ក្រុមហ៊ុនក្នុងស្រុកមួយ បានបោះទុនវិនិយោគជាង ១០លានដុល្លារ ដើម្បីបង្កើតរោងចក្រកែច្នៃអំបិលនៅខេត្តកំពង់ស្ពឺ ដែលជាសញ្ញាវិជ្ជមានក្នុងការជំរុញវិស័យអំបិលកម្ពុជា ឱ្យកាន់តែរីកចម្រើន និងកាត់បន្ថយការពឹងផ្អែកលើការនាំចូល។ នេះបើយោងតាមការបញ្ជាក់របស់ឯកឧត្តមជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា។
 
ឯកឧត្តមបានលើកឡើងដូច្នេះ នៅក្នុងកិច្ចប្រជុំផ្នែកកម្មន្តសាល សហគ្រាសធុនតូច និងមធ្យម និងសេវា ក្រុម«គ» នៃវេទិការាជរដ្ឋាភិបាល-ផ្នែកឯកជន ដើម្បីពិភាក្សា និងដោះស្រាយបញ្ហាប្រឈមរបស់វិស័យឯកជន កាលពីថ្ងៃទី៦ ខែសីហា ឆ្នាំ២០២៦។
 
ការវិនិយោគនេះត្រូវបានមើលឃើញថាជាចំណុចចាប់ផ្ដើមដ៏ល្អមួយ ស្របពេលដែលអំបិលត្រូវបានចាត់ទុកជាទំនិញយុទ្ធសាស្ត្រ និងជាទំនិញជាតិរបស់កម្ពុជា។ ខណៈកន្លងមក វិស័យអំបិលនៅកម្ពុជា ជាពិសេសនៅខេត្តកំពត និងកែប បានជួបប្រទះបញ្ហាប្រឈមមួយចំនួន។
 
លោក ប៊ុន ណារិន ប្រធានសមាគមអ្នកផលិតម៉ាកសម្គាល់ភូមិសាស្ត្រទំនិញអំបិលកំពត-កែប បានសម្តែងការគាំទ្រយ៉ាងពេញទំហឹងចំពោះការបើកដំណើរការរោងចក្រកែច្នៃអំបិលនេះ ដោយរំពឹងថានឹងជួយកាត់បន្ថយការនាំចូលអំបិលពីបរទេស និងលើកកម្ពស់គុណភាពអំបិលក្នុងស្រុក ដែលមានគុណភាពល្អ។
 
បើតាមលោក ប៊ុន ណារិន ទីផ្សារអំបិលកម្ពុជាឆ្នាំនេះ ហាក់ល្អប្រសើរជាងឆ្នាំមុន ដោយអំបិល ១បាវ ចំណុះ ៥០គីឡូក្រាម អាចលក់បាន ២ម៉ឺនរៀល ខណៈកាលពីឆ្នាំមុនអាចលក់បានតែ ១ម៉ឺន៥ពាន់រៀលប៉ុណ្ណោះ។
 
បច្ចុប្បន្ន សមាជិកនៃសមាគមអ្នកផលិតម៉ាកសម្គាល់ភូមិសាស្ត្រទំនិញអំបិលកំពត-កែប មានចំនួនជាង ១០០គ្រួសារ ជាមួយផ្ទៃដីប្រមាណ ៣ ទៅ ៤ពាន់ហិកតា ដែលអាចប្រមូលផលអំបិលបានប្រហែល ៦ម៉ឺនទៅ ៧ម៉ឺនតោន ក្នុងមួយឆ្នាំ៕

ខន ណារី