លោក ឈិត សាមាន គ្រូបង្វឹកកីឡាវាយសីជម្រើសជាតិកម្ពុជាបានបង្ហាញក្តីរំពឹងយ៉ាងមុតមាំថា អត្តពលិកម្ចាស់ផ្ទះកម្ពុជា នឹងអាចដណ្តើមបានមេដាយមាសយ៉ាងតិចចាប់ពី ៣គ្រឿងឡើងទៅ នៅក្នុងការប្រកួតកីឡាវាយសីជ្រើសរើសជើងឯកអាស៊ី អាគ្នេយ៍លើកទី៣ ខណៈកម្ពុជាធ្វើជាម្ចាស់ផ្ទះ។

ព្រឹត្តិការណ៍កីឡាវាយសីជ្រើសរើសជើងឯកអាស៊ីអាគ្នេយ៍ លើកទី៣ ដែលកម្ពុជាធ្វើជាម្ចាស់ផ្ទះ នឹងប្រព្រឹត្តទៅចាប់ពី​ថ្ងៃទី១៥ ដល់ថ្ងៃទី២១ ខែសីហា ឆ្នាំ២០២៦ ខាងមុខនេះ នៅទីលានកីឡាវាយសីនៃពហុកីឡដ្ឋានជាតិមរតកតេជោ។

ដោយទឹកមុខមានជំនឿជាក់លោក ឈិត សាមាន គ្រូបង្វឹកជម្រើសជាតិ បានបញ្ជាក់ថា អត្តពលិកកម្ពុជាទាំង ៣ប្រភេទអាយុ បានខិតខំហ្វឹកហាត់ត្រៀមខ្លួនយ៉ាងដិតដល់ ដោយមានប្តេជ្ញាចិត្តខ្ពស់ក្នុងការប្រជែងយកមេដាយជូនជាតិ។

ជុំវិញព្រឹត្តិការណ៍កម្រិតអន្តរជាតិដែលនឹងចូលមកដល់ កីឡាករវ័យ ១៤ឆ្នាំ នូ រស្មីរតនា បានអះអាងថា រូបគេព្រមមិត្តរួមក្រុម បានត្រៀមលក្ខណៈរួចរាល់ទាំងកម្លាំងកាយចិត្ត។ សម្រាប់ការប្រកួតកម្រិតអន្តរជាតិនេះ រស្មីរតនា ប្តេជ្ញាធ្វើឱ្យបានល្អបំផុតដើម្បី​ដណ្តើម​មេដាយ​ជូនជាតិ និងបង្កើតលទ្ធផលឱ្យកាន់តែប្រសើរជាងឆ្នាំមុន។

គួររំលឹកថា ព្រឹត្តិការណ៍ជើងឯកអាស៊ីអាគ្នេយ៍ លើកទី៣ ទទួលបានការអនុញ្ញាតពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីតាមរយៈការស្នើសុំពីក្រសួងអប់រំ យុវជន និងកីឡា។ ការប្រកួតឆ្នាំនេះ មានប្រទេសចូលរួមចំនួន ៧ រួមមាន៖ កម្ពុជា (ម្ចាស់ផ្ទះ), ឡាវ, ទីម័រខាងកើត, ព្រុយណេ, វៀតណាម, ហ្វីលីពីន និងមីយ៉ាន់ម៉ា។

កាលពីការប្រកួតលើកទី២ ឆ្នាំ២០២៥ កន្លងទៅ កម្ពុជាដណ្តើមបានមេដាយរួមមាន៖ មេដាយមាស ៥គ្រឿង, មេដាយប្រាក់ ១២គ្រឿង និងមេដាយសំរឹទ្ធ ១១គ្រឿង៕

រូបភាព៖ ជីម ភារ៉ា
អត្ថបទ៖ ជាវ ចន្ធូ