ក្រសួងធនធានទឹក និងឧតុនិយម អំពាវនាវជាថ្មីដល់ក្រសួង-ស្ថាប័នពាក់ព័ន្ធ អាជ្ញាធរដែនដី និងសាធារណជន​​ បន្ត​ចូល​រួម​សហការក្នុង​ការ​ថែ​រក្សា​ប្រភព​ទឹកទុក​សម្រាប់រដូ​វប្រាំង​នាពេលខាងមុខ​ និងចូលរួម​ប្រើប្រាស់​ទឹក​ដោយ​សន្សំ​សំចៃ​ប្រកបដោយស្មារតីទទួលខុសត្រូវ និង​ប្រុងប្រយ័ត្ន​ខ្ពស់​ ជាពិសេស​បណ្ដា​តំបន់​ជនបទ​ដាច់​ស្រយាល​ពីប្រភព​ទឹក​។
 
ក្រសួងធនធានទឹក និងឧតុនិយម បានណែនាំដល់មន្ទីរធនធានទឹក និងឧតុនិយមរាជធានី-ខេត្តទាំងអស់ ឱ្យបន្តយកចិត្តទុកដាក់ថែរក្សាប្រភពទឹកនៅតាមអាងទឹក បឹង និងបួ ព្រមទាំងរៀបចំផែនការប្រើប្រាស់ទឹកឱ្យបានសមស្រប ដើម្បីធានាការផ្គត់ផ្គង់ទឹកសម្រាប់ជីវភាពប្រចាំថ្ងៃ និងការបង្កបង្កើនផលរបស់កសិករក្នុងរដូវប្រាំងខាងមុខ។
 
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម ចុះថ្ងៃទី១៩ ខែតុលា ឆ្នាំ២០២៦ ការព្យាករ និងការវិភាគលើស្ថានភាពវិវត្តន៍នៃអាកាសធាតុបង្ហាញថា រដូវវស្សាឆ្នាំ២០២៦ នឹងបញ្ចប់ត្រឹមសប្តាហ៍ទី៣ នៃខែតុលានេះ ខណៈបាតុភូតអែលនីញ៉ូ (El Niño) ត្រូវបានព្យាករថា នឹងបន្តស្ថិតក្នុងកម្រិត ១០០% រហូតដល់ខែកុម្ភៈ ឆ្នាំ២០២៧។
 
ក្រសួងបានបញ្ជាក់ថា ការបញ្ចប់ឥទ្ធិពលរបបខ្យល់មូសុងនិរតី និងការកើនឡើងនៃឥទ្ធិពលខ្យល់មូសុងឦសាន អាចធ្វើឱ្យបរិមាណទឹកភ្លៀងមានកម្រិតខ្សោយ។ ទន្ទឹមនឹងនេះ ផ្គរ រន្ទះ ខ្យល់កន្ត្រាក់ និងបាតុភូតអាកាសធាតុមួយចំនួនទៀត ក៏អាចកើតមានឡើងនៅតាមតំបន់មួយចំនួនក្នុងប្រទេសកម្ពុជាផងដែរ។
 
ក្នុងស្ថានភាពនេះ ក្រសួងបានណែនាំឱ្យមន្ទីរជំនាញបន្តថែរក្សាប្រភពទឹកឱ្យបានល្អ ព្រមទាំងពិនិត្យ និងវាយតម្លៃសក្តានុពលទឹកដែលមាន ដើម្បីរៀបចំផែនការប្រើប្រាស់ទឹកដោយផ្តោតលើអាទិភាពសំខាន់ពីរ គឺការផ្គត់ផ្គង់ទឹកសម្រាប់ជីវភាពប្រចាំថ្ងៃរបស់ប្រជាពលរដ្ឋ និងការប្រើប្រាស់ទឹកសម្រាប់ការបង្កបង្កើនផលស្រូវរដូវប្រាំង ព្រមទាំងដំណាំរួមផ្សំ។
 
ជាមួយគ្នានេះ ក្រសួង-ស្ថាប័នពាក់ព័ន្ធ អាជ្ញាធរដែនដី និងប្រជាពលរដ្ឋ ត្រូវបន្តសហការគ្នាក្នុងការថែរក្សាប្រភពទឹកសម្រាប់ត្រៀមប្រើប្រាស់ក្នុងរដូវប្រាំងនាពេលខាងមុខ ព្រមទាំងប្រើប្រាស់ទឹកដោយសន្សំសំចៃ មានការទទួលខុសត្រូវ និងប្រុងប្រយ័ត្នខ្ពស់ ជាពិសេសនៅតំបន់ជនបទដាច់ស្រយាលដែលស្ថិតនៅឆ្ងាយពីប្រភពទឹក។
 
ការក្រើនរំលឹកជាថ្មីឱ្យមានការថែរក្សាទឹកទុក និងការប្រើប្រាស់ទឹកប្រកបដោយប្រសិទ្ធភាពនេះ គឺជាវិធានការសំខាន់មួយក្នុងការត្រៀមលក្ខណៈឆ្លើយតបទៅនឹងការប្រែប្រួលអាកាសធាតុ និងកាត់បន្ថយហានិភ័យនៃគ្រោះរាំងស្ងួតនៅរដូវប្រាំងខាងមុខ៕