ញូវ ដែល្លី ៖ មីស៊ីលផ្លោងឥណ្ឌា Agni-4 ដែលអាចវាយប្រហារគោលដៅសត្រូវ បានដល់ចម្ងាយ ៤,០០០គីឡូម៉ែត្រ ត្រូវបានបាញ់សាកល្បងដោយជោគជ័យ ចេញពីមជ្ឈមណ្ឌលសាកល្បងរួម Integrated Test Range ស្ថិតនៅក្នុងតំបន់ Chandipur នៃ រដ្ឋ Odisha។

បើតាម The Hindu , មីស៊ីលផ្លោង Agni-4 ដែលត្រូវបានបាញ់ កាលពីថ្ងៃព្រហស្បតិ៍ គឺជាមីស៊ីល រយៈចម្ងាយមធ្យម ដែលផលិតឡើងដោយខ្លួនឯង នៅក្នុងប្រទេសឥណ្ឌា និង មានសមត្ថភាពផ្ទុកទាំង ក្បាលគ្រាប់ធម្មតា ឬ ក្បាលគ្រាប់នុយក្លេអ៊ែរ។

មីស៊ីលនេះគឺជាផ្នែកមួយដ៏សំខាន់ នៃសមត្ថភាពរារាំងបែបយុទ្ធសាស្ត្ររបស់ប្រទេសឥណ្ឌា ហើយត្រូវបានដាក់បញ្ចូលទៅក្នុងបញ្ជាការកងកម្លាំងយុទ្ធសាស្ត្ររួចហើយ។ វាមានរយៈចម្ងាយវាយប្រហារប្រហែល ៤,០០០ គីឡូម៉ែត្រ និង ត្រូវបានរចនាឡើងដើម្បីផ្តល់នូវភាពត្រឹមត្រូវខ្ពស់ ដោយមានបំពាក់ប្រព័ន្ធរុករក និងប្រព័ន្ធកំណត់ទិសដៅដ៏ទំនើប។

ក្រសួងការពារជាតិបានឱ្យដឹង តាមរយៈសេចក្តីថ្លែងការណ៍មួយ ដោយបញ្ជាក់ថា ការបាញ់សាកល្បងនេះត្រូវបានធ្វើឡើង ក្រោមការត្រួតពិនិត្យ របស់បញ្ជាការកងកម្លាំងយុទ្ធសាស្ត្រ ឬ Strategic Forces Command ហៅកាត់ SFC។

ក្រសួងអះអាងដែរថា ការបាញ់សាកល្បងដោយជោគជ័យនេះ បានបង្ហាញពីភាពរួចរាល់សម្រាប់ប្រតិបត្តិការរបស់មីស៊ីលផ្លោង Agni-4 និង បានបញ្ជាក់ថា ប្រព័ន្ធសំខាន់ៗទាំងអស់ដំណើរការស្របតាមលក្ខណៈវិនិច្ឆ័យ ដែលបានកំណត់រួចជាស្រេច៕

ប្រភព ៖ thehindu ប្រែសម្រួល ៖ សារ៉ាត