បរទេស ៖ អ៊ីរ៉ង់ និង អូម៉ង់ សម្រេចបានកិច្ចព្រមព្រៀង ឈានទៅបើកច្រកសមុទ្រហ័រមូសឡើងវិញ នេះបើតាមការចុះផ្សាយរបស់ប្រព័ន្ធផ្សព្វផ្សាយ នៅអារ៉ាប៊ី សាអូឌីត កាលពីថ្ងៃព្រហស្បតិ៍។

បណ្តាញព័ត៌មាន Al Hadath និង Al Arabiya បានរាយការណ៍ ដោយដកស្រង់សម្តីប្រភពព័ត៌មានជាន់ខ្ពស់បញ្ជាក់ថា ប្រទេសក្បែរខាងទាំងពីរបានសម្រេចលើចំណុចសំខាន់ៗ នៃកិច្ចព្រមព្រៀងមួយ ដើម្បីបើកច្រកសមុទ្រហ័រមូសឡើងវិញ សម្រាប់រយៈពេល ៦០ថ្ងៃ ហើយ កិច្ចព្រមព្រៀង ដែលនៅត្រូវការការអនុម័តពីក្រុមប្រឹក្សាសន្តិសុខជាតិជាន់ខ្ពស់របស់អ៊ីរ៉ង់មួយនេះ អាចនឹងត្រូវបានប្រកាស ក្នុងពេលប៉ុន្មានថ្ងៃខាងមុខ។

ប្រភពដដែលបានបញ្ជាក់ថា នឹងមិនមានការគិតថ្លៃឆ្លងកាត់ ឬ ថ្លៃសេវាកម្មណាមួយឡើយ ហើយភាគីនានាក្នុងតំបន់អាចចូលរួមក្នុងប្រតិបត្តិការបោសសម្អាតមីន និងនីតិវិធីបច្ចេកទេសផ្សេងៗ។

ប្រភពទាំងនោះបានបន្ថែមថា បន្ទាប់ពីកិច្ចព្រមព្រៀង ត្រូវបានអនុម័ត សហរដ្ឋអាមេរិក និងអ៊ីរ៉ង់នឹងត្រឡប់ទៅអនុវត្តអនុស្សរណៈនៃការយោគយល់គ្នា (MoU) ស្តីពីសន្តិភាពរបស់ពួកគេវិញ ហើយនឹងចាប់ផ្តើមអនុវត្តចំណុចទី៥ ដែលទាក់ទងនឹងការបើកច្រកសមុទ្រឡើងវិញ និងការធានាសុវត្ថិភាពនាវាចរណ៍សម្រាប់នាវាពាណិជ្ជកម្ម។

បើតាម Xinhua, អ៊ីរ៉ង់បានរឹតបន្តឹងការគ្រប់គ្រងលើច្រកសមុទ្រនេះ បន្ទាប់ពីមានការវាយប្រហាររួមគ្នារបស់អាមេរិក និងអ៊ីស្រាអែល ទៅលើទឹកដីអ៊ីរ៉ង់ កាលពីថ្ងៃទី ២៨ ខែកុម្ភៈ៕

ប្រភព ៖ Xinhua ប្រែសម្រួល ៖ សារ៉ាត