ក្នុងកិច្ចប្រជុំថ្នាក់រដ្ឋមន្ត្រីនៃក្រុមប្រទេសអភិវឌ្ឍន៍តិចតួចស្តីពីការប្រែប្រួលអាកាសធាតុ នៅប្រទេសទីម័រឡេស្តេ ប្រតិភូកម្ពុជានឹងថ្លែងសារពីការប្តេជ្ញាចិត្តរបស់កម្ពុជា ក្នុងការកាត់បន្ថយការភាយឧស្ម័នផ្ទះកញ្ចក់រហូតដល់៥៥%ត្រឹមឆ្នាំ២០៣៥។

ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន នាល្ងាច ថ្ងៃទី១ ខែកញ្ញា ឆ្នាំ២០២៦ បានអញ្ជើញដឹកនាំគណៈប្រតិភូកម្ពុជា ទៅចូលរួមកិច្ចប្រជុំថ្នាក់រដ្ឋមន្ត្រី នៃក្រុមប្រទេសអភិវឌ្ឍន៍តិចតួច (LDC) ស្តីពីការប្រែប្រួលអាកាសធាតុ នៅប្រទេសទីម័រឡេស្តេ។

នៅក្នុងអំឡុងពេលបំពេញការងារ ឯកឧត្តមនឹងថ្លែងសុន្ទរកថាគន្លឹះ អំពីអាទិភាពរបស់ក្រុមប្រទេសអភិវឌ្ឍន៍តិចតួច ដែលត្រូវជំរុញឱ្យកាន់តែខ្លាំងក្លា និងភាពងាយស្រួលជាងមុន លើហិរញ្ញវត្ថុអាកាសធាតុ និងការគាំទ្រជាក់ស្តែង សម្រាប់ប្រទេសដែលងាយរងគ្រោះ ព្រមទាំងអាទិភាពជាយុទ្ធសាស្ត្រសម្រាប់កិច្ចប្រជុំកំពូល COP 31។

ឯកឧត្តមរដ្ឋមន្រ្តី គ្រោងនឹងថ្លែងទៅកាន់សហគមន៍អន្តរជាតិជាថ្មីពីការប្តេជ្ញាចិត្តរបស់កម្ពុជា ដែលបានកំណត់គោលដៅកាត់បន្ថយការភាយឧស្ម័នផ្ទះកញ្ចក់រហូតដល់ ៥៥ ភាគរយ ត្រឹមឆ្នាំ២០៣៥ និងការឆ្ពោះទៅគោលដៅកម្ពុជាជាប្រទេសអព្យាក្រឹតកាបូនត្រឹមឆ្នាំ២០៥០។ កម្ពុជានៅតែជំរុញឱ្យមានការរក្សាសីតុណ្ហភាពត្រឹម ១,៥ អង្សាសេ ដែលនៅតែជាកត្តាចាំបាច់បំផុត ក្នុងការការពារជីវិតរស់នៅ ការថែរក្សាប្រព័ន្ធអេកូឡូស៊ី និងការសម្រេចបានការអភិវឌ្ឍប្រតកបដោយចីរភាព។

សូមបញ្ជាក់ថា កិច្ចប្រជុំថ្នាក់រដ្ឋមន្ត្រីនៃក្រុមប្រទេសអភិវឌ្ឍន៍តិចតួច ស្តីពីការប្រែប្រួលអាកាសធាតុ ដែលនឹងប្រព្រឹត្តទៅចាប់ពីថ្ងៃទី១ ដល់ថ្ងៃទី៤ ខែកញ្ញា ឆ្នាំ២០២៦ នៅរដ្ឋធានី ឌីលី (Dili) ប្រទេសប្រទេសទីម័រឡេស្តេ ។ កិច្ចប្រជុំនេះធ្វើឡើងបន្ទាប់ពីប្រទេសនេះ បានទទួលតំណែងជាប្រធានដឹកនាំក្រុមប្រទេស LDC លើការប្រែប្រួលអាកាសធាតុ សម្រាប់អាណត្តិ ឆ្នាំ២០២៦-២០២៧។

ថ្នាក់ដឹកនាំប្រទេសអភិវឌ្ឍន៍តិចតួចទាំង ៤៤ នឹងធ្វើការពិនិត្យ និងពិភាក្សា លើបញ្ហានៃការប្រែប្រួលអាកាសធាតុ ជំរុញឱ្យមានការគាំទ្រផ្នែកហិរញ្ញវត្ថុសម្រាប់ការបន្ស៊ាំ និងការខូចខាតបាត់បង់ ព្រមទាំងការរក្សាកម្រិតកំដៅផែនដីមិនឱ្យលើសពី ១,៥ អង្សាសេ។

លទ្ធផលនៃកិច្ចប្រជុំ នឹងបញ្ជូនទៅកាន់កិច្ចប្រជុំកំពូល លើកទី៣១ នៃសន្និសីទភាគីនៃអនុសញ្ញាក្របខ័ណ្ឌ អង្គការសហប្រជាជាតិស្តីពីការប្រែប្រួលអាកាសធាតុ (COP31) នៅប្រទេសទួរគីយ៉េ នាខែវិច្ឆិកា ឆ្នាំ២០២៦ ខាងមុខ៕

ដោយ៖ង៉ាន់ ទិត្យ