អង់ការ៉ា ៖ ប្រធានាធិបតីតួកគី លោក Recep Tayyip Erdogan កាលពីថ្ងៃ សុក្រ បានរិះគន់យ៉ាងចាស់ដៃលើសហគមន៍អន្តរជាតិ ដែលបរាជ័យមិនអាចដោះស្រាយទង្វើឈ្លានពានរបស់អ៊ីស្រាអែលនៅក្នុងទឹកដីប៉ាឡេស្ទីន ដោយព្រមានថា ប្រព័ន្ធអន្តរជាតិបច្ចុប្បន្នកំពុងដួលរលំក្នុងការធានាសន្តិភាព និងសន្តិសុខពិភពលោក ។

ថ្លែងក្នុងពិធីបើកវេទិកា TRT World Forum 2026 នៅមជ្ឈមណ្ឌលសន្និបាតអ៊ីស្តង់ប៊ុល មេដឹកនាំតួកគីរូបនេះ បានបញ្ជាក់ថា អំពើភេរវកម្មរបស់អ្នកកាន់កាប់អ៊ីស្រាអែល ដែលប៉ុនប៉ងបង្ខំឱ្យប្រជាជនប៉ាឡេស្ទីនចាកចេញពីទឹកដីដូនតារបស់ពួកគេ កាន់តែមានភាពក្លាហាន និងកាចសាហាវឡើងពីមួយថ្ងៃទៅមួយថ្ងៃ ក្រោមក្រសែភ្នែកដ៏ព្រងើយកន្តើយនៃពិភពលោកសម័យទំនើប ។

លោក Erdogan បានចោទប្រកាន់ស្ថាប័នអន្តរជាតិដែលមានភារកិច្ចធានាសន្តិភាព និងស្ថិរភាពថា បានត្រឹមតែឈរមើលពីខាងក្រៅ ដូចអ្វីដែលធ្លាប់បានកើតឡើងនៅប្រទេសរវ៉ាន់ដា និងតំបន់ស្រេប្រេនីកា នៃប្រទេសបូស្នី ក៏ដូចជាតំបន់ជាច្រើនផ្សេងទៀត ។

លោក Erdogan បានសម្តែងការសោកស្តាយដែលកិច្ចព្រមព្រៀងសន្តិភាពហ្គាហ្សា ដែលតួកគីយ៉េបានជួយសម្របសម្រួលដែរនោះ មិនត្រូវបានគេយកមកអនុវត្តឡើយ ដោយសារតែគោលការណ៍ច្បាប់អន្តរជាតិស្ដីពីការគោរពតាមការសន្យាត្រូវបានគេជាន់ឈ្លី ។

ទន្ទឹមគ្នា ប្រធានាធិបតីតួកគីយ៉េរូបនេះ ក៏បានព្រមានផងដែរថា ស្ថានការណ៍វិវត្តន៍ទាំងក្នុងតំបន់ និងពិភពលោក បង្ហាញថា ប្រព័ន្ធអន្តរជាតិកំពុងលើកទង់សសុំចុះចាញ់ ដែលបង្ហាញពីភាពបរាជ័យ ក្នុងការដោះស្រាយវិបត្តិ និងការរក្សាសន្តិភាពពិភពលោក ៕

ប្រភព ៖ Anadolu ប្រែសម្រួល ៖ ឈឹម ទីណា