​សារមន្ទីរតេជោសន្តិភាព ក្នុងខេត្តសៀមរាប បានបញ្ចប់ការសាងសង់ហើយ គ្រោងនឹងសម្ពោធជាផ្លូវការនៅខែធ្នូខាងមុខ។ ចំណុចលេចធ្លោមួយនៃសារមន្ទីរនេះ គឺអគារមួយដែលមានរាងជាគ្រាប់មីន សាងសង់ក្រោមជំនួយឥតសំណងប្រមាណ១៨លានដុល្លាអាមេរិករបស់រដ្ឋាភិបាល និងប្រជាជនជប៉ុន។ អគារនេះនឹងក្លាយជាមណ្ឌលសម្រាប់ការសិក្សាស្រាវជ្រាវអំពីដំណើរការស្វែងរកសន្តិភាពយ៉ាងលំបាកនៅកម្ពុជា។
 
អគារសន្តិភាព នៃសារមន្ទីរតេជោសន្តិភាព ក្នុងខេត្តសៀមរាប ដែលសាងសង់ក្រោមជំនួយឥតសំណងប្រមាណ ១៨លានដុល្លារអាមេរិក របស់រដ្ឋាភិបាល និងប្រជាជនជប៉ុន នឹងក្លាយជាមជ្ឈមណ្ឌលសម្រាប់ភ្ញៀវទេសចរជាតិ និងអន្តរជាតិ សិក្សាស្វែងយល់បន្ថែមអំពីប្រវត្តិនៃសង្គ្រាម ការតស៊ូស្វែងរកសន្តិភាព និងដំណើរការកសាងសន្តិភាពដ៏លំបាកនៅកម្ពុជា។ អគារនេះក៏នឹងបង្ហាញពីចំណងមិត្តភាព និងការគាំទ្ររបស់ប្រទេសជប៉ុនចំពោះកម្ពុជាក្នុងការកសាង និងថែរក្សាសន្តិភាពផងដែរ។
 
នេះបើតាមការឱ្យដឹងរបស់លោក អ៊ុង រស្មី មន្ត្រីជំនាញនៃមជ្ឈមណ្ឌលសកម្មភាពកម្ចាត់មីនកម្ពុជា (CMAC) ក្នុងឱកាសទទួលបដិសណ្ឋារកិច្ច និងធ្វើបទបង្ហាញជូនក្រុមអ្នកសារព័ត៌មាន ដែលបានអញ្ជើញបំពេញទស្សនកិច្ចនៅសារមន្ទីរតេជោសន្តិភាព ឬសារមន្ទីរមីន ក្នុងខេត្តសៀមរាប នារសៀលថ្ងៃទី៣ ខែវិច្ឆិកា ឆ្នាំ២០២៦។
 
លោកបានឱ្យដឹងបន្ថែមថា អគារនេះនឹងចូលរួមផ្សព្វផ្សាយដល់សាធារណជនអំពីប្រវត្តិសង្គ្រាម ដែលប្រជាជនកម្ពុជាបានឆ្លងកាត់ក្នុងអតីតកាល ព្រមទាំងដំណើរការស្វែងរក និងសម្រេចបាននូវសន្តិភាព ដែលបានផ្តល់ឱកាសឱ្យប្រជាជនកម្ពុជារស់នៅក្រោមម្លប់សន្តិភាពដូចសព្វថ្ងៃ។ ទន្ទឹមនឹងនេះ អគារនេះក៏នឹងបម្រើជាកន្លែងសិក្សា និងស្វែងយល់សម្រាប់ភ្ញៀវទេសចរជាតិ និងអន្តរជាតិផងដែរ។
 
បើតាមលោក អ៊ុង រស្មី សារមន្ទីរតេជោសន្តិភាពគ្រោងនឹងរៀបចំពិធីសម្ពោធដាក់ឱ្យប្រើប្រាស់នៅអំឡុងខែធ្នូ ចុងឆ្នាំ២០២៦ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
 
ដោយឡែក លោក យ៉ាកូ យ៉ូស៊ីតុ (Yako Yoshito) តំណាងការិយាល័យ JICA ប្រចាំកម្ពុជា បានមានប្រសាសន៍ថា កម្ពុជាបានប្រឈមមុខនឹងបញ្ហាមីនអស់រយៈពេលជាច្រើនទសវត្សរ៍មកហើយ។ ក្នុងដំណើរការដោះស្រាយបញ្ហានេះ កម្ពុជាបានប្រមូលផ្តុំបទពិសោធន៍ និងចំណេះដឹងជាច្រើនពាក់ព័ន្ធនឹងសកម្មភាពដោះមីន។
 
លោកបានបញ្ជាក់ថា បច្ចុប្បន្ន បទពិសោធន៍ និងបច្ចេកទេសទាំងនេះត្រូវបានយកទៅប្រើប្រាស់ក្នុងការដោះស្រាយបញ្ហាមីន និងគ្រាប់មិនទាន់ផ្ទុះ ព្រមទាំងការបណ្តុះបណ្តាលធនធានមនុស្សនៅក្នុងប្រទេសដទៃទៀតផងដែរ។ ​
 
សូមបញ្ជាក់ថា ក្រៅពីការតាំងបង្ហាញវត្ថុប្រវត្តិសាស្ត្រ សារមន្ទីរតេជោសន្តិភាពនឹងផ្តោតលើការអប់រំ ការបណ្តុះបណ្តាល ការផ្សព្វផ្សាយចំណេះដឹងអំពីសកម្មភាពមីន និងការកសាងសន្តិភាព៕
 
ដោយ៖ ង៉ាន់ ទិត្យ
រូបភាព៖ រិន រចនា