អជ្ញាធរកម្ពុជា និងវៀតណាម បានសម្រេចបើកច្រកព្រំដែនអន្តរជាតិផ្លូវគោកថ្មីបន្ថែមមួយទៀត ដើម្បីបង្កើនភាពងាយស្រួលដល់ការធ្វើដំណើរកម្សាន្ត ការផ្លាស់ប្តូរពាណិជ្ជកម្ម និងកិច្ចសហប្រតិបត្តិការរវាងប្រទេសទាំងពីរ។

ការដំឡើងកម្រិត និងបើកដំណើរការជាផ្លូវការនូវច្រកទ្វារព្រំដែនអន្តរជាតិជ្រៃធំ ប្រទេសកម្ពុជា ទល់មុខនឹងច្រកទ្វារព្រំដែនអន្តរជាតិ ខាញ់ប៊ិញ ប្រទេសវៀតណាមនេះ គឺជាសមិទ្ធផលប្រវត្តិសាស្ត្រថ្មីមួយទៀត ដែលស្តែងឱ្យឃើញពីការរីកចម្រើននៃទំនាក់ទំនងមិត្តភាព ប្រពៃណី និងកិច្ចសហប្រតិបត្តិការគ្រប់ជ្រុងជ្រោយរវាងកម្ពុជា និងវៀតណាម។

ពិធីបើកដំណើរការជាផ្លូវការត្រូវបានរៀបចំឡើងកាលពីថ្ងៃទី៣ ខែតុលា ឆ្នាំ២០២៦ ក្រោមវត្តមានឯកឧត្ដម គួច ចំរើន អភិបាលខេត្តកណ្ដាល និងលោក ហូ វ៉ាន់មឹង ប្រធានគណៈកម្មាធិការប្រជាជនខេត្តអានយ៉ាង។

អ្នកឧកញ៉ា ស៊ិន ចន្ធី អនុប្រធានសមាគមភស្តុភារកម្មកម្ពុជា ចាត់ទុកការបើកច្រកព្រំដែនអន្តរជាតិថ្មីរវាងកម្ពុជា និងវៀតណាម គឺជាការបោះជំហ៊ានថ្មីនៃការតភ្ជាប់ផ្លូវសេដ្ឋកិច្ច និងពាណិជ្ជកម្មទ្វេភាគី ជាពិសេសជួយកាត់បន្ថយពេលវេលា និងថ្លៃដឹកជញ្ជូនទំនិញចេញ-ចូលរបស់ប្រទេសទាំងពីរ។

ចំណែកលោកបណ្ឌិត ញិល រដ្ឋា អ្នកជំនាញវិទ្យាសាស្រ្តនយោបាយ និងសេដ្ឋកិច្ចអន្តរជាតិ ចាត់ទុកការបើកច្រកព្រំដែនថ្មីនេះថា ជាការឆ្លុះបញ្ចាំងផ្នែកសេដ្ឋកិច្ច និងនយោបាយរបស់ប្រទេសទាំងពីរ។ លោកយល់ឃើញថា ច្រកទ្វារព្រំដែន​នេះមិនត្រឹមតែដើរតួនាទីយ៉ាងសំខាន់ក្នុងការសម្រួលដល់ការធ្វើដំណើររបស់ប្រជាពលរដ្ឋ និងទេសចរអន្តរជាតិ ប៉ុណ្ណោះទេ ប៉ុន្តែវានឹងក្លាយជាច្រករបៀងសេដ្ឋកិច្ច និងពាណិជ្ជកម្មដ៏សកម្ម។

សម្រាប់លោកបណ្ឌិត ញិល រដ្ឋា ការបើកច្រកនេះនឹងអាចបង្កើនការនាំចេញផលិតផលកសិកម្មរបស់កម្ពុជាទៅកាន់ប្រទេសវៀតណាម ជាពិសេសកាត់បន្ថយពេលវេលា និងថ្លៃដើមនៃការដឹកជញ្ជូនទំនិញ ។

អ្នកជំនាញរូបនេះ ក៏បានកត់សម្គាល់ពីការកើនឡើងគួរឲ្យកត់សម្គាល់នៃទំហំពាណិជ្ជកម្មទ្វេភាគីរវាងកម្ពុជា និងវៀតណាម នៅក្នុងរយៈពេលប៉ុន្មានឆ្នាំចុងក្រោយនេះ ស្របពេលប្រទេសទាំងពីរបានកំណត់គោលដៅជំរុញទំហំពាណិជ្ជកម្មទ្វេភាគីឱ្យឈានដល់ ២០ពាន់លានដុល្លារនៅពេលខាងមុខ។

លោកបណ្ឌិត ញិល រដ្ឋា ជឿជាក់ថាទំហំពាណិជ្ជកម្មទ្វេភាគីរបស់ប្រទេសទាំងពីរ នឹងអាចសម្រេចតាមគោលដៅ ២០ពាន់លានដុល្លារ តាមរយៈកិច្ចសហប្រតិបត្តិផ្នែកសេដ្ឋកិច្ច ពាណិជ្ជកម្ម និងនយោបាយ ជាបន្តបន្ទាប់នាពេលកន្លងមក។

យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា នៅក្នុងរយៈពេល ៨ខែ ឆ្នាំ២០២៦ ទំហំពាណិជ្ជកម្មទ្វេភាគីរវាងកម្ពុជា និងវៀតណាម សម្រេចបានជិត ៦ពាន់លានដុល្លារ កើនឡើង ៧ភាគរយ បើធៀបនឹងរយៈពេលដូចគ្នាកាលពីឆ្នាំមុន៕

ខន ណារី AMS