិជ្ជា និងលោក ផុន ពិសិដ្ឋ