ប៉េកាំង ៖ យោធាប្រទេសចិននៅថ្ងៃអង្គារនេះបានប្រកាសចោទប្រកាន់សហរដ្ឋអាមេរិកថា បានលួចបញ្ជូននាវាចម្បាំង USS Charleston ចូលទៅកាន់ដែនទឹករបស់ខ្លួនដែលមានទីតាំងស្ថិតនៅក្នុងតំបន់ប្រជុំកោះ សមុទ្រចិនខាងត្បូង។

បើតាមទីបញ្ជាការដ្ឋានភូមិភាគខាងត្បូងនៃកងទ័ពចិន, នាវាចម្បាំងមួយគ្រឿងនេះបានបើកចូលទៅក្បែរនឹងតំបន់ថ្មប៉ប្រះទឹក ដោយគ្មានការអនុញ្ញាត ពីរដ្ឋាភិបាលចិននៅព្រឹកព្រលឹមថ្ងៃទី២០ ខែតុលានេះ ។

ប្រភពដដែលបញ្ជាក់ថា សកម្មភាពរបស់សហរដ្ឋអាមេរិកបានរំលោភលើសិទ្ធិអធិបតេយ្យភាព និងផលប្រយោជន៍របស់ចិន ព្រមទាំង ធ្វើឱ្យប៉ះពាល់ដល់សន្តិសុខដែនសមុទ្រ , បង្កគ្រោះថ្នាក់ដល់សន្តិភាព និងស្ថិរភាពក្នុងតំបន់»។

ជាមួយគ្នានេះ យោធាចិនអំពាវនាវឲ្យភាគីអាមេរិកគួរតែបញ្ឈប់សកម្មភាពបែបនេះជាបន្ទាន់ ខណៈកងទ័ពជើងទឹករបស់ទីក្រុងប៉េកាំងក៏បាននិងកំពុងបញ្ជូនកងកម្លាំងទៅតាមដាន និងឃ្លាំមើលនាវាចម្បាំង USS Charleston មួយគ្រឿងនោះ យ៉ាងជាប់លាប់ផងដែរ ។

រហូតមកដល់ពេលនេះ កងទ័ពជើងទឹកសហរដ្ឋអាមេរិក មិនបានឆ្លើយតបភ្លាមៗ ចំពោះសំណើសុំការអត្ថាធិប្បាយនោះទេ ។ យ៉ាងណា ទីក្រុងវ៉ាស៊ីនតោន ធ្លាប់បានហៅបេសកកម្មបែបនេះថាជា «ប្រតិបត្តិការសេរីភាពនៃការធ្វើនាវាចរណ៍» ខណៈកាលពីជាងមួយឆ្នាំមុន, អាមេរិកក៏បានធ្វើប្រតិបត្តិការស្រដៀងគ្នានេះ នៅក្នុងសមុទ្រចិនខាងត្បូងផងដែរ៕

ប្រភព ៖ reuters, ប្រែសម្រួល ៖ សារ៉ាត