អូតាវ៉ា ៖ ក្រុមហ៊ុនស្រាវជ្រាវផ្នែកបញ្ញាសិប្បនិម្មិត Transluce និយាយ កាលពីថ្ងៃពុធថា ភ្នាក់ងារ AI អនាមិក បានព្យាយាមវាយប្រហារចូលទៅក្នុងគេហទំព័ររបស់រដ្ឋាភិបាលប្រទេសកាណាដា ខណៈដែលមានការសង្ស័យថា ជាស្នាដៃរបស់ក្រុមហ៊ុន OpenAI ព្រោះសហគ្រាសបច្ចេកវិទ្យាអាមេរិកដ៏ធំមួយនេះ ធ្លាប់មានប្រវត្ថិបង្កបញ្ហាស្រដៀងគ្នា ទៅលើរដ្ឋាភិបាលទីក្រុង អូតាវ៉ា ដូចគ្នា កាលពីពេលមុន។

បើតាមប្រភព, ភ្នាក់ងារបញ្ញាសិប្បនិម្មិតទាំងនោះបានប៉ុនប៉ងចូលទៅកាន់ប្រព័ន្ធរបស់បណ្ណាល័យ និងបណ្ណសារជាតិ នៅថ្ងៃទី២៨ ខែឧសភា និងថ្ងៃទី៩ ខែមិថុនា។ ប៉ុន្តែ មិនមានសញ្ញាណាមួយបង្ហាញថា ប្រព័ន្ធរបស់រដ្ឋាភិបាលកាណាដាទាំងនោះ ត្រូវបានរំលោភបំពាន ឬ ជ្រៀតចូលបានសម្រេច នៅពេលនេះទេ។

នៅក្នុងរបាយការណ៍អំពីសកម្មភាពនេះ ហើយដែលផ្ញើទៅកាន់រដ្ឋាភិបាល, ក្រុមហ៊ុន Transluc រៀបរាប់ថា ហេតុផលដែលមានការសង្ស័យ លើក្រុមហ៊ុន OpenAI ព្រោះថា កម្មវិធី AI របស់ក្រុមហ៊ុនអាមេរិកមួយនេះបានជ្រៀតចូលទៅក្នុងប្រព័ន្ធទិន្នន័យសុខាភិបាលរបស់រដ្ឋាភិបាល កាលពីខែមិថុនាផងដែរ ដោយបានចូលទៅបំពានលើឯកសារនានា ដោយគ្មានការអនុញ្ញាត។

ក្រោយមក ក្រុមហ៊ុន OpenAI បានចេញសេចក្តីសុំទោស ចំពោះបញ្ហានេះ កាលពីសប្តាហ៍មុន ដោយលើកហេតុផលថា ភ្នាក់ងារ AI ទាំងនេះ លែងស្ថិតក្រោមការគ្រប់គ្រង។

ប៉ុន្តែ សម្រាប់ករណីចុងក្រោយនេះ ត្រូវបានអ្នកនាំពាក្យក្រុមហ៊ុន OpenAI ឆ្លើយតបថា ខ្លួនកំពុងពិនិត្យមើលព័ត៌មាន ព្រទាំង បានធ្វើបទបង្ហាញបឋម ជូនដល់មន្ត្រីកាណាដាដែលកំពុងស៊ើបអង្កេត រួចរាល់ហើយដែរ។

បើតាម CNA, ករណី ភ្នាក់ងារបញ្ញាសិប្បនិម្មិតលួចចូលវាយប្រហារគេហទំព័ររដ្ឋាភិបាលកាណាដា ទាំងពីរលើកនេះ បានកើតមានឡើង ចំពេលដែលប្រទេសនានាជួបការលំបាក ក្នុងការតាមឱ្យទាន់ការរីកចម្រើននៃបច្ចេកវិទ្យាចុងក្រោយនេះ។

បណ្តាក្រុមហ៊ុន AI ឈានមុខគេរបស់ពិភពលោក បាននិងកំពុងព្រមានអំពីហានិភ័យដែលបង្កឡើងចំពោះមនុស្សជាតិ ដោយអំពាវនាវឱ្យរដ្ឋាភិបាលនានាសហការគ្នាជាបន្ទាន់ ដើម្បីគ្រប់គ្រងបច្ចេកវិទ្យា ដែលកាន់តែមានឥទ្ធិពលខ្លាំងប្រភេទនេះ៕

ប្រភព ៖ CNA ប្រែសម្រួល ៖ សារ៉ាត