កម្មកររោងចក្រ ជេ អេស វិលចូលធ្វើការវិញ បន្ទាប់ពីក្រសួងការងារអន្តរាគមន៍ដោះស្រាយ

បន្ទាប់ពីផ្ទុះការតវ៉ាកាលពីថ្ងៃចន្ទ នៅថ្ងៃអង្គារទី៤ ខែសីហានេះកម្មករនិយោជិតនៅរោងចក្រ ជេ អេស (JS Leather Collection Phnom Penh Co., Ltd.)បានវិលត្រឡប់ចូលបម្រើការងារជាធម្មតាវិញបន្ទាប់ពីក្រសួងការងារ និងបណ្ដុះបណ្ដាលវិជ្ជាជីវៈ ចូលរួមដោះស្រាយជាមួយអ្នកទទួលខុសត្រូវរោងចក្រ។

ឯកឧត្តម ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា បងប្អូនកម្មករនិយោជិតបានចូលបំពេញការងារតាមធម្មតាវិញ បន្ទាប់ពីពួកគាត់បានទទួលយកដំណើរការសម្របសម្រួល ដែលឈរលើគោលការណ៍សន្ទនា ការយោគយល់គ្នាទៅវិញទៅមក ការគោរពសិទ្ធិ និងកាតព្វកិច្ចរបស់ភាគីពាក់ព័ន្ធ ព្រមទាំងការអនុវត្តស្របតាមច្បាប់ និងបទប្បញ្ញត្តិការងារជាធរមាន។

អ្នកនាំពាក្យរូបនេះបន្តថា ក្រោយការឈានដល់កិច្ចព្រមព្រៀងរួម បងប្អូនកម្មករនិយោជិតបានសម្រេចវិលត្រឡប់ចូលបម្រើការងារវិញជាធម្មតា ដែលជាការបង្ហាញពីទំនុកចិត្តជឿជាក់គ្នារវាងភាគី និងប្រសិទ្ធភាពនៃយន្តការដោះស្រាយវិវាទការងាររបស់ក្រសួង។

មន្រ្តីជាន់ខ្ពស់ក្រសួងការងារបញ្ជាក់ថា ក្រសួងតែងតែប្រកាន់ខ្ជាប់នូវការដោះស្រាយវិវាទការងារតាមរយៈការសន្ទនា និងការសម្របសម្រួល ដោយផ្តល់អាទិភាពដល់ការថែរក្សាភាពសុខដុមរមនាក្នុងទំនាក់ទំនងវិជ្ជាជីវៈ ការការពារផលប្រយោជន៍ស្របច្បាប់របស់កម្មករនិយោជិត និងនិយោជក ព្រមទាំងការរក្សាស្ថិរភាពក្នុងវិស័យការងារ និងការវិនិយោគនៅកម្ពុជា។

ឯកឧត្តម ស៊ុន មេសា បានអំពាវនាវដល់និយោជក កម្មករនិយោជិត និងអង្គការសហជីព បន្តដោះស្រាយបញ្ហាផ្សេងៗដែលអាចកើតមាន តាមរយៈយន្តការសន្ទនា និងនីតិវិធីដែលមានចែងក្នុងច្បាប់ការងារ ដើម្បីធានាឱ្យការដោះស្រាយវិវាទប្រព្រឹត្តទៅដោយសន្តិវិធី ប្រកបដោយការយោគយល់ និងផលប្រយោជន៍រួម។

គួរបញ្ជាក់ថា កាលពីព្រឹកថ្ងៃទី៣ ខែសីហា ឆ្នាំ២០២៦ កម្មករកម្មការិនីបាននាំគ្នាធ្វើការតវ៉ានៅរោងចក្រ JS CORP ដែលមានទីតាំងនៅជិតផ្សារព្រៃទា ក្នុងរាជធានីភ្នំពេញ។

បើយោងតាមសម្ព័ន្ធសហជីពចលនាកម្មករបញ្ជាក់លើបណ្ដាញសង្គម មូលហេតុដែលនាំឱ្យផ្ទុះការតវ៉ា គឺដោយសារអ្នកទទួលខុសត្រូវបានចូលទៅកន្លែងហាមឃាត់ដែលមានកម្មការិនីកំពុងតែកោសខ្យល់ និងបានយកទូរសព្ទដៃថតសកម្មភាពនោះ ៕