ហ្សាកាតា ៖ ឥណ្ឌូណេស៊ី បានក្លាយជាប្រទេសអាស៊ានដំបូងគេ ដែលអាចផលិតនាវាមុជទឹកដោយខ្លួនឯង បន្ទាប់ពីក្រុមហ៊ុនផលិតនាវារដ្ឋឥណ្ឌូណេស៊ី PT PAL ចាប់ផ្ដើមពិធីកាត់ដែកដំបូងនៅឯទីតាំងផលិតនាវាក្នុងទីក្រុង Surabaya ខេត្តជ្វាខាងកើត កាលពីថ្ងៃទី៧ ខែសីហា ។

បើតាម Naval News, នាវាមុជទឹកនេះមានឈ្មោះ Scorpene ហើយនឹងដំណើរការដោយម៉ាស៊ីនម៉ាស៊ូតលាយអគ្គិសនី ។ វាមានប្រវែងជិត ៧២ ម៉ែត្រ និងមានទម្ងន់ប្រហែលពី ១,៦០០ ទៅ ២ ពាន់តោន ហើយអាចផ្ទុកក្រុមនាវិករហូតដល់ ៣៥ នាក់ ។

ជាមួយគ្នានេះ វាមានសមត្ថភាពរត់លើផ្ទៃទឹកក្នុងល្បឿនជាង ៣៧ គីឡូម៉ែត្រក្នុងមួយម៉ោង និងអាចជ្រមុជទឹកក្នុងជម្រៅប្រហែល ៣០០ ម៉ែត្រ ជាមួយនឹងសមត្ថភាពបំពេញបេសកកម្មបាន ៨០ ថ្ងៃក្នុងមួយលើក និងចម្ងាយជាង ៣ ម៉ឺន ៣ ពាន់គីឡូម៉ែត្រ ។

វាអាចផ្ទុកគ្រាប់ធុនធ្ងន់ចំនួន ១៨ គ្រាប់ និងមានកាណុងកាំភ្លើងចំនួន ៦ ដើម ដែលអាចប្រើប្រាស់ជាមួយមីស៊ីលប្រឆាំងនាវាចម្បាំង SM-39 Exocet និងមីស៊ីលនាំផ្លូវ ជាពិសេសមីស៊ីល Torpedoes ដែលជាប្រភេទគ្រាប់មីស៊ីលប្រដេញក្នុងទឹក ។

លោកឧត្តមនាវី Muhammad Ali មេបញ្ជាការកងទ័ពជើងទឹកឥណ្ឌូណេស៊ី និយាយថា នាវាមុជទឹកនេះ កំពុងត្រូវបានសាងសង់ដោយបុគ្គលិក និងវិស្វករឥណ្ឌូណេស៊ី ដោយមានការគាំទ្រ និងការណែនាំពីក្រុមហ៊ុនការពារជាតិ និងឧស្សាហកម្មនាវាចម្បាំងរបស់បារាំង Naval Group ។

លោកថា ដំណើរការសាងសង់នាវាមុជទឹកនេះរំពឹងនឹងចំណាយពេលប្រហែល ៩៦ ខែ ឬស្មើនឹង ៨ ឆ្នាំ ខណៈបច្ចុប្បន្នកម្មវិធីទាំងមូលសម្រេចបានលទ្ធផលប្រមាណ ២០,៥ ភាគរយហើយ ៕

ប្រភព ៖ Naval News និង The Star ប្រែសម្រួល ៖ ឈឹម ទីណា