គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប កំពុងតាមដានបញ្ហាទឹកជំនន់ ដោយសារតាមបណ្ដា​ខេត្តខ្លះទឹកនៅលិចនៅឡើយ ខណៈដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ នៅតាមឃុំ សង្កាត់ទូទាំងប្រទេស នឹងចាប់ផ្ដើមពីថ្ងៃទី៧ ខែតុលា ឆ្នាំ២០២៦នេះ។

ឯកឧត្ដម ហង្ស ពុទ្ធា សមាជិក គ.ជ.ប និងជាប្រធានក្រុមអ្នកនាំពាក្យ គ.ជ.ប ប្រាប់បណ្ដាញព័ត៌មាន AMS នៅថ្ងៃសុក្រនេះថា បញ្ហាទឹកជំនន់ធ្វើឲ្យ គ.ជ.ប មានការព្រួយបារម្ភខ្លះចំពោះដំណើរពិនិត្យបញ្ជីឈ្មោះ និងការចុះឈ្មោះបោះឆ្នោត។

យ៉ាងណា ប្រធានក្រុមអ្នកនាំពាក្យ គ.ជ.ប បានបញ្ជាក់ថា ការពិនិត្យបញ្ជីឈ្មោះ និងការចុះឈ្មោះបោះឆ្នោត​​នឹងធ្វើនៅតាមការិយាល័យឃុំ សង្កាត់ទូទាំងប្រទេសមានចំនួន ១ ៦៥២ឃុំ/សង្កាត់។ ក្នុងករណីទឹកជំនន់លិចការិយាល័យឃុំ សង្កាត់ណា នោះ គ.ជ.ប នឹងសហការជាមួយអាជ្ញាធរធ្វើការផ្លាស់ប្ដូរទីតាំងដែលមានសុវត្ថិភាព។

សូមបញ្ជាក់ថា ការពិនិត្យបញ្ជីឈ្មោះ និងការចុះឈ្មោះបោះឆ្នោតនៅតាមឃុំ សង្កាត់ទូទាំងប្រទេស មានរយៈពេល ៥៥ថ្ងៃ ដោយត្រូវអនុវត្តចាប់ពីថ្ងៃទី៧ ខែតុលា ដល់ថ្ងៃទី៣០ ខែវិច្ឆិកា ឆ្នាំ២០២៦។ បញ្ជីបោះឆ្នោតផ្លូវការឆ្នាំ២០២៥ មានឈ្មោះអ្នកបោះឆ្នោតចំនួនជាង ១០លាននាក់។

ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ គឺជាដំណាក់កាលសំខាន់មួយក្នុងការរៀបចំបញ្ជីបោះឆ្នោតសម្រាប់បម្រើឱ្យការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ដែលនឹងប្រ​ព្រឹត្តទៅនៅថ្ងៃទី៦ ខែមិថុនា ឆ្នាំ២០២៧៕

សេង បារាំង AMS