សម្តេចធិបតី លើកទឹកចិត្តឱ្យកម្ពុជា និងម៉ាឡេស៊ី ពង្រីកការវិនិយោគលើ «ឧស្សាហកម្មហាឡាល» | APSARA MEDIA SERVICES

បណ្ដាញផ្សព្វផ្សាយយើងខ្ញុំផ្សេងទៀត

EconomyEducationSportsInfotainmentAMS TravelKhmer CivilizationPolitico 360 Dark ModeAMS ONE-MINUTEកម្ពុជាមាតុភូមិខ្ញុំសច្ចធម៌ប្រវត្តិសាស្ត្រAPSARA TV 11សម្លេងយុវជនសម្លេងមាតុភូមិ
APSARA Media Services Light Logo
សម្តេចធិបតី លើកទឹកចិត្តឱ្យកម្ពុជា និងម៉ាឡេស៊ី ពង្រីកការវិនិយោគលើ «ឧស្សាហកម្មហាឡាល»

សម្តេចធិបតី លើកទឹកចិត្តឱ្យកម្ពុជា និងម៉ាឡេស៊ី ពង្រីកការវិនិយោគលើ «ឧស្សាហកម្មហាឡាល»

ភ្នំពេញ៖ផ្អែកលើសក្តានុពលវិស័យកសិកម្មរបស់កម្ពុជា និងសន្ទុះកំណើនពាណិជ្ជកម្មទ្វេភាគី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកទឹកចិត្តឱ្យកម្ពុជា និងម៉ាឡេស៊ី ពង្រីកកិច្ចសហប្រតិបត្តិការបង្កើត «ឧស្សាហកម្មហាឡាល (Halal)» ដើម្បីរួមចំណែកធានាសន្តិសុខស្បៀង។ការលើកឡើងនេះ ធ្វើឡើងក្នុងជំនួបពិភាក្សាការងារជាមួយអនុប្រធានព្រឹទ្ធសភាម៉ាឡេស៊ី នៅវិមានសន្តិភាពកាលពីព្រឹកថ្ងៃទី១៨ ខែវិច្ឆិកា។

ក្នុងជំនួបសម្តែងការគួរសម និងពិភាក្សាការងារជាមួយឯកឧត្តម ដាទុក នួរ ចាហ្សឡាន ប៊ីន តាន់ ស្រ៊ី ម៉ូហាម៉េដ (Datuk Nur Jazlan bin Tan Sri Mohamed) អនុប្រធានព្រឹទ្ធសភាម៉ាឡេស៊ី កាលពីព្រឹកថ្ងៃទី១៨ ខែវិច្ឆិកា ឆ្នាំ២០២៦ សម្តេចធិបតី ហ៊ុន ម៉ាណែត បានលើក​ឡើងថា កម្ពុជា និងម៉ាឡេស៊ី គួរពង្រីកកិច្ចសហប្រតិបត្តិការសេដ្ឋកិច្ចបន្ថែមទៀត ជាពិសេសការជំរុញបង្កើតឧស្សាហកម្មហាឡាល ដោយផ្អែកលើសក្តានុពលកសិកម្ម និងកសិ-ឧស្សាហកម្មដ៏សម្បូរបែបរបស់កម្ពុជា។

ចំណែកឯកឧត្តមអនុប្រធានព្រឹទ្ធសភាម៉ាឡេស៊ី បានវាយតម្លៃខ្ពស់ចំពោះទំនាក់ទំនងរវាងប្រទេសទាំងពីរ ព្រមទាំងបង្ហាញក្តីសង្ឃឹមថា កម្ពុជា និងម៉ាឡេស៊ី នឹងរៀបចំសកម្មភាពអបអរសាទរខួបលើកទី៧០ នៃទំនាក់ទំនងការទូត នៅឆ្នាំ២០២៧ ខាងមុខ។ ឯកឧត្តមក៏​បានគូសបញ្ជាក់ដែរថា វិនិយោគិនម៉ាឡេស៊ីកំពុងពេញចិត្តយ៉ាងខ្លាំងចំពោះបរិយាកាសវិនិយោគនៅកម្ពុជា និងកំពុងបន្តពង្រីក​ការវិនិយោគថ្មីៗបន្ថែមទៀត។

ជាការឆ្លើយតប សម្តេចធិបតី ហ៊ុន ម៉ាណែត បានអះអាងពីការបន្តដាក់ចេញគោលនយោបាយ និងវិធានការចាំបាច់នានា ដើម្បីធានា​បរិយាកាសធុរកិច្ចប្រកបដោយភាពប្រកួតប្រជែងជូនវិនិយោគិនបរទេស រួមទាំងវិនិយោគិនម៉ាឡេស៊ីផងដែរ។ ទន្ទឹមនឹងនេះ សម្តេចធិបតី ក៏បាន​ជម្រាបជូនអំពីការវិវត្តថ្មីៗនៃស្ថានការណ៍ព្រំដែនកម្ពុជា-ថៃ ដោយសង្កត់ធ្ងន់លើជំហរដោះស្រាយបញ្ហាដោយសន្តិវិធី ផ្អែកលើច្បាប់​អន្តរជាតិ និងកិច្ចព្រមព្រៀងដែលមានស្រាប់។

គួរបញ្ជាក់ថា ទំនាក់ទំនងសេដ្ឋកិច្ចរវាងប្រទេសទាំងពីរកំពុងមានសន្ទុះកើនឡើងគួរឱ្យកត់សម្គាល់។ បើតាមរបាយការណ៍​របស់អគ្គនាយក​ដ្ឋានគយ និងរដ្ឋាករកម្ពុជា ក្នុងរយៈពេល ៩ខែ ឆ្នាំ២០២៦ ទំហំពាណិជ្ជកម្មទ្វេភាគីកម្ពុជា-ម៉ាឡេស៊ី សម្រេចបាន ១,១៨ពាន់លាន​ដុល្លារ​អាម៉េរិក កើនឡើង ៤៦,៥៤ភាគរយ បើធៀបនឹងរយៈពេលដូចគ្នាកាលពីឆ្នាំមុន ដែលធ្វើឱ្យម៉ាឡេស៊ីក្លាយជាដៃគូពាណិជ្ជកម្ម​ធំជាង​គេទី៧ របស់កម្ពុជា ៕
ដោយ៖វណ្ណលុក

ស៊ូ វណ្ណលុក

ស៊ូ វណ្ណលុក

ក្រៅពីជំនាញនិពន្ធព័ត៌មានរបស់សម្ដេចតេជោ នាយករដ្ឋមន្ត្រីប្រចាំស្ថានីយវិទ្យុ និងទូរទស្សន៍អប្សរា លោកក៏នៅមានជំនាញផ្នែក និងអាន និងកាត់តព័ត៌មានបានយ៉ាងល្អ ដែលនឹងផ្ដល់ជូនទស្សនិកជននូវព័ត៌មានដ៏សម្បូរបែបប្រកបដោយទំនុកចិត្ត និងវិជ្ជាជីវៈ។

ឆ្នាំ២០២៥ © រក្សាសិទ្ធិគ្រប់យ៉ាងដោយ៖ អគ្គនាយកដ្ឋានវិទ្យុ និងទូរទស្សន៍អប្សរា