វ៉ាស៊ីនតោន ៖ សហរដ្ឋអាមេរិក និងអ៊ីស្រាអែលបានបញ្ចប់ផែនការបង្កើនសមត្ថភាពមីស៊ីលសម្រាប់សំណាញ់មេឃ Arrow ខណៈដែលសម្ព័ន្ធមិត្តដែកថែបទាំងពីរ បន្តដុតដៃដុតជើងពង្រឹងការការពារប្រឆាំងការគំរាមកំហែងពីមីស៊ីលផ្លោងរបស់អ៊ីរ៉ង់ និងក្រុមឧទ្ទាមហ៊ូធីនៅយេម៉ែន ។

បើតាម Times of India, ការធ្វើតេស្តសំណាញ់មេឃ Arrow ធ្វើឡើងកាលពីថ្ងៃ ពុធ ក្រោមកិច្ចសហការរវាងអង្គភាពការពារមីស៊ីលអ៊ីស្រាអែល, ទីភ្នាក់ងារការពារមីស៊ីលអាមេរិក រួមជាមួយកងកម្លាំងការពារជាតិអ៊ីស្រាអែល និងឧស្សាហកម្មអវកាសអ៊ីស្រាអែល ។

សំណាញ់មេឃ Arrow គឺជាបណ្តាញខែលការពារដែនអាកាសពហុស្រទាប់ទំនើបបំផុតរបស់អ៊ីស្រាអែល ដែលស្ថិតក្នុងចង្កោមប្រព័ន្ធប្រឆាំងមីស៊ីលដទៃទៀត រួមមាន David’s Sling, Iron Dome និង Iron Beam ជាដើម ។

ប្រព័ន្ធខែលការពារដែនអាកាស Arrow ត្រូវបានបង្កើតឡើងរួមគ្នាដោយក្រុមហ៊ុន Israel Aerospace Industries ហៅកាត់ IAI របស់អ៊ីស្រាអែល និងក្រុមហ៊ុន Boeing របស់សហរដ្ឋអាមេរិក អស់រយៈពេលជាច្រើនឆ្នាំមកហើយ ។

យោងតាមក្រសួងការពារជាតិអ៊ីស្រាអែល, ក្នុងពេល ៣ ឆ្នាំមកនេះ ប្រព័ន្ធមីស៊ីលរបស់សំណាញ់មេឃ Arrow បានលុបបំបាត់ការគំរាមកំហែងដោយកាំជ្រួចផ្លោងរបស់អ៊ីរ៉ង់ និងក្រុមឧទ្ទាមហ៊ូធីនៅយេម៉ែន រួមទាំងមីស៊ីលផ្លោងមានសមត្ថភាពរត់ទម្លុះលំហរអាកាស និងបរិយាកាសក្រៅស្រទាប់ផែនដីផងដែរ ។

ក្រសួងបន្ថែមថា ការធ្វើតេស្តថ្មីៗនេះ គឺជាផ្នែកមួយនៃកម្មវិធីអភិវឌ្ឍ និងធ្វើទំនើបកម្មសំណាញ់មេឃ Arrow ជាច្រើនឆ្នាំ ដែលរួមមានប្រព័ន្ធខែលការពារដែនអាកាស Arrow 2 និង Arrow 3 ។

ក្រសួងអះអាងថា សំណាញ់មេឃទាំងនេះ បានបង្ហាញសមត្ថភាពដ៏អស្ចារ្យ និងខ្លាំងក្លាមិនធ្លាប់មានក្នុងកម្រិតស្តង់ដាពិភពលោក នៅពេលបំពេញប្រតិបត្តិការការពារដែនអាកាស និងស្ទាក់ចាប់កម្ទេចមីស៊ីល ។

បើតាមប្រមុខការពារជាតិអ៊ីស្រាអែល លោក Israel Katz, អ៊ីស្រាអែលកំពុងបន្តធ្វើទំនើបកម្មប្រព័ន្ធខែលការពារដែនអាកាស Arrow ឥតឈប់ឈរ ហើយអ៊ីស្រាអែលបានត្រៀមខ្លួនគ្រប់ពេល ដើម្បីឆ្លើយតបការគំរាមកំហែងទាំងក្នុងពេលបច្ចុប្បន្ន និងអនាគត ៕

ប្រភព ៖ Times of India ប្រែសម្រួល ៖ ឈឹម ទីណា