លោកស្រី វ៉ានធី បាច ទូយ៉េត( Van Thi Bach Tuyet) អនុលេខាគណៈកម្មាធិការបក្សទីក្រុងហូជីមិញ បានលើកឡើងថា ទីក្រុងហូជីមិញតែងតែត្រៀមខ្លួនជាស្រេចដើម្បីចែករំលែកចំណេះដឹង ទ្រឹស្តី និងបទពិសោធន៍ជាក់ស្តែងក្នុងការអភិវឌ្ឍសេដ្ឋកិច្ចសង្គម និងកំណើនប្រកបដោយចីរភាព ទៅដល់ប្រទេសកម្ពុជា និងឡាវ។
 
សារព័ត៌មានវៀតណាម​បានដកស្រង់សម្តីលោកស្រី​ដែលបានលើកឡើងនៅក្នុងកិច្ចប្រជុំការងារ​រួមគ្នារវាងមន្ត្រីវ័យក្មេងមកពីគណបក្សកុម្មុយនិស្តវៀតណាម (CPV) គណបក្សប្រជាជនកម្ពុជា (CPP) និងគណបក្សប្រជាជនបដិវត្តន៍ឡាវ (LPRP) ដែលកំពុងបំពេញទស្សនកិច្ចនៅប្រទេសវៀតណាម កាលពីថ្ងៃទី២៤ ខែសីហា ឆ្នាំ២០២៦។
 
កិច្ចប្រជុំគណៈប្រតិភូថ្នាក់ដឹកនាំវ័យក្មេងមកពីគណបក្សកាន់អំណាចនៃប្រទេសទាំងបីនេះគឺជាឱកាសចែករំលែកបទពិសោធន៍គ្នាក្នុងការអភិវឌ្ឍសេដ្ឋកិច្ចសង្គម ការរៀបចំរដ្ឋាភិបាល ផែនការអភិវឌ្ឍន៍របស់ទីក្រុង និងពង្រឹងការយល់ដឹងគ្នាទៅវិញទៅមកផងដែរ។
 
លោកស្រី បានលើកឡើងថា វៀតណាមតែងតែចាត់ទុកប្រទេសកម្ពុជា និងឡាវ ជាប្រទេសជិតខាងល្អ ខណៈដែលបក្ស រដ្ឋ និងប្រជាជនវៀតណាម រួមទាំងគណៈកម្មាធិការបក្ស រដ្ឋបាល និងប្រជាជនទីក្រុងហូជីមិញ តែងតែមានការយល់ដឹងយ៉ាងជ្រាលជ្រៅ និងយកចិត្តទុកដាក់ខ្ពស់បំផុតចំពោះការពង្រឹង និងអភិវឌ្ឍទំនាក់ទំនងវៀតណាម-ឡាវ-កម្ពុជា។
 
លោកស្រីយល់ឃើញថា ការអភិវឌ្ឍ និងភាពជោគជ័យរបស់ប្រទេសឡាវ និងកម្ពុជា ក៏ជាជោគជ័យ និងសេចក្តីរីករាយរបស់ទីក្រុងហូជីមិញផងដែរ៕

សៅ សុខអេង