ពាក់ព័ន្ធការផ្សព្វផ្សាយវីដេអូលើបណ្តាញសង្គមអំពីករណីនារីម្នាក់ឆ្លៀតលេងហ្គេមទូរសព្ទក្នុងពេលបម្រើសេវាសុរិយោដីដល់ប្រជាពលរដ្ឋ រដ្ឋបាលឃុំកញ្ចំ ស្រុកពារាំង ខេត្តព្រៃវែង បានបំភ្លឺថា នារីរូបនោះមិនមែនជាមន្ត្រីសុរិយោដី ឬក៏ជាមន្ត្រីកិច្ចសន្យាទេ។

យោងតាមអាជ្ញាធរឃុំ នាងឈ្មោះ ណាក់ ស្រីនិច ដែលទើបនឹងប្រឡងសញ្ញាបត្រមធ្យមសិក្សាទុតិយភូមិចប់ ហើយបានមកសុំជួយបំពេញការងារខ្លះៗទុកជាបទពិសោធន៍ ដោយទទួលភារកិច្ចជាអ្នកជួយផ្តិតមេដៃប្រគល់ប័ណ្ណកម្មសិទ្ធិជូនប្រជាពលរដ្ឋ។

ក្នុងសេចក្តីបំភ្លឺចុះថ្ងៃទី១៧កញ្ញា រដ្ឋបាលឃុំកញ្ចំរៀបរាប់ថា រឿងហេតុកើតឡើងនៅវេលាម៉ោងប្រហែលពីររសៀល ថ្ងៃទី១៥ ខែកញ្ញា ឆ្នាំ២០២៦ ដោយនារីរូបនោះ«ឆ្លៀតពេលប្រើទូរសព្ទបន្តិច» ក្រោយពេលសម្រាកបាយថ្ងៃត្រង់ ហើយពេលនោះ ឯកសារក៏មិនទាន់មកដល់ដែរ៕