អ្នកនាង កឹម មនោវិទ្យា កូនស្រីរបស់លោកកឹម សុខា ត្រូវបានព្រះមហាក្សត្រសព្វព្រះរាជហឬទ័យ តែងតាំងជាប្រេសិតពិសេសរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មានឋានៈស្មើរដ្ឋមន្ត្រី។
 
ព្រះរាជ្យក្រឹត្យ ដែលឡាយព្រះហស្តលេខានៅថ្ងៃចន្ទ ទី១៧សីហានេះ បញ្ជាក់ថា ការតែងតាំងលោកជំទាវ កឹម មនោវិទ្យា ​ធ្វើឡើងតាមសេចក្តីក្រាបបង្គំទូលថ្វាយរបស់សម្តេចបវរធិបតី ហ៊ុន ម៉ាណែត ប៉ុន្តែព្រះរាជក្រឹត្យមិនបានបញ្ជាក់ពីភារកិច្ចដែលលោកជំទាវត្រូវទទួលបន្ទុកឡើយ។
 
នៅក្នុងជំនួបសំណេះសំណាលជាមួយអ្នកនាង កឹម មនោវិទ្យា​ កាលពីថ្ងៃសុក្រ ទី១៣សីហា សម្តេចធិបតី ហ៊ុន ម៉ាណែត បានបង្ហើបថា ក្នុងនាមជាអ្នកនយោបាយជំនាន់ថ្មីដូចគ្នា សម្តេច និងកូនស្រីលោក កឹម សុខា មានកិច្ចការមួយចំនួនដែលអាចរួមសហការគ្នាធ្វើ ដើម្បីឧត្តមប្រយោជន៍ជាតិនៅលើឆាកអន្តរជាតិ។

សម្តេចតេជោ ហ៊ុន សែន ក៏បានចាត់ទុកអ្នកនាង កឹម មនោវិទ្យា ថា ពិតជាធនធានមនុស្សដ៏ល្អសម្រាប់ជាតិផងដែរ។
 
កូនស្រ្តីច្បងរបស់ឯកឧត្តម កឹម សុខា គឺជាអតីតសមាជិកគណៈកម្មាធិការអចិន្ត្រៃយ៍របស់អតីតគណបក្សសង្គ្រាះជាតិ ទទួលបន្ទុកកិច្ចការសាធារណៈ។ អ្នកនាងមានបទពិសោធន៍ច្រើនផ្នែកតស៊ូមតិពាក់ព័ន្ធនឹងប្រជាធិបតេយ្យ និងសិទ្ធិមនុស្សនៅកម្ពុជា។
 
អ្នកនាងបានបញ្ចប់ការសិក្សាផ្នែកគ្រប់គ្រងពាណិជ្ជកម្មពីសាកលវិទ្យាល័យ San Jose State University នៅសហរដ្ឋអាមេរិក និងថ្នាក់បរិញ្ញាបត្រជាន់ខ្ពស់ ផ្នែកសេដ្ឋកិច្ចពាណិជ្ជកម្ម ពីសាកលវិទ្យាល័យ Amsterdam នៅប្រទេសហូឡង់៕