លោក Emmanuel Macron កើតនៅថ្ងៃទី២១ ខែធ្នូ ឆ្នាំ ១៩៧៧ ក្នុងទីក្រុង Amiens ប្រទេសបារាំង បច្ចុប្បន្នប្រធានាធិបតីបារាំងរូបនេះមានវ័យ ៤៩ ឆ្នាំ ។
លោក Macron គឺជាអ្នកនយោបាយបារាំងដ៏លេចធ្លោមួយរូប ដោយបានក្លាយជាប្រធានាធិបតីវ័យក្មេងបំផុតរបស់ប្រទេសបារាំង ក្នុងវ័យ ៣៩ ឆ្នាំ ពោលលោកឡើងកាន់តំណែងជាប្រធានាធិបតីក្នុងខែឧសភា ឆ្នាំ២០១៧ ។

លោក Macron បានបញ្ចប់ការសិក្សានៅសាលាល្បីៗជាច្រើន រួមទាំងសាលាជាតិរដ្ឋបាល École Nationale d’Administration ។ ក្រោយបញ្ចប់ការសិក្សាលោក Macron បានចាប់ផ្តើមអាជីពក្នុងវិស័យសាធារណៈ ដោយបម្រើការឲ្យក្រសួងហិរញ្ញវត្ថុបារាំង និងក្រោយមកបានបម្រើការជាធនាគារិកផ្នែកវិនិយោគ ។

លោក Macron បានទទួលការចាប់អារម្មណ៍យ៉ាងខ្លាំងក្នុងឆាកនយោបាយ នៅពេលកាន់តំណែងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងរដ្ឋបាលរបស់អតីតប្រធានាធិបតី François Hollande មុនពេលលោកបង្កើតគណបក្សនយោបាយកណ្តាលនិយមមួយឈ្មោះថា «En Marche!» នៅឆ្នាំ ២០១៦ ។

ចំណែកយុទ្ធនាការឃោសនាបោះឆ្នោតជ្រើសរើសប្រធានាធិបតីរបស់លោក Macron បានផ្តោតសំខាន់លើកំណែទម្រង់សេដ្ឋកិច្ច ពាណិជ្ជកម្មសេរី និងការពង្រឹងសហភាពអឺរ៉ុប ។ យុទ្ធនាការនេះបានធ្វើឲ្យលោកជាប់ឆ្នោតកាន់តំណែងជាថ្មីនៅឆ្នាំ ២០២២ ។

យ៉ាងណា ក្នុងអាណត្តិទីមួយនោះ, លោក Macron បានឆ្លងកាត់បញ្ហាជម្លោះ និងភាពចម្រូងចម្រាសធំៗជាច្រើន រួមទាំងការគ្រប់គ្រងវិបត្តិជំងឺរាតត្បាតកូវីដ ១៩ ។
ដោយឡែកសម្រាប់ជីវិតផ្ទាល់ខ្លួនរបស់លោក Macron វិញ ប្រធានាធិបតីបារាំងរូបនេះទទួលបានការចាប់អារម្មណ៍ជាខ្លាំង ដោយសារតែលោក Macron បានរៀបអាពាហ៍ពិពាហ៍លោកស្រី Brigitte Trogneux ដែលធ្លាប់ជាគ្រូបង្រៀនផ្នែកល្ខោនរបស់លោកផ្ទាល់តែម្ដង ៕

ប្រភព ៖ EBSCO, ប្រែសម្រួល ៖ សារ៉ាត