រដ្ឋមន្រ្តីសុខាភិបាល៖ ជំងឺទឹកនោមផ្អែម គឺជាបញ្ហាសុខភាពសាធារណៈដ៏សំខាន់ និងជាជំងឺមិនឆ្លងរ៉ាំរ៉ៃ ដែលអាចបង្កផលវិបាកធ្ងន់ធ្ងរ | APSARA MEDIA SERVICES

បណ្ដាញផ្សព្វផ្សាយយើងខ្ញុំផ្សេងទៀត

EconomyEducationSportsInfotainmentAMS TravelKhmer CivilizationPolitico 360 Dark ModeAMS ONE-MINUTEកម្ពុជាមាតុភូមិខ្ញុំសច្ចធម៌ប្រវត្តិសាស្ត្រAPSARA TV 11សម្លេងយុវជនសម្លេងមាតុភូមិ
APSARA Media Services Light Logo
រដ្ឋមន្រ្តីសុខាភិបាល៖ ជំងឺទឹកនោមផ្អែម គឺជាបញ្ហាសុខភាពសាធារណៈដ៏សំខាន់ និងជាជំងឺមិនឆ្លងរ៉ាំរ៉ៃ ដែលអាចបង្កផលវិបាកធ្ងន់ធ្ងរ

រដ្ឋមន្រ្តីសុខាភិបាល៖ ជំងឺទឹកនោមផ្អែម គឺជាបញ្ហាសុខភាពសាធារណៈដ៏សំខាន់ និងជាជំងឺមិនឆ្លងរ៉ាំរ៉ៃ ដែលអាចបង្កផលវិបាកធ្ងន់ធ្ងរ

ភ្នំពេញ៖ ជំងឺទឹកនោមផ្អែម គឺជាបញ្ហាសុខភាពសាធារណៈដ៏សំខាន់ និងជាជំងឺមិនឆ្លងរ៉ាំរ៉ៃ ដែលអាចបង្កផលវិបាកធ្ងន់ធ្ងរដូចជា ជំងឺបេះដូង និងសរសៃឈាម ជំងឺតម្រងនោម ការខូចខាតសរសៃប្រសាទ ជំងឺបាតភ្នែក និងជំងឺផ្សេងៗទៀត ប្រសិនបើមិនត្រូវបានពិនិត្យឃើញ និងគ្រប់គ្រងឱ្យបានត្រឹមត្រូវ និងទាន់ពេលវេលា។

នេះជាការបញ្ជាក់របស់ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល ដែលបានថ្លែង នាព្រឹកថ្ងៃសៅរ៍ ទី២១ ខែវិច្ឆិកា ឆ្នាំ២០២៦ ក្នុងពិធីបើក ទិវាទឹកនោមផ្អែមពិភពលោក ក្រោមប្រធានបទ៖ «អន្តរាគមន៍ឆាប់រហ័សក្នុងការបង្ការ និងការគ្រប់គ្រងជំងឺទឹកនោមផ្អែម» ដើម្បីរួមគ្នាលើកកម្ពស់ការយល់ដឹង និងជំរុញសកម្មភាពជាក់ស្តែងក្នុងការបង្ការ ការរកឃើញជំងឺឱ្យបានឆាប់ ការធ្វើរោគវិនិច្ឆ័យ ការព្យាបាល និងការថែទាំអ្នកជំងឺទឹកនោមផ្អែមនៅកម្ពុជា។

ឯកឧត្តមសាស្រ្តាចារ្យរដ្ឋមន្ត្រីលើកឡើងថា ទិវាទឹកនោមផ្អែមពិភពលោក គឺជាឱកាសដ៏មានសារៈសំខាន់ នៃការយល់ដឹងអំពីហានិភ័យ នៃជំងឺទឹកនោមផ្អែមរបស់ប្រជាពលរដ្ឋ សារៈសំខាន់នៃការរកឃើញជំងឺ ឱ្យបានទាន់ពេល និងភាពចាំបាច់នៃការទទួលបាន សេវាថែទាំសុខភាព ប្រកបដោយគុណភាព សមធម៌ និងនិរន្តរភាព។ ការអន្តរាគមន៍ឆាប់រហ័ស មិនត្រឹមតែជួយកាត់បន្ថយផលវិបាក នៃជំងឺទឹកនោមផ្អែមប៉ុណ្ណោះទេ ប៉ុន្តែថែមទាំងជួយសង្គ្រោះជីវិត កាត់បន្ថយបន្ទុកចំណាយលើគ្រួសារ ប្រព័ន្ធសុខាភិបាល និងសេដ្ឋកិច្ចជាតិ ព្រមទាំងលើកកម្ពស់គុណភាពជីវិតរបស់ប្រជាពលរដ្ឋផងដែរ។

ឯកឧត្តមសាស្រ្តាចារ្យ បានអំពាវនាវដល់ថ្នាក់ដឹកនាំ និងមន្ត្រីសុខាភិបាល គ្រប់លំដាប់ថ្នាក់ ត្រូវចាត់ទុកការបង្ការ និងការគ្រប់គ្រង ជំងឺទឹកនោមផ្អែម ជាការងារអាទិភាព ដែលត្រូវអនុវត្តជាប្រចាំ និងជាបន្តបន្ទាប់ ព្រមទាំងអំពាវនាវដល់អង្គការដៃគូអភិវឌ្ឍន៍ សង្គមស៊ីវិល វិស័យឯកជន និងគ្រប់ភាគីពាក់ព័ន្ធ បន្តគាំទ្រការកសាងសមត្ថភាព ការអប់រំសុខភាព ការពង្រឹង និងពង្រីកសេវាសុខាភិបាល ដើម្បីធានាថាការងារអនុវត្តការងារនេះ ប្រកបដោយប្រសិទ្ធភាព និងនិរន្តរភាព។ បន្ថែមពីនេះ ឯកឧត្តមសាស្រ្តាចារ្យ ក៏បានអំពាវនាវដល់ប្រជាពលរដ្ឋទាំងអស់ ឱ្យចូលរួមថែរក្សាសុខភាពផ្ទាល់ខ្លួន និងក្រុមគ្រួសារ តាមរយៈការប្រកាន់យករបៀបរស់នៅដែលមានសុខភាពល្អ ការពិនិត្យសុខភាពជាប្រចាំ ការស្វែងរកសេវាសុខាភិបាល នៅពេលមាន រោគសញ្ញាសង្ស័យ និងចូលរួមអនុវត្តតាមការណែនាំរបស់មន្ត្រីសុខាភិបាល។

ជាមួយគ្នានោះ ដើម្បីជំរុញការអនុវត្តក្នុងការបង្ការជំងឺទឹកនោមផ្អែម ឯកឧត្តមសាស្រ្តាចារ្យរដ្ឋមន្រ្តី បានផ្តល់នូវអនុសាសន៍សំខាន់ៗដូចខាងក្រោម៖

-ពង្រឹងសេវាសុខភាពបឋម ដើម្បីឱ្យការបង្ការ ការពិនិត្យរកជំងឺ ការធ្វើរោគវិនិច្ឆ័យ និងការព្យាបាលបានទាន់ពេលវេលា និងកាន់តែជិតប្រជាពលរដ្ឋ។

-បង្កើនការផ្សព្វផ្សាយ និងអប់រំសុខភាព ដើម្បីជំរុញឱ្យប្រជាពលរដ្ឋ ដែលមាន អាយុចាប់ពី ៤០ឆ្នាំឡើង ទៅមណ្ឌលសុខភាព ដើម្បីពិនិត្យរកជំងឺ ទឹកនោមផ្អែម និងជំងឺលើសសម្ពាធឈាម រួមទាំងបង្កើនការយល់ដឹងអំពីរោគសញ្ញា កត្តាហានិភ័យ។

-ពង្រឹងសមត្ថភាពមន្ត្រីសុខាភិបាល ក្នុងការធ្វើរោគវិនិច្ឆ័យ ការព្យាបាល ការតាមដាន និងការផ្តល់ការប្រឹក្សាដល់អ្នកជំងឺ ដើម្បីធានាគុណភាព និងប្រសិទ្ធភាព នៃសេវាថែទាំ។

-ជំរុញការទទួលបានឱសថចាំបាច់ប្រកបដោយសមធម៌ និងនិរន្តរភាព ដើម្បីធានាថាអ្នកជំងឺអាចទទួលបានឱសថ និងសម្ភារៈចាំបាច់សម្រាប់ការព្យាបាល និងគ្រប់គ្រងជំងឺជាប្រចាំ។

-ពង្រឹងប្រព័ន្ធទិន្នន័យ ការតាមដាន និងការវាយតម្លៃ ដើម្បីធានាថាការរៀបចំ គោលនយោបាយ ការកំណត់អាទិភាព និងការបែងចែកធនធាន ផ្អែកលើភស្តុតាង និងតម្រូវការជាក់ស្តែង។

-បង្កើនការចូលរួមរបស់សហគមន៍ និងអ្នកជំងឺផ្ទាល់ ដើម្បីឱ្យការបង្ការ និងការគ្រប់គ្រងជំងឺទឹកនោមផ្អែម ក្លាយជាកិច្ចការរួមរបស់សង្គមទាំងមូល៕

ហេង សម្បត្តិ

ជាការីថត ជាអ្នកយកព័ត៌មាន ក៏ជាអ្នកជំនាញកាត់តវីដេអូ ប្រចាំស្ថានីយវិទ្យុ និងទូរទស្សន៍អប្សរាផងដែរ។ តាមរយៈបទពិសោធន៍ជាច្រើនឆ្នាំលើវិស័យព័ត៌មាន នឹងនាំមកជូនទស្សនិកជននូវព័ត៌មានសម្បូរបែប ប្រកបដោយវិជ្ជាជីវៈ។

ឆ្នាំ២០២៥ © រក្សាសិទ្ធិគ្រប់យ៉ាងដោយ៖ អគ្គនាយកដ្ឋានវិទ្យុ និងទូរទស្សន៍អប្សរា