សេចក្តីព្រាងច្បាប់ស្តីពីកិច្ចការពារទិន្នន័យបុគ្គល បានឈានដល់ដំណាក់កាលពិភាក្សាចុងក្រោយហើយ បន្ទាប់ពីបានឆ្លងកាត់ការពិគ្រោះយោបល់ចំនួន ៣លើកកន្លងមក។ សិក្ខាសាលាផ្ទៀងផ្ទាត់លើកចុងក្រោយត្រូវបានធ្វើឡើងនៅព្រឹកថ្ងៃទី៥ ខែសីហា ឆ្នាំ២០២៦។ បន្ទាប់ពីបញ្ចប់ការពិភាក្សា និងសរុបមតិយោបល់ សេចក្តីព្រាងច្បាប់នេះនឹងត្រូវបញ្ជូនទៅទីស្តីការគណៈរដ្ឋមន្ត្រី ដើម្បីពិនិត្យ មុននឹងស្នើសុំការអនុម័តពីសភា។
 
ឯកឧត្តម គង់ ផល្លៈ រដ្ឋលេខាធិការក្រសួងប្រៃសណីយ៍ និងទូរគមនាគមន៍ ប្រាប់បណ្តាញព័ត៌មាន AMS ថា ក្នុងបរិបទនៃបរិវត្តកម្មឌីជីថលដែលកំពុងរីកចម្រើនយ៉ាងឆាប់រហ័ស ទិន្នន័យបានក្លាយជាធនធានយុទ្ធសាស្ត្រដ៏មានតម្លៃ និងជាកម្លាំងចលករសំខាន់សម្រាប់នវានុវត្តន៍ កំណើនសេដ្ឋកិច្ច និងការលើកកម្ពស់គុណភាពសេវាសាធារណៈ។ ទន្ទឹមនឹងនេះ ការការពារទិន្នន័យបុគ្គលក៏បានក្លាយជាបញ្ហាអាទិភាព ដើម្បីធានាថា ការប្រើប្រាស់ទិន្នន័យប្រព្រឹត្តទៅដោយសុវត្ថិភាព មានទំនួលខុសត្រូវ និងគោរពសិទ្ធិរបស់បុគ្គល។ ​
 
ឯកឧត្តមបានលើកឡើងថា ប្រជាពលរដ្ឋនឹងប្រើប្រាស់សេវាឌីជីថលដោយភាពជឿជាក់ លុះត្រាតែពួកគេមានទំនុកចិត្តថា ទិន្នន័យបុគ្គលរបស់ខ្លួនត្រូវបានការពារយ៉ាងត្រឹមត្រូវ។ ចំណែកធុរជននឹងធ្វើការវិនិយោគ ឬធ្វើនវានុវត្តន៍ដោយមានទំនុកចិត្ត លុះត្រាតែមានក្របខ័ណ្ឌគតិយុត្តច្បាស់លាស់ តម្លាភាព និងអាចព្យាករបាន។
 
ដូច្នេះ ការការពារទិន្នន័យបុគ្គល មិនត្រឹមតែជាកាតព្វកិច្ចផ្នែកច្បាប់ប៉ុណ្ណោះទេ ប៉ុន្តែជាមូលដ្ឋានសម្រាប់កសាងទំនុកចិត្ត និងជំរុញបរិវត្តកម្មឌីជីថលប្រកបដោយចីរភាពផងដែរ។ ទំនុកចិត្តដែលកើតចេញពីការការពារទិន្នន័យបុគ្គល មិនត្រឹមតែជាមូលដ្ឋានសម្រាប់បរិវត្តកម្មឌីជីថលប៉ុណ្ណោះទេ ប៉ុន្តែក៏ជាគ្រឹះដ៏សំខាន់សម្រាប់ការអភិវឌ្ឍបច្ចេកវិទ្យាជំនាន់ថ្មី ជាពិសេសបញ្ញាសិប្បនិម្មិត (AI) ផងដែរ។
 
ឯកឧត្តមបានបញ្ជាក់ថា សេចក្តីព្រាងច្បាប់ស្តីពីកិច្ចការពារទិន្នន័យបុគ្គល មិនមានគោលបំណងរារាំងនវានុវត្តន៍ ឬបង្កើតបន្ទុកនិយ័តកម្មដែលមិនចាំបាច់នោះទេ។ ផ្ទុយទៅវិញ សេចក្តីព្រាងច្បាប់នេះមានគោលបំណងបង្កើតបរិយាកាសឌីជីថលប្រកបដោយទំនុកចិត្ត ដែលក្នុងនោះ ការការពារឯកជនភាព នវានុវត្តន៍ និងបច្ចេកវិទ្យា AI អាចអភិវឌ្ឍទៅជាមួយគ្នា។
 
តាមរយៈការកំណត់វិធានច្បាស់លាស់សម្រាប់ការប្រមូល ការប្រើប្រាស់ ការចែករំលែក និងការការពារទិន្នន័យបុគ្គល សេចក្តីព្រាងច្បាប់នេះនឹងជួយពង្រឹងទំនុកចិត្តរបស់សាធារណជន ជំរុញការអភិវឌ្ឍ AI ប្រកបដោយការទទួលខុសត្រូវ ព្រមទាំងគាំទ្រពាណិជ្ជកម្មឌីជីថលឆ្លងដែន ទាក់ទាញការវិនិយោគឌីជីថល និងលើកកម្ពស់សមត្ថភាពប្រកួតប្រជែងរបស់កម្ពុជាក្នុងសេដ្ឋកិច្ចឌីជីថលពិភពលោក។
 
ឯកឧត្តម គង់ ផល្លៈ បានគូសបញ្ជាក់ថា ការការពារទិន្នន័យបុគ្គលមិនមែនជាកាតព្វកិច្ចរបស់ស្ថាប័នណាមួយតែឯងនោះទេ ប៉ុន្តែជាការទទួលខុសត្រូវរួមរបស់រាជរដ្ឋាភិបាល វិស័យឯកជន ស្ថាប័នអប់រំ សង្គមស៊ីវិល អ្នកអភិវឌ្ឍបច្ចេកវិទ្យា និងប្រជាពលរដ្ឋគ្រប់រូប។ ឯកឧត្តមបញ្ជាក់ថា៖ «តាមរយៈកិច្ចសហការរបស់យើងទាំងអស់គ្នា យើងនឹងអាចកសាងក្របខ័ណ្ឌច្បាប់ដ៏រឹងមាំ ដើម្បីការពារសិទ្ធិរបស់ប្រជាពលរដ្ឋ និងគាំទ្រអនាគតឌីជីថលរបស់កម្ពុជា»៕
 
អត្ថបទ៖ ង៉ាន់ ទិត្យ
រូបភាព៖ រិន រចនា