គម្រោង «គជ់» របស់ក្រសួងកសិកម្ម រុក្ខាប្រមាញ់ និងនេសាទ កំពុងជួយជ្រោមជ្រែងដល់កសិករដែលមានផលិតកម្មខ្នាតតូច លើដំណាំ និងផលិតផលសំខាន់ៗ រួមមាន៖ ស្វាយចន្ទីក្នុងខេត្តកំពង់ធំ, ស្រូវសរីរាង្គក្នុងខេត្តព្រះវិហារ, ស្វាយកែវរមៀតក្នុងខេត្តឧត្តរមានជ័យ និងបន្លែក្នុងខេត្តសៀមរាប។​

ថ្លែងក្នុងពិធី «បង្ហាញផែនទីបង្ហាញផ្លូវខ្សែច្រវាក់តម្លៃ និងការប្រគល់កុំព្យូទ័រ និងម៉ាស៊ីនព្រីនជូនកសិករ» នាទីរួមខេត្តកំពង់ធំ កាលពីថ្ងៃទី១១ ខែសីហា ឆ្នាំ២០២៦ ឯកឧត្តម មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា គម្រោងនេះបានជួយឱ្យកសិករទទួលបានឱកាសទីផ្សារកាន់តែល្អប្រសើរ និងជួយកាត់បន្ថយភាពងាយរងគ្រោះពីផលប៉ះពាល់នៃការប្រែប្រួលអាកាសធាតុ តាមរយៈការលើកកម្ពស់ផលិតកម្ម និងការប្រកបរបរចិញ្ចឹមជីវិតរបស់ប្រជាជននៅតាមជនបទ។

ឯកឧត្តមបានបញ្ជាក់ថា ការប្រគល់កុំព្យូទ័រ និងម៉ាស៊ីនព្រីនសរុបចំនួន ១២៤គ្រឿង ជូនដល់សហគមន៍ក្នុងខេត្តគោលដៅទាំង៤ខាងលើ គឺជាការផ្តល់ជូននូវឧបករណ៍បច្ចេកវិទ្យាសម័យថ្មី ដើម្បីពង្រឹងការងារប្រចាំថ្ងៃរបស់សហគមន៍កសិកម្ម សហគមន៍ព្រៃឈើ និងសហគមន៍តំបន់ការពារធម្មជាតិ។

ក្នុងឱកាសនោះដែរ ឯកឧត្តម លី វេត អភិបាលរងនៃគណៈអភិបាលខេត្តកំពង់ធំ បានមានប្រសាសន៍ថា ខេត្តកំពង់ធំមានផ្ទៃដីដាំដុះដំណាំកសិ-ឧស្សាហកម្មចម្រុះ ក្នុងនោះមាន៖ ដំណាំចន្ទី ១៥ម៉ឺនហិកតា ដោយប្រមូលផលបាន ៨ម៉ឺនហិកតា ជាមួយទិន្នផលមធ្យមប្រចាំឆ្នាំ ១,៥តោនក្នុ១ហិកតា, ដំឡូងមីប្រមាណ ៥ម៉ឺន ៣ពាន់ហិកតា, ស្វាយកែវរមៀតប្រមាណ ៩ពាន់ហិកតា, ម្រេច ១៤១ហិកតា និងតាង៉ែន ៧៥ហិកតា។ ការជួយជ្រោមជ្រែងពីក្រសួងកសិកម្ម និងអង្គការដៃគូ បានរួមចំណែកបន្ថែមដល់ការដាំដុះ និងការស្វែងរកទីផ្សាររឹងមាំជូនកសិករ។​

ជាមួយគ្នានេះ លោកស្រី រីបេកា ប៊ែល (Rebekah Bell) តំណាងអង្គការស្បៀង និងកសិកម្មនៃសហប្រជាជាតិ (FAO) ប្រចាំកម្ពុជា បានលើកឡើងថា ឧបករណ៍បច្ចេកវិទ្យាទាំងនេះនឹងជួយបំពេញគម្លាតផ្នែកឌីជីថល ដោយអនុញ្ញាតឱ្យកសិករធ្វើការសម្រេចចិត្តដោយផ្អែកលើព័ត៌មានច្បាស់លាស់ និងអាចកសាងជីវភាពរស់នៅឱ្យកាន់តែមានភាពធន់ទៅនឹងការប្រែប្រួលអាកាសធាតុ។

សូមបញ្ជាក់ថា គម្រោង «គជ់» បានចាប់ផ្តើមអនុវត្តរួមគ្នានៅខែមេសា ឆ្នាំ២០២៣ ដោយក្រសួងកសិកម្ម រុក្ខាប្រមាញ់ និងនេសាទ, ក្រសួងបរិស្ថាន និងអង្គការ FAO។ ក្រោមការឧបត្ថម្ភថវិកាពីមូលនិធិអាកាសធាតុបៃតង គម្រោងនេះមានគោលបំណងចម្បងជួយកសិករខ្នាតតូច ជាពិសេសស្ត្រី និងសហគមន៍មូលដ្ឋាន ឱ្យមានសមត្ថភាពជម្នះបាននូវហានិភ័យ ដែលបង្កឡើងដោយការប្រែប្រួលអាកាសធាតុ៕

អត្ថបទដោយ៖ ម៉ាដេប៉ូ
រូបភាព៖ លោក វេង លឹមហួត