យោងតាមឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កសិករចំនួន ៣៤៩ គ្រួសារ មកពីសហគមន៍កសិកម្មទំនើបដំណាំស្រូវព្រះនេត្រព្រះមានជ័យ និងសហគមន៍កសិកម្មទំនើបស្រូវអង្ករសុវត្ថិភាពស្រុកឯកភ្នំ បានរួមគ្នាចុះកិច្ចព្រមព្រៀងផលិតកម្មកសិកម្មតាមកិច្ចសន្យា លើផ្ទៃដីសរុប ១ ៥១៧ ហិកតា។

កិច្ចសន្យានេះធ្វើឡើងដើម្បីផ្គត់ផ្គង់ស្រូវផ្ការំដួល ស្រូវសែនក្រអូប និងស្រូវស្រង៉ែស្រាលជូនក្រុមហ៊ុន បៃតងកម្ពុជា ដោយផ្អែកលើតម្លៃទីផ្សារជាក់ស្តែង បូករួមទាំងការផ្តល់បុព្វលាភ គឺប្រាក់លើកទឹកចិត្តបន្ថែម ពី ៣០ ទៅ ៦០ រៀលក្នុងមួយគីឡូក្រាម។

ឯកឧត្តម ឃឹម ហ្វីណង់ បញ្ជាក់ថា តាមរយៈការសម្របសម្រួលតភ្ជាប់ទីផ្សារទុកជាមុនពីក្រសួងកសិកម្ម បងប្អូនកសិករជាសមាជិកសហគមន៍កសិកម្មទំនើប នឹងទទួលបានអត្ថប្រយោជន៍សំខាន់ៗជាច្រើនដូចជា ទទួលបានតម្លៃសមរម្យ និងការការពារពីហានិភ័យទីផ្សារ ព្រមទាំងធាតុចូល មានជាអាទិ៍ ពូជ ជី និងថ្នាំ មានគុណភាពខ្ពស់ និងតម្លៃទាបជាងទីផ្សារ។ ជាពិសេសទៅទៀតនោះ កសិករអាចទទួលបានទុនបង្វិលមានអត្រាការប្រាក់ទាប ពេញមួយរដូវកាលផលិតកម្ម៕