លោក Thomas Andrews អ្នករាយការណ៍ពិសេសអង្គការសហប្រជាជាតិ ស្តីពីស្ថានភាពសិទ្ធិមនុស្សនៅកម្ពុជា បានបញ្ជាក់ថា លោកស្វាគមន៍ចំពោះមតិយោបល់របស់រដ្ឋាភិបាលថៃលើសេចក្តីថ្លែងការណ៍របស់លោក ពាក់ព័ន្ធនឹងជម្លោះព្រំដែន និងការផ្លាស់ទីលំនៅរបស់ប្រជាជនកម្ពុជា។
 
លោកបានបញ្ជាក់ថា តួលេខជនភៀសខ្លួនកម្ពុជាប្រមាណ ៦៥០,០០០នាក់ គឺបានមកពីរបាយការណ៍នានារបស់អង្គការសហប្រជាជាតិ ហើយការលើកឡើងរបស់លោកផ្តោតតែលើបញ្ហាសិទ្ធិមនុស្ស ដោយមិនពាក់ព័ន្ធនឹងការទាមទារអធិបតេយ្យភាពដែនដីឡើយ។
 
អ្នករាយការណ៍ពិសេសបញ្ជាក់ថា មុននឹងធ្វើសេចក្តីថ្លែងការណ៍២ថ្ងៃ លោកក៏បានបញ្ជូនសេចក្តីព្រាងនៃសេចក្តីថ្លែងការណ៍មួយផ្នែកពាក់ព័ន្ធនឹងជម្លោះព្រំដែនទៅឲ្យរដ្ឋាភិបាលថៃពិនិត្យមើលដែរ តែភាគីថៃមិនបានឆ្លើយតបអ្វីទាំងអស់។ ទោះបីយ៉ាងណា លោកនឹងបន្តទាក់ទងជាមួយរដ្ឋាភិបាលថៃទៀត មុនពេលបញ្ជូនរបាយការណ៍ស្តីពីស្ថានភាពសិទ្ធិមនុស្សនៅកម្ពុជាទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិ នៅខែក្រោយ។
 
លោកបានសង្កត់ធ្ងន់ថា ជម្លោះព្រំដែនគួរត្រូវបានដោះស្រាយ ឱ្យបានឆាប់រហ័ស និងដោយសន្តិវិធី ដើម្បីឱ្យប្រជាពលរដ្ឋភៀសសឹកអាចវិលត្រឡប់ទៅលំនៅឋានវិញ រស់នៅដោយសុវត្ថិភាព និងទទួលបានឱកាសសេដ្ឋកិច្ចពីពាណិជ្ជកម្មតាមព្រំដែន។ លោកបង្ហាញឆន្ទៈធ្វើការជាមួយរដ្ឋាភិបាលកម្ពុជា និងថៃ ដើម្បីដោះស្រាយបញ្ហាសិទ្ធិមនុស្សពាក់ព័ន្ធនឹងជម្លោះ ជាពិសេសបញ្ហាជនភៀសសឹក ដោយហេតុថា «សិទ្ធិមនុស្សមានសារសំខាន់ណាស់ មិនថាសម្រាប់ជាជនជាតិខ្មែរ ឬថៃនោះឡើយ»៕