ដំណើរទស្សនកិច្ចផ្លូវការរបស់លោកនាយករដ្ឋមន្ត្រីវៀតណាម ឡេ មិញ ហ៊ុង នៅកម្ពុជានៅថ្ងៃទី៩ និងថ្ងៃទី១០ ខែតុលានេះ មានគោលដៅជំរុញទំនាក់ទំនងទ្វេភាគីលើគ្រប់វិស័យ។ នេះបើតាមការលើកឡើងរបស់លោក ង្វៀន មិញ វូ ឯកអគ្គរដ្ឋទូតវៀតណាមប្រចាំកម្ពុជា ដែលត្រូវបានទីភ្នាក់ងារសារព័ត៌មានវៀតណាមដកស្រង់កាលពីថ្ងៃទី០៧ ខែតុលា ឆ្នាំ២០២៦។

លោកឯកអគ្គរដ្ឋទូតបានលើកឡើងថា ទោះបីជាមានការអភិវឌ្ឍអន្តរជាតិ និងតំបន់ដ៏ស្មុគស្មាញ និងមិនអាចទាយទុកជាមុនបានក៏ដោយ ដំណើរទស្សនកិច្ចនេះឆ្លុះបញ្ចាំងពីការប្តេជ្ញាចិត្តរបស់វៀតណាមក្នុងការធ្វើការជាមួយកម្ពុជា ដើម្បីរក្សាបរិយាកាសសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍរួមគ្នានៅក្នុងតំបន់ ក៏ដូចជាលើកកម្ពស់កិច្ចសហប្រតិបត្តិការទ្វេភាគីលើគ្រប់វិស័យ។

លោក ង្វៀន មិញ វូ បានលើកឡើងថា ដំណើរទស្សនកិច្ចនេះនឹងផ្តល់ឱកាសសម្រាប់ភាគីទាំងពីរដើម្បីពិនិត្យ និងដោះស្រាយបញ្ហា និងឧបសគ្គដែលនៅសេសសល់ក្នុងកិច្ចសហប្រតិបត្តិការទ្វេភាគី ធ្វើឱ្យជាក់ស្តែង និងសម្រេចបាននូវការប្តេជ្ញាចិត្ត និងកិច្ចព្រមព្រៀងដែលមានស្រាប់ និងកំណត់ទិសដៅយុទ្ធសាស្ត្រថ្មី និងអាទិភាពសម្រាប់ទំនាក់ទំនងទ្វេភាគីក្នុងរយៈពេលខាងមុខ។

លោកបានមានប្រសាសន៍ថា រដ្ឋមន្ត្រី ថ្នាក់ដឹកនាំតាមវិស័យ និងតំណាងធុរកិច្ចវៀតណាមមួយចំនួននឹងអមដំណើរលោកនាយករដ្ឋមន្ត្រី ខណៈដែលភាគីទាំងពីរគ្រោងនឹងចុះហត្ថលេខាលើឯកសារសហប្រតិបត្តិការមួយចំនួន។

លោក ង្វៀន មិញ វូ បានគូសបញ្ជាក់ថា កិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងវិនិយោគ គឺជាវិស័យដែលប្រទេសទាំងពីរត្រូវផ្តោតការយកចិត្តទុកដាក់បន្ថែមទៀត។ លោកបញ្ជាក់ថា កម្ពុជា និងវៀតណាម អាចទាញយកអត្ថប្រយោជន៍ពីភាពបំពេញបន្ថែមគ្នារវាងសេដ្ឋកិច្ចរបស់ប្រទេសទាំងពីរ ដើម្បីពង្រឹងកិច្ចសហប្រតិបត្តិការ និងបង្កើនទំហំពាណិជ្ជកម្មទ្វេភាគី ឈានទៅសម្រេចគោលដៅ ២០ពាន់លានដុល្លារអាមេរិកក្នុង១ឆ្នាំនៅពេលដ៏ខ្លីខាងមុខ។

លោកឯកអគ្គរដ្ឋទូតវៀតណាមបានកត់សម្គាល់ថា ទំហំពាណិជ្ជកម្មទ្វេភាគីរវាងកម្ពុជា និងវៀតណាម បានកើនដល់កម្រិតកំណត់ត្រា ១១,៣ពាន់លានដុល្លារអាមេរិក ក្នុងឆ្នាំ២០២៥។ ដោយឡែក ក្នុងរយៈពេល៨ខែដំបូងនៃឆ្នាំ២០២៦ ទំហំពាណិជ្ជកម្មរវាងប្រទេសទាំងពីរ សម្រេចបានប្រមាណ ៨,៧ពាន់លានដុល្លារអាមេរិក កើនឡើង ៨,៣% បើធៀបនឹងរយៈពេលដូចគ្នាកាលពីឆ្នាំមុន។ បច្ចុប្បន្ន វៀតណាមគឺជាដៃគូពាណិជ្ជកម្មធំទី៣របស់កម្ពុជា ជាប្រភពនាំចូលធំទី២ និងជាទីផ្សារនាំចេញធំទី២របស់កម្ពុជា៕

សៅ សុខអេង