កម្ពុជាទាមទារឱ្យថៃបញ្ឈប់ជាបន្ទាន់នូវការរំលោភដែនដី នៅឧត្តរមានជ័យ និងបន្ទាយមានជ័យ

រាជរដ្ឋាភិបាលកម្ពុជា តាមរយៈក្រសួងការបរទេស បានប្រកាសទាមទារឱ្យភាគីថៃ បញ្ឈប់ជាបន្ទាន់នូវរាល់សកម្មភាពរំលោភបំពានដែនដីដោយខុសច្បាប់ក្នុងខេត្តឧត្តរមានជ័យ និងខេត្តបន្ទាយមានជ័យ។

ក្រសួងការបរទេស និងសហប្រតិបត្តិការអន្តរជាតិកម្ពុជាបានប្រកាសតវ៉ាយ៉ាងម៉ឺងម៉ាត់ជាថ្មីទៀត ចំពោះការរំលោភបំពានជាបន្តបន្ទាប់ដោយប្រទេសថៃ មកលើអធិបតេយ្យ និងបូរណភាពទឹកដីរបស់កម្ពុជា ក្នុងតំបន់មួយចំនួនដែលកាន់កាប់ដោយខុសច្បាប់ដោយកងកម្លាំងប្រដាប់អាវុធថៃចាប់តាំងពីខែធ្នូ ឆ្នាំ២០២៥ មក។

យោងតាមសេចក្តីប្រកាសរបស់ក្រសួងចុះថ្ងៃទី ៨ កញ្ញា និងត្រូវបានផ្សព្វផ្សាយនៅថ្ងៃពុធទី៩ ខែកញ្ញានេះ បានគូសបញ្ជាក់ថា កាលពីថ្ងៃទី៣១ ខែសីហា ឆ្នាំ២០២៦ កងកម្លាំងប្រដាប់អាវុធថៃបានវាយកម្ទេចផ្ទះរបស់ប្រជាពលរដ្ឋខ្មែរចំនួន២ខ្នង នៅតំបន់បឹងត្រកួន ស្ថិតក្នុងភូមិត្រពាំងសំរោង ឃុំគោករមៀត ស្រុកថ្មពួក ខេត្តបន្ទាយមានជ័យ។ បន្ទាប់មក ថៃបានប្រើប្រាស់គ្រឿងចក្រធុនធ្ងន់ឈូសឆាយដីលើកទំនប់ ដើម្បីត្រៀមសាងសង់សំណង់យោធារឹងមាំអចិន្ត្រៃយ៍។ បន្ថែមពីនេះ ចាប់ពីថ្ងៃទី១ ដល់ថ្ងៃទី៣ ខែកញ្ញាកងកម្លាំងប្រដាប់អាវុធថៃបានបញ្ជូនគ្រឿងចក្រធុនធ្ងន់ដើម្បីសាងសង់លេណដ្ឋានយោធានៅបរិវេណវត្តអូរស្មាច់ ស្ថិតក្នុងសង្កាត់អូរស្មាច់ ក្រុងសំរោង ខេត្តឧត្តរមានជ័យ។

ប្រភពដដែលបន្តថា ចាប់ពីថ្ងៃទី៤ ដល់ថ្ងៃទី៧ ខែកញ្ញា ភាគីថៃបានប្រើប្រាស់គ្រឿងម៉ាស៊ីនជីកអណ្តូងទឹកមួយកន្លែងនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ហើយនៅថ្ងៃទី៧ ខែកញ្ញា ថៃក៏បានវាយបំបែកសំណង់ស៊ីវិលកម្ពុជា ក្នុងភូមិប្រាសាទ ស្ថិតក្នុងឃុំ និងស្រុកខាងលើផងដែរ។

លើសពីនេះ នៅថ្ងៃទី៧ ខែកញ្ញាដដែល នាយឧត្តមសេនីយ៍ទ័ពជើងអាកាសថៃ ប្រាប៉ាស ស៊ុមឆៃដេត(Prapas Somchaidee) បាននាំក្រុមអ្នកសង្កេតការណ៍ប្រចាំប្រទេសថៃ រួមនឹងអ្នកសារព័ត៌មាន ចុះពិនិត្យអគារមួយចំនួននៅទិសអាគ្នេយ៍នៃសណ្ឋាគារ រ៉ូយ៉ាល់ អូរស្មាច់ ស្ថិតក្នុងសង្កាត់អូរស្មាច់ ខេត្តឧត្តរមានជ័យ ដែលកងកម្លាំងថៃបានចូលកាន់កាប់ខុសច្បាប់ចាប់តាំងពីខែធ្នូ ឆ្នាំ២០២៥។

កម្ពុជាបានគូសបញ្ជាក់ថា ការចូលមកទីតាំងទាំងនោះដោយគ្មានការអនុញ្ញាត គឺជាអំពើរំលោភសកម្មភាពខុសច្បាប់ ហើយកម្ពុជាបដិសេធដាច់ខាតចំពោះការយកលេសបង្ករបទល្មើសដើម្បីរំលោភបំពានដែនដី។ សកម្មភាពទាំងនេះគ្មានអនុភាពផ្លូវច្បាប់ឡើយ ព្រោះរវាងរាជរដ្ឋាភិបាលកម្ពុជា និងរាជរដ្ឋាភិបាលថៃ មានអនុស្សរណៈនៃការយោគយល់គ្នាចុះថ្ងៃទី១៤ ខែមិថុនា ឆ្នាំ២០០០ ស្តីពីការវាស់វែង និងខណ្ឌសីមាព្រំដែនគោក និងសេចក្តីប្រកាសរួមនៃកិច្ចប្រជុំវិសាមញ្ញលើកទី៣ របស់គណៈកម្មាធិការព្រំដែនទូទៅ (GBC) ចុះថ្ងៃទី២៧ ខែធ្នូ ឆ្នាំ២០២៥ ដែលបានព្រមព្រៀងប្រគល់ជូនគណៈកម្មាធិការចម្រុះខណ្ឌសីមាព្រំដែនគោក (JBC) បន្តការងារវាស់វែង និងបោះបង្គោលព្រំដែនឱ្យបានឆាប់បំផុត។

កម្ពុជាប្រកាសមិនទទួលស្គាល់ខ្សែបន្ទាត់ព្រំដែន ឬការទាមទារទឹកដីឯកតោភាគីដោយប្រទេសថៃឡើយ ហើយសកម្មភាពខុសច្បាប់ទាំងនោះនឹងមិនប៉ះពាល់ដល់សិទ្ធិស្របច្បាប់ ឬជំហររបស់កម្ពុជាទាក់ទងនឹងព្រំដែនអន្តរជាតិឡើយ។ រាជរដ្ឋាភិបាលទាមទារឱ្យថៃបញ្ឈប់រាល់សកម្មភាពខុសច្បាប់ទាំងនេះ គោរពការប្តេជ្ញាចិត្តក្នុងការបន្ថយស្ថានការណ៍ លើកកម្ពស់ទំនុកចិត្តគ្នាទៅវិញទៅមក និងសម្រួលដល់ការដោះស្រាយជម្លោះដោយសន្តិវិធី ដើម្បីស្ថិរភាព និងទំនាក់ទំនងល្អនៅតាមបណ្តោយព្រំដែន ព្រមទាំងប្រកាន់ខ្ជាប់នូវជំហរដាច់ខាតថា ខ្សែបន្ទាត់ព្រំដែនមិនត្រូវផ្លាស់ប្តូរដោយកម្លាំងនោះឡើយ៕